HAPPY FEAST

السلام عليكم

كل عيد وانتم بخير وبلاش تأكلوا كتيرو خدوا بالكم من صحتكم واعرفوا ان عيد الاضحى مش يعنى لحمه وهوبر وبس .ولازم نفتكر ايه قصه الذبح واحنا ليه بندبح ف العيد... وهو ما فعله سيدنا إبراهيم حيث افتدى الله سيدنا إسماعيل بذبح عظيم (شاة) عندما هم سيدنا إبراهيم بذبح إبنه سيدنا إسماعيل.واوصيكم بالتكبيرومتنسوش صلاة العيد بتبقى حلوة اوى والى بيروح يصليها بيغفر له بأمر الله

وصلاة العيد سنه مؤكدة عن الرسول (صلى الله عليه وسلم)

وعيد سعيد عليكم جميعا وربنا يجمعنا تحت ظله يوم لا ظل الا ظله

ومتنسوش انهاردة الجمعه وليله يوم عرفه احب يوم الى الله

ومتنسوش الدعاء انهاردة وبكرة والصيام ...صيام يوم عرفه يغفر الله به سنه قبليه وسنه بعديه

وربنا يتقبل منا جميعا

نشوة قلبى

السلام عليكم

زارت بنها اليوم احب صديقه لقلبى الكتكوت نشوى تووته من قويسنا

وبجد كان يوم تحفه ..احنا رحنا قعدنا ع الكورنيش وكان احساس خيالى بأنى كنت مع حبيبه قلبى والى كنت بحلم باليوم الى نتقابل فيه

بحبك يا توته وبقول بأعلى صوتى انى بموت فيكى وانى انا مكنتش انا انهاردة وخرجت من مود النكد وكنت مرحه وروشه مع ارق واطيب قلب ممكن اى حد يقابله ف الدنيا

انا مش عارفه اوصفك اذاى يا نشوه قلبى انا اكيد لو وصفتك مش هقدر اديكى حقك

بس كل الى اقدر اقوله ان الانسان بيقابل ف حياته ناس ملاك لازم يحافظ عليهم لان مش من السهل ان الانسان يلاقى صديق وفى ويخاف عليه اكتر من نفسه .الى يلاقى صديق كدة زم يحافظ عليه وميضيعوش من ايده ابدا

لان ف الوقت الحالى صعب اوى نلاقى انسان بالمواصفات دى.وهى اكتر من كده والله. انا الى مش عارفه اعبر عن مشاعيرى

بحبك اوى يا نشوتى وربنا يخليكى ليا وميحرمنيش منك ابدا

احلى برنامج ممكن تحمله

السلام عليكم

زوروا هذا الينك حقيقى برنامج مفيد جدا

وبعد ماتحملوة اكيد هتقولوا احسن برنامج عملناله دون لود من ع الكمبيوتر

http://saaid.net/book/open.php?cat=95&book=2118

وانشر الاسلام معانا

انا متشكرة اوى يا ميويتى على البرنامج دة

وبحبك وبحكم كلكم ف الله

هام وعاجل

بسم الله الرحمن الرحيم (كل معروف صدقه، والدال على الخير كفاعله ) البخارى ومسلم( من دعا إلى هدى كان له من الأجر مثل أجور من تبعه لا ينقص ذلك من أجورهم شيئا) مسلم فلو واحد صام بفضل إرسالك له هذا الرسالة فلك مثل أجره على نص الحديث السابق (فاطمع في الأجر ) إلى كل مسلم ومسلمة 1- في أول يوم من ذي الحجة: غفر الله فيه لأدم، ومن صام هذا اليوم غفر الله له كل ذنب. 2- وفي اليوم الثاني: استجاب الله لسيدنا يوسف ومن صام هذا اليوم كمن عبد الله سنة و لم يعص الله طرفة عين . 3- وفي اليوم الثالث: استجاب الله دعاء زكريا ومن صام هذا اليوم استجاب الله دعائه . 4- وفي اليوم الرابع: ولد سيدنا عيسى عليه السلام ومن صام هذا اليوم نفى الله عنه البأس والفقر وفي يوم القيامة يحشر مع السفرة الكرام. 5- وفي اليوم الخامس: ولد موسى عليه السلام ومن صام هذا اليوم برء من النفاق وعذاب القبر. 6- وفي اليوم السادس: فتح الله لسيدنا محمد بالخير ومن صامه ينظر الله إليه بالرحمة ولا يعذبه أبدا . 7- وفي اليوم السابع: تغلق فيه أبواب جهنم ومن صامه أغلق الله له ثلاثون باب من العسر وفتح الله ثلاثون باب من الخير. 8- وفي اليوم الثامن: المسمى بيوم التروية من صامه أعطى الله له من الأجر ما ليعلمه إلا الله . 9- وفي اليوم التاسع: وهو يوم عرفه ومن صامه يغفر الله له سنة من قبل وسنة من بعد . 10- وفي اليوم العاشر: يكون عيد الأضحى وفيه من قرب قربانا وذبح ذبيحة ففي أوب قطرة من دماء الذبيحة يغفر الله ذنوبه وذنوب أولاده. ومن أطعم فيه مؤمنا وتصدق بصدقة بعثه الله يوم القيامة آمنا ويكون ميزانه أثقل من جبل أحد . دخل رسول الله صلى الله عليه وسلم المسجد فذا برجل قد قضى صلاته وهو يتشهد ويقول: اللهم أسالك يا الله الأحد الصمد الذي لم يلد ولم يولد ولم يكن له كفوا أحد أن تغفر لي ذنوبي.. انك أنت الغفور الرحيم. فقال : قد غفر له..قد غفر له..قد غفر له (صحيح) فلا تضيعوا هذه الأيام المباركة بدون التقرب لله تعالى بالعمل الصالح كالصوم والصلاة علي وقتها في المسجد وذكر الله والدعاء والزكاة وصلة الرحم والكلمة الطيبة
لاتنسونا بالدعاء ولكم بالمثل.

هتعمل ايه

السلام عليكم

اتمنى انكم تكونوا كويسين

انا معرفش مين بيقرا البلوج

بس انا كنت عايزة اخد رأيكم ف حاجه

هل لو حد قال لك كلمه ضايقتك هيكون ايه تصرفك؟؟؟

هل هتهزقه ولا هتقوله الله يسامحك ولا دة يبقى تهاون واستسلام وانك كدة معرفتش تاخد حقك

ولا مش هترد خالص ولا هتشتكيه لحد كبير ولا هتعمل ايه بالظبط

وشكرا

وكل عام وانتم بخير انهاردة اول يوم ف ذى الحجه

والعيد الاسبوع الى بعد الجاى وعيد سعيد عليكم

وكل عام وانتم بخير للمرة التالته علشان سنه 2007

ربنا يجعلها سنه سعيدة واحلى من الى قبلها وكلها افراح وانتصارات

لكل داء دواء

رب هب لى شجاعه لتغيير الاشياء التى استطيع تغيرها.وسكينه لقبول الاشياء التى لا استطيع تغيرها .وحكمه لمعرفه الفارق بينهما.....

عندما تصل الى مفترق طرق فعليك ان تسير ف أحدهم.....

السعادة هى حاله الوعى الناتجه عن تحقيق المرء لقيمه....

لا يمكنك عبور البحر بمجرد الوقوف والتحديق فى الماء.....

اعزم وانت حينئذ حر...

اقفز أعلى .اقفز ابعد. فهدفك هو الوصول للسماء ومرادك هو النجوم....

ان الهدف الاسمى لوجودنا فى هذا العالم هو ان نغرس فى انفسنا الارادة....

اذا اردت ان يكون المستقبل صفحه مفتوحه أمامك فعليك اولا ان تدرس الماضى...

مشوار الالف ميل يبدأ بخطوه...

ان ما يمكن القيام به فى اى وقت لن يؤدى فى اى وقت....

يستطيع الانسان ان يغير من سلوكه إذا استطاع ان يغير من اراءه وافكارة ومعتقداته....

اذا كنت تريد قوس قزح فعليك بتحمل المطر....

وفى النهايه

إذا اردنا ان يتم العمل دون تعب فعلينا أولا ان نتعب فى تعلم هذا العمل....

هذة خلاصه عدة ورقات من كتاب جبته من المكتبه اسمه الحياه تخطيط(خطه عمليه لاخراج افضل ما لديك)و

لدكتور ريك برينكمان وريك كير تشنر

لو عجبكم الطريقه دى قولولى علشان كل ما اقرا حبه الخصها لكم

دعاء

اللهم إني أستغفرك لكل ذنب
.. خطوت إليه برجلي
.. أو مددت إليه يدي
.. أو تأملته ببصري
.. أو أصغيت إليه بأذني
.. أو نطق به لساني
...... أو أتلفت فيه ما رزقتني
ثم استرزقتك على عصياني فرزقتني
ثم استعنت برزقك على عصيانك
.. فسترته علي
وسألتك الزيادة فلم تحرمني
ولا تزال عائدا علي بحلمك وإحسانك
.. يا أكرم الأكرمين
اللهم إني أستغفرك من كل سيئة
ارتكبتها في بياض النهار وسواد الليل
في ملأ وخلاء
وسر وعلانية
.. وأنت ناظر إلي
اللهم إني أستغفرك من كل فريضة
أوجبتها علي في آناء الليل والنهار
تركتها خطأ أو عمدا
أو نسيانا أو جهلا
وأستغفرك من كل سنة من سنن
سيد المرسلين وخاتم النبيين
سيدنا محمد صلى الله عليه وسلم
تركتها غفلة أو سهوا
أو نسيانا أو تهاونا أو جهلا
أو قلة مبالاة بها
.. أستغفر الله ...... وأتوب إلى الله
.. مما يكره الله
قولا وفعلا .. وباطنا وظاهرا

ادعولى

السلام عليكم

اذيكم كلكم يارب تكونوا بخير
انا لما شفت اصحابى ف الكليه قالولى انهم حاسين انهم متغيروش من ايام الجامعه ...لكن انا قلت لهم ان انا اتغيرت كتير
لانى كنت مرحه جدا فوق تصور اى حد وكنت طفله ف احساسى وف حبى لكل الى حواليا ومكنتش ازعل من حد او اضايق من حد ابدا ولا احسس حد انه عمل تصرف يضايق حتى
بس انا قلت لكم انى اتغيرت ودة احساسى بجد انا اولا مبقتش مرحه زى زمان ومعنديش وقت للكلام دة بس ساعات بيجى عليا وقت بقول لو اسيب شغلى هرجع هبه تانى
الكلام دة انا مقلتوش ليكم ف الكليه
بس انا حاسه انى مهمله ف نفسى وف بيتى وف حقوق الناس عليا على حساب شغلى وشايفه كمان انى متجوزة الكمبيوتر الكلمه دى اتقالت لى اكتر من مرة
انا قلتلكم انى اتغيرت مش بس ف موضوع المرح بس لا وكمان بقيت بتضايق بسرعه من اتفه الاسباب واعنفها مش عارفه السبب بس بجد انا بقيت موديه ونفسى اخرج من التغيير دة بسلام
يعنى بعد ماكنت افضل الاسبوع كله كويسه ومفيش الى يضايقنى ومش شايله هم حاجه
بقيت ممكن اتضايق ف اليوم اكتر من مرة وشويه اكون كويسه وشويه لا...حاسه انى مبقتش بالقوه انى اسيطر على مشاعرى واحساسى بالمواقف ذى زمان
هو الواحد لما بيكبر بيبقى اعقل ولا العكس
المهم انا اخذت بنصيحه اخ عزيز وفكرت ف الى مضايقنى واكتشفت انى قبل كدة مكنتش بزعل علشان مكنتش بشغل نفسى بايه الى مضايقنى وعلشان كدة كنت ببقى دايما فرحانه
لكن انا الى كان مضايقنى مكنتش شايفاه بس لمل فكرت وقعدت مع نفسى شويه عرفت السبب ودة خفف حدة الزعل الحمد لله
لما الواحد يعرف الغلط فين ويشتغل عليه بيبقى احسن وبيرتقى بنفسه
انا ان شاء الله هغير الاسباب وهحلها وهكون دايما افضل من الاول طول ما انا بعرف ايه عيوبى وايه الى بيضايقنى ومعملوش تانى
ولاول مرة اعرف ان معرفه المشكله وسببها هو مفتاح حلها
انا من دلوقتى هكون هبههههوبه جديدة غير الى الكل يعرفها هكون ايه بقى انتم الى هتقولوا
واطلب من كل الى يقرا الكلام دة انه يدعيلى وشكرا .........دوشتكم

الله يناجيك......اتق الله

السلام عليكم

انا انهاردة الصبح حصل معايا موقف غريب من شخص اغرب

انا الصبح كنت بعمل اتشك ع الايميل وكنت فاتحه المسنجر ولاقيت شخص غريب الاطوار ربنا يهديه

انا عايزه اقولكم ان الشخص دة اسمه نفس اسم شخص ابن صاحبه ماما مع الاختلاف بجد فرق السما من الارض

التانى محترم جدا جدا ودة على العكس

المهم هو عارف عنى حاجات كتير ذى مكان الاقامه وعارف البلوج بتاعى ومستنتش اعرف هو عارف ايه تانى ومن مين عرف كل دة

ما علينا كل دة مش مهم يعرف الى عايز يعرفه...بس بكل احترام وادب

اذ فجأه وبلا مقدمات لاقيت هذا الشخص الى المفروض اعتقد انه مسلم والمفروض كمان انى اخته ف الاسلام ....يقول لفظ بزىء

انا لما لاقيته مش عايز يقول هوا مين و كنت شاكه انه مش ابن صاحبه ماما وعملته بلوك فعلا ورجعت تانى قلت ممكن يكون له اكتر من ايميل

بس اول ما لاقيته بينحط وبيقل ادبه كنت ههزقه بس الحمد لله مسكت نفسى ومدتوس من حسناتى لانه ميستاهلش انى اخد بسببه ذنب

بس الى انا مضايقه انى عملته بلوك من غير ما اقوله اتق الله يمكن يفهم معناها

بس انا بقوله دلوقتى اتق الله يجعل لك مخرجا

انا عارفه انه هيقرا الكلام دة وربنا يهديه

ربنا يبعد عنى وعنكم الاصدقاء السوء واصحاب العقول الفارغه والتافه

ربنا يحمينى ويحمى اهلى واصحابى وكل من اعرف

انا من يوم ما اتعلمت حاجه اسمها نت وعرفت اد ايه الشات دا حاجه تافهه ومضيعه للوقت لما بتكون مع حد متعرفوش والبنت تطلع ولد وكدة

من ساعتها وانا مش بكلم حد ع النت معرفوش

بس اختلاط الميل اختلط عليا الامر

الحمد لله على كل شىء

السلام عليكم

انا رحت المكتبه انهاردة وشفت اصحابى ف الكليه بجد كان يوم من الف ليله وليله ويوم من ايامنا الحلوة يوم من ايام الكليه

اكننا لسه طلبه بالظبط

احساس الانسان انه طالب مش شايل مسؤليه ومش همه غير انه ينجح وبس ويسعد اهله

احساس جميل اكن الواحد كان طفل وكبر

الاطفال دول احسن حاجه ف الدنيا ...ياريت الواحد يفضل طفل طول عمرة

حياته كلها حلوه وطلباته مجابه الكل يسعى من اجل اسعادة وتلبيه رغباته

دة غير انه يضحك وقت ما يحب ويعيط وقت مايحب ويطرب الى حواليه ..يسرخ ..يكركر

اةةة من الكركرة سكر ماشاء الله ربنا يدوم علينا جميعا بسمتنا ويدوم ع الاطفال بسمتهم

وياريت كلنا نبقى من جوانا اطفال ومنموتش البراءة الجميله دى لانها احلى حاجه ف الكون

وربنا يسعد ايامكم

انا قلت الكلام دة كله اصل الواحد من يوم ما اتخرج بقى شايل هم حاجات كتير اوى وقلق وحاجات كدة ربنا يبعد عنكم كل احساس وحش

ولما رحت الكليه وشفت اصحابى وافتكرت احساسنا واحنا طلبه وانطلاقنا وحبنا للحياه بجد كنا اطفال ف الجامعه يمكن علشان كليتى مرحه شويه ومش صعبه للدرجه

فكنت انا ودفعتى عالم دماغ مش شايلين هم الدنيا بمعنى اصح

ما علينا انا اتعلمت من اليوم انهاردة انى مش معنى تخرجى انى مبقاش طفله ذى ما كنت طول عمرى وانا لسه بتعلم

لا انا لازم اكون طفله طول عمرى بس من جوه وبس بمعنى انى الروح روح طفله والشخصيه شخصيه فتاه راشده

وربنا يكتر الاطفال

فكر وتدبر

السلام عليكم

الايميل دة وصلنى وقلت لازم كل الناس تقراة بجد حلو اوى ياريت تفهموه

بارك الله ف صاحب الايميل وكاتبه ومرسله وجزاة كل الخير

يا مــن تبحث عن إنسان يفهمك

إنسان بمعنى كلمة الانسانيه؟؟ إنسان يكون صادقا معك .. مخلصا لا يلتفت الى سواك،،لايبدلك بين عشية وضحاها كما تبدل الملابس والاثواب انسان يضحي من اجلك،، ويبحث بأي وسيلة عن ارضائك واسعادك .. يصبر على سيئات طباعك .. يفهمك ويحس بك تجده عندما تحتاجه الى جانبك،، يساعدك حتى بالانصــات الى همومك دون تعب او ملل انسان يمسح دمعتك قبل سقوطها على وجنتيك .. انسان تعرف انك تعني له الكثير وانه لن يعوضك بكنوز الدنيا كلها انــســان يحــبـــك بـــصـــدق لــــــكــــــن قبل أن تبحث عن كل هذه المواصفات وقبل ان تميز بين هذا الانسان او ذاك. هل بـــحــثــت عن نفس الشيء في داخـــــلك .. هل تساءلت عن امكانية ان تكون لديك انت نفس ميزات الشخص الذي تبحث عنه؟ هل أنت ذلك الصادق المخلص المضحي ؟؟ هل انت ذلك المعطي بلا حدود و لا كلل؟؟ هل انت ذلك المحب الصادق؟؟ تبحث دائما عن الأفضل لكن إبحثه في داخلك أولاً قبل أن تغوص في اعماق مشاعر المحيطين بك، وتقيم ميزاتهم وعيوبهم إسبح في داخلك لتكتشف أعماقك .. أصلح جــــــوهــــرك ومعدنك العميق قبل أن تنشــد ذلك في غيرك لو ان كل انسان بحــث عن هذه المواصفات بداخله قبل ان يبحث عنها فيمن حــوله لأستقامت أمـــور كثيره،،و لتحسنت عــــلاقــاتنا الاجــتمـــاعيه الى حد كـــبـــير.... *هــمـــسه أخـــيـــره* "لاتـــقل اني حاولت ان اكون كذلك لكن المجتمع سيء،،،حـــاول وحــاول فبالتأكــــيـــــد ستــــجد من يـــفهـــمـــك وســـيـــجــــدك هو ايــــضـــــا لتـــفهـــــمــــه
منقول

حب الحياه

السلام عليكم

اذيكم جميعا انا بقالى فترة مش بكتب بس انهاردة قلت لازم اكتب حاجه انا مش ف بالى حاجه معينه

بس جه ف بالى دلوقتى احساس حلو اوى ؟؟؟؟
وهو امممممم ياسلام لما الواحد ياخد دش سخن وف عز السقعه ويروح نازل تحت الحاف وينام ف الخط

الدفا حلو وخاصه لما الانسان بيكون سقعان وياسلام لما امسك كتاب بحبه واقراة لحد ما انام .....الحاف والبطانيه ...واو حلوين اوى

دى مش دعوة للنوم ف الخط بس فى اوقات الانسان لازم ياخد فيها رست ويفصل نفسه عن الحياه والشغل والناس وميفكرش غير ف نفسه واذاى يسعدها ولو لمدة صغيره

ان لنفسك عليك حق

ان لبدنك عليك حق

مهم اوى الوقت الى تحس انك مهتم فيه بنفسك ومنفصل عن الدنيا ومش شايف فيها غيرك احساس جميل

وصدقونى تأثيره بعد كدة على حياتكم وشغلكم وعلاقتكم بالى حواليكم بيكون كويس اوى

اكنكم بتعملوا ريفرشمنت

او بلغه الكمبيوتر

Right Click--------Refresh

وربنا يريح بالكم جميعا ويجعل كل اصحابى وكل من اعرف من افضل واتقى واحسن الناس

بحب ربنا وسيدنا محمد وماما وبابا واخواتى

و بحب كل الناس ومش بكره حد وبحب كليتى واصحابى وبحب كل الدنيا والشوارع والناس الكبار والصغيرين

مش عارفه عندى حاله حب هستيريه مش عارفه من ايه

بس حاسه انى بحب الدنيا كلها

لاياس مع الحياة ولا حياه مع الياس

ولا اله الا الله

بدون عنوان

السلام عليكم
انا مش عارفه اقول ايه انا مكنتش هكتب اصلا لان مودى بايظ من امبارح باليل واجلت الكتابه لانهاردة وعلشان مكنتش عايزه ابهت الاكتئاب على حد
قولت استنى لانهاردة يمكن اقوم كويسه
بس للاسف انا محستش باليوم انهاردة اساسا وكانى معشتوش بجد والله
احساس وحش اوى رغم كدة رحت الشغل وكنت قرفانه ومكانش ليا نفس اشتغل اساسا
بس الحمد لله معرفش اليوم عدى اذاى

انا مش عارفه السبب بس هى اكيد حاجات كتيره

انا احب دايما انى مسببش اى مضايقه لاى حد و دة علشان اعرف انام باليل وانا ضميرى مرتاح

لكن لما تسبب مضايقه لنفسك وكمان لغيرك الحياة بتبقى وحشه اوى

والاحساس الاصعب من كده انك تتمنى تمسح يوم من قاموس حياتك لان احداثه اترتب عليها تغيرات ف علاقتك بالى حواليك

والاصعب كمان من كدة انك تبقى نفسك تعيط ومش عارف او بمعنى اصح مش عايز لحسن حد ياخد باله ويسألك مالك

بس الحل ف البكاء لو قدرت عليه هكون كويسه

رجاء الدعاء بجد محتاجه له اوى

عموما الحمد لله على كل شىء

وعجبى.... الله يسامحك يا حمار

سؤال من حمار
عجبي عليك يابن آدم
ياكبيرالدار
قومت الدنيا وماقعدت لما قالوا حمار ..
هوّ اسمي شتيمة ولا جنسي ده عار؟ ..
خلقني ربي وخلقك ولا حدش له خيار ..
وانا مهما زاد الحمل فوقي..صابر على المشوار ..
لا في يوم اقول إشمعنى اخويا وآخد منّه تار ..
ولا يوم ابص لرزق غيري واطق منّه واغار ..
ولا ارفع في يوم عيني على جارتي واخون الجار ..
ولا مهر ادفع لحمارتي وشبكة وسوار ..
ولا شقة اجمع في تمنها ولا اجهّز دار ..
ولا حرمي حامل تتوحم عايزة الكافيار ..
ولا بنتي تخرج عن طوعي وتجيب العار ..
ولا ابني يدمن ويهلوس ويقع ينهار
.. عايش في حالي متهنّي..وليه افكار
.. بآكل وباشرب وانهّق ومافيش أسرار ..
وعندي ابن آدم يخدمني ليل ونهار
.. إن جعت يشتري برسيمي بأغلى الاسعار ..
وفي مرضي يفضل يعالجني ويدعي الستّار ..
خادم امين من غير راتب ولا حتى ايجار ..
ودلوقتي عرفت يابن آدم .. مين فينا الحمار؟

خلى حياتك احلى

السلام عليكم

انا لسه هكتب جه ف بالى موضوع وهو ان ليه لما الواحد يقوم من النوم بيكون المود بتاعه ساعات حلو و ساعات يكون مش اوى

بس عن تجربه محدش يوهم نفسه ان مدام قام من النوم قرفان يبقى اليوم كله هيبقى كده بالفعل

لا احنا الى بنبرمج نفسنا على كده حتى لو عدت عليك حاجه تسعدك انت مش هتاخد بالك منها لانك حطيط نفسك ف مود وحش من الاول وشايف ان الناس كلها مكتئبه ومش طايقين بعض

لكن لو حاسس ان الحياه حلوه وان الدنيا بتضحك لك هتلاقى الناس كلها سعيده زيك وبشوشين ف وشك وهتبقى ماشى طاير وخفيف ذى النسمه تمام

------------------

قال الله تعالى فى حديث قدسى "انا عند ظن عبدى بي

تفألوا بالخير تجدوه

-----------------

احب اقولكم القصه دى انا ماشيه بيها ف حياتى

مرة واحد كان قرفان وشايف الدنيا سودااا والناس كلها وحشه ففكر انه يعزل ويسيب البلد الى مش مرتاح فيها.....فراح سأل شيخ البلد التانيه الى عايز يعيش فيها فقالو الناس عندنا وحشين انا عايز اعزل عندكم ياترى الناس عندكم كويسين ...فرد عليه شيخ البلد وقالو الناس هنا ذى الناس الى عنك بالظبط ..فقالو يااااة وحشين بردو

وواحد تانى كان سعيد وكويس مع الناس كلهم وحب ينقل مكان سكنه لنفس البلد السابق ذكرها...فسألأ شيخ البلد دى وقاله انا عايز اعزل عندكم...فسألأه الشيخ انت الناس عندكم ف بلدكم عاملين ايه ...فرد وقالوا كويسين اوى...فقالوا هنا بردو الناس كدة

--------------

نتعلم من كدة ان احنا الى بأدينا نخلى حياتنا احلى وبأدينا بردو نخليها ظلمااااااااااااااااااااااااااااا

بس انا بخاف من الظلمه

ياريت نفكر بأيجابيه وبلاش الاحساس السلبى ..وذى ماقلت لكم تفائلو بالخير تجدوه

مع سلامه الله

اين المشمرين للجنه

• السلام عليكم ورحمه الله وبركاته
  انا عايزة اتكلم معاكم ف مستقبلى ومستقبلكم ؟؟؟؟؟؟؟
  انهاردة اخويا الصغير قالى تعالى نسمع شريط حلو اوى ممكن تسمعوا منى الملخص ؟؟؟؟
  الشريط دة بيتكلم عن الجنه وال11 محطة تنقية الى كلنا هنمر عليهم قبل ماندخل الجنة
  معنى كلامى دة اننا كلنا هندخل الجنه ......ايوة كلنا باذن الله .....طب اية الدليل؟
  اولا احنا بلدنا الاصلية اية ......مش المفروض انها بلد ابائنا ...طب هى اية ؟
  بلد ادم علية السلام اية (الجنه.....طب مش هو ربنا كان عايز ينزله الارض ...ايوة طب ليه دخل الجنة الاول؟
  علشان نعرف ان بلدنا الاصلية هى الجنة بلد ابونا ادم عليه السلام.....احنا ضيوف ف الارض لفترة مؤقتة...والحياة الخالدة ف الاخرة ..لو كلنا فكرنا كدة هنعرف ان الدنيا لا تسوى جناح بعوضة
  وعايزة اسأل سؤال احنا بنقعد نفكر ونحلم بالدنيا ...هل فى حد قعد يفكر ف الاخرة وهينعم فيها اذاى بكل اشكال النعم والتى لم يوجد مثلها ف الدنيا...فيها ما لاعين رات ولا اذن سمعت ولا خطر على قلب بشر..... يقول تعالى لهم ما يشاءون فيها ولدينا مذيد.....ربنا يجعلنا من اهلها اجمعين وندخلها سالمين
  ف البداية عايزة انبه لحاجة ان مفيش سعادة كامله ف الدنيا....لكنها ف الجنه
  ان الله كتب الا يرفع شىء الا وضعه
  دنيا اية الى مضيعين نفسنا ومضيعين الاخره علشانها...دى حتى اسمها دنيا...بس هى الجسر لللاخرة!!!ا
  دة اقل واحد ف الجنه هو اخر واحد خارج من النار له ف الجنه مثل مٌلك اعظم ملك من ملوك الدنيا وعشرة امثال وهو فيها خالد
  اهذا ادناهم!!!!!!!!!!!فمابالكم بأعلاهم....انة من ينظر لوجه الله الكريم بالغداوه والعشى
  انا تخيلت احساسى وانا واقفة عند بير مسعود وفى لحظة الغروب ...ودة احلى منظر شفتة ف حياتى
  فما بالكم برؤية خالق الجمال نفسه.....يااااااااااااة ربنا يوعدنى واهلى ومن اعرف
  والقصر لبنة من فضة ولبنة من ذهب ملاطها المسك والحصى لؤلؤ وسقفها تخيلوا....عرش الرحمن
  المتر ف الجنه بخير تعمله او بصلاه تصليها او بصله رحم---ب او ب او ب
  ياماناس فقدت الجنه تحت اسم الحب الحرام....شوف انت بقى الحور العين الى مستنينك ف الجنه ...لا وشوف الاغرب ان زوجتك ف الجنه بتكون احلى من الحور العين نفسهم -عروبا ً اترابا-- يعنى تجيد فن الحب والعشق وسنها 33 سنه ولا تشيخ
  وتوصف نساء اهل الجنه انها من جمالها عن دخولها قصرها يضاء القصر من جماها
  اوعو تخدعكم مشاهد الحب ف الافلام الحب مش كدة خالص الحب الحقيقى ف الجنه
  ------------------------------------------------------------------------------------
  بس فى حاجه مهمه ..... وهى: ان مفيش بيدخل الجنه وهو فيه ف قلبه ذنب
  لا يدخل الجنه الا الانقياء
  طب النقاء دة هيكون اذاى؟؟؟؟؟؟؟؟؟؟؟
  فى 11 محطه علشان تنقينا ولو اتنقينا ندخل الجنه على طول بدون عذاب او نار
  ال11 دول 4 منهم ف الدنيا و3 ف القبر و4 ف يوم القيامه
  التلاته الى ف الدنيا باختصار شديد:ا
  التوبه....... لو تبت توبه نصوحه عن ذنوبك المعروفه غفرت لك كل ذنوبك مهما كانت
  الاستغفار.....عن الذنوب التى لاتعرفها النبى كان يستغفر 100 مرة كل يوم فما بالك بنا
  حسنات تمحو السيئات.......يقول تعالى ان الحسنات يذهبن السيئات
  المصائب المكفره....بمعنى ان الى يحصل له مصيبه يصبر دى ربنا بيكفر عنك ذنب انت عملته واصبر واحتسب
  --------------------------------------------------
  التلاته الى ف القبر:ا مش كل الناس بتتعذب ف القبر ...امال مين؟... الى محطات التنقيه الى ف الدنيا منقتهوش بينقى ف القبر ....لسة فى فرصه
  صلاه الجنازه ....يابخته الى يصلى عليه عدد كبير من المؤمنين الاتقياء
  اهوال القبر....ظلمه -وحشه-عصرته
  هدايا الاعمال....اى ما يرسله الاحياء للاموات وهى 4 اشاء(-الحج والعمرة والصدقه والدعاء)ا
  والتلاته الى ف يوم القيامه: ا طبعا عارفي ان الى هيمر بالمرحله دى الى هما لم ينقوا ف المراحل السابقه
  اهوال القيامه:شمس تندثر-ارض تزلزل-بحار تحول الى نار-سماء تقشط
  الوقوف بين يدى الله ...وقفه عتاب وليس وقفه عذاب...يقول لك جل جلاله ---ماغرك بى استهونت بلقائى اكنت تتجمل للناس وتأتينى بالقبيح ....تخيل ربنا بيقولك كدة...يافلان اقرأ كتابك ( وقفة موجعه
  شفاعه النبى صلى الله عليه وسلم
  اخر محطه واهم من كل الى فات وهى عفو الله عز وجل ..فالعفو يقول شفع الانبياء وشفع المرسلون افلا اعفو انا
  --------------------------------------------------------------------------------------------------------------------
  طب احنا اية الى ف ايدنا دلوقتى من ال11 محطه دول
  اقولكم انهم 3 بس وهما اول 3-- التوبه والاستغفار والحسنات
  والى هيعمل دول صح مش هيعدى على حاجة تانى وهيدخل الجنه خالد فيها
  ربنا يجعلنا من اهلها واهلى واصحابى وكل من اعرف ويجمعنا جميعا مع النبى تحت عرش الرحمن
  ف النهاية اتطلب منكم تدعو لى وتدعوا لصاحب الكلام الاستاذ الفاضل اعزه الله عمرو خالد
  السلام عليكم ورحمة الله وبركاتة
  قال تعالى(فمن يعمل مثقال ذرة خيرا يره ومن يعمل مثقال ذرة شر يره) صدق الله العظيم
  http://hhaabbhhoobb.blogspot.com/
  heba banha