Sunday, December 30, 2007

وداعاً 2007


اذيكم ..انا لاقيت نفسى بفتح البلوج واكتب منغير ما افكر هقول ايه...ربنا يستر

..صحيح الظروف الوحشه والظلم بيقسى القلب..زى ما نشوف بالظبط ف فيلم او ف الشارع ونلاقى ان الطفل المقهور ف بيته بيعوض دا ف مدرسته وف الشارع مع اصحابه او اى انسان ميعرفوش حتى ويحس بنفسه ووينتقم ..وهنا السؤال.. ذنبهم ايه الناس الى ف حالها انهم يشيلوا ذنب انسان مقهور ونشأ ف ظروف وحشه...مسؤليه مين؟؟

ليه بردو لما يكون الانسان مكسور ومجروح ... بيحاول ينتقم . لنفسه ومن الى حواليه.. لأ وهو بيعاقب نفسه على شىء لم يكن لخطىء فيه اكيد بيظلم ناس تانيه ملهاش اى ذنب
ليه كمان فى ناس لما بتخرج من تجربه مؤلمه ...ليه بتبيح الالم لغيرها وميهونوش عليهم ..زى ما تكون الحياة وخبطاتها بدل ما بترقق قلوبنا وتخليه ارق واطيب ..بيبقى اقسى وممكن ميحسش حتى انه بيجرح و بيظلم ..ومش حاسس ان فى ضحايا ملهومش ذنب

د الى بيخلينا ابنسمع عن قصص كتير انتهت نهايه غير مفهومة ليه ممكن انسان يعرف انسانه ويحبها وفجأة دون اى مقدمات يتخلى عنها ف عز ما هى محتاجه له....وف اخر الفيلم نكتشف ان الانسانه الى حبت بجد واخلصت كانت ضحيه لتجربه سابقه فاشله لأنسان حب ينتقم لكرامته ويعذب انسانه تانيه وشايف ان بكدا ممكن يرضى كبريائه وينتقم لنفسه ...و مش حاسس ولا مدرك بيعمل ايه.

ومن كتر ما اتجرح مبقاش يحس بألم الجرح وقسوته...لدرجه انه ممكن يشوف دموع انسان وميتهزش...يشوفه بيموت ولا يتحرك
لكن هل دا مبرر؟!؟!؟! ان لو انسان اتجرح مرة انه يجرح اول انسان يقابله؟؟
معتقدش....؟!؟!

.....فيلم مأساوى حزين وكله شجن ..بنشوف الكلام دا حوالينا و ف كل حته ..لكن بنغض الطرف
لان احنا الى مش عايزين نشوف..لما بنقرب الكاميرا شويه ونصور ونحاول نفتح عنينا.. بنعرف ان الظلم موجود وبكل انواعه...بس مسئولية مين ؟!؟!؟!؟!؟
مسؤليه مين ان الى اتسرق مرة يروح ويسرق ابرياء؟
ومسؤليه مين ان الى اتجرح يجرح غيره؟
مسؤليه مين الأطفال الابرياء يشيلوا هم الدنيا وهما متهنوش حتى على ضحكه حلوة؟
مسؤليه مين ان الى شايف غيرة بيهمل شغله يقول وانا كمان اشمعنى هو يقبض منغير ما يتعب؟
مسؤليه مين ان كل انسان يحس بالى قدامه ويحترمه ويقدرة؟
مسؤليه مين اننا نبقى ايد واحدة ونحب بعض..ومتخانقش على تفاهات ونسيب الجوهر و الاهم؟
لأمتى هنفضل كلنا سلبيات وقصور ..؟؟؟؟؟.
امتى هنبقى ناس يعتمد عليها بجد.!!.امتى هنبقى ناس تشرف نفسها وبلدها..امتى هنبقى بنى ادمين يُحترموا بقى...مسؤليه مين اننا نحس بأدميتنا؟؟
امتى هنمشى ف الشارع فخورين اننا بنى ادمين او مصريين؟
احساس الانسان بالظلم وصبرة على قسوة الاحساس ممكن يستمر فترة اة لكن للصبر حدود وأى مظلوم ف اى مكان اكيد له صرخة...بس بردو مسؤليه مين؟؟؟

بس حابه انى اضيف ان المسؤليات كتير..انا مش هقعد ادور على كل انسان واسأله عن مسئوليته واحاسبه لانه مش شغلى...لكن حابه اخاطب الضمير اقول ان والله كل انسان ف البلد دى مسئول ...واصغر مسؤليه وف نفس الوقت اصعب مسئولية هى ان كل انسان يكون مسئول مبدئيا عن نفسه وعن ضميرة وعن انه لما يقف بين يدى الله مش هيقول كلمه (اصل المفروض) انا عملت كذا علشان مش عارفه مين عمل ايه فكانت الظروف والجوابات والكلام دا
مش هيحصل يوم ينظر المرء ما قدمت يداه...

ندائي لكل البشر لو قعدنا ندور على كل قصور وشىء سلبى ونرميه على غيرنا ونعلق اخطأنا على شماعات الأخرين مش هنتقدم خطوة وهنتأخر اكتر واكتر
دعوتى ليكم ف نهايات عام2007 الى بعتبرة من اجمل سنين حياتى انا الشخصيه....لانى عشت فيه ايام جميله ...بدون ذكر تفاصيل
الا انى بدعو نفسى واياكم ان نبدأ صفحه جديدة مع النفس ومع الاخرين ونبتدى من انهاردة كل منا يعمل لليوم الى هيقابل فيه ربه

ويارب يكون راضى عنا جميعا ونتقابل ف الجنة.... اميييين
ونعمل لليوم دا بكل ما تحمله الكلمه من معنى نشوف ربنا هيسألنا عن ايه ونشتغل عليه .ونتخيل وقفتنا بين يدى الله يوم الحساب..نشوف اضفنا ايه ف حياتنا ولنفسنا وللى حوالينا ولأهلنا واصحابنا ولبلدنا...من لم يزد ف الدنيا فإنه زائد عليها
وبجد كل المسؤليات الى سألت عنها لو كل واحد منا اتقى ربنا ف ضميرة وشغله ومسؤلياته ....هنتقدم وهنوصل لشىء كويس بإذن الله
عايزاكم كمان كل الى قرأ الكلام دا يسامحنى على اى خطأ اقترفته بقصد او بدون قصد

وانا كمان اشهد الله انى قد سامحت كل البشر ولا احمل فى قلبى ضغينه لأى انسان

ويالا نفكر للحظة ان السنة الى فاتت عشناها ازاى وصح ولا غلط..و بدل ما نهبل ونفرح ان فى سنه فاتت من عمرنا نعرف اننا بالسنه دى بنقرب اكتر من الاخرة ومن النهايه...ونحاسب نفسنا ونعرف ان اليوم الى بيفوت مش بيرجع تانى فمابالكم بسنة كاملة ضاعت من عمرنا دا احنا المفروض نعيط...نشوف خسرنا فيها ايه وغلطنا ف ايه واتعلمنا ايه وانجزنا ايه وكان المفروض نعمل ايه وتكاسلنا...محاسبتنا لنفسنا وتقييمنا ل2007 مهم جدا وقد يترتب عليه السنه الجاية وهنخطط لها ازاى
انا دلوقتى ... غمضت عنيا شويه ومر قدام عينى شريط سنة2007.....لاقتنى بقول يااااة السنه دى كانت حلوة اوى وعشت فيها ايام جميلة..حتى الحزن فيها ...كان قليل والحمد لله... الا انه بيمثل لى شىء مهم ف حياتى ..انا اصلى بحب رقم سبعة
عارفين انا عمرى ما هنسى 2007 ابدا لانها اثرت عليا كتير و اتمنى يكون بالايجاب و اتعلمت فيها حاجات كتير..سواء ف شغلى وخبرة ف الحياة وعرفت فيها ناس جديدة اثروا فيا واتعلمت منهم الكثير...
بشكرهم كلهم وبشكر اى انسان اضاف لى شىء ولو بسيط بقصد او بدون قصد
ربنا يسعد ايامكم ويجعل الأعوام الجاية أحلى وأسعد..وفي طاعه الله أقرب
اكيد طولت عليكم ..رغم انى لأول مرة اكتب بوست وارغى فيه كتير واحس انى مقولتش حتى ربع الى عايزة اقوله
بس دى بشرى حلوة بأنى داخله عام2008 بقلب جامد وهكتب كتير بإذن الله لوعشت وكان ليا نصيب اكتب
وأدوشكم ف عام 2008 :-)
وربنا يجعله عام كله افراح وسعادة وامل وحب على كل الناس والبشر
وف الختام
سلام مؤقت....بختم بيها عام الفين وسبعه
مع السلامه واشوفكم السنه الجاية :-)

Tuesday, December 25, 2007

من الشخصيات الاكثر تأثيرا عليك ف حياتك؟

اذيكم.. حمد الله على سلامتكم من العيد
اتمنى تكونوا كويسين واللحمه مأثرتش عليكم بالسلب
لحسن انا شفت ف شغلى بعد العيد نمازج خارجه من العيد متنحين تتنيحه ما يعلم بيها الا ربنا ...ربنا يلطف بينا
اول اول امبارح رابع يوم العيد كان فرح ياسمين رومانيا عشرة اربع سنين ف كليه الاعلام قسم العاهات العامه والاعلان..ياسمين كانت اذاعه وتلفزيون
احنا مسمينها رومانيا لاننا اول ما عرفناها كانت لسه راجعه من رومانيا مع باباها علشان هى كانت مع باباها هناك ف شغله لانه دبلوماسى
المهم الفرح كان تحفه الا حاجه واحدة وربنا يسامحك بقى يا ياسمين على الشو الروسى الى اصرت حماتك انها تجيبه
كان عار الحقيقة...هههههه
ما علينا ....المهم متكرريهاش ف فرح اختك....يعنى راقصات مصر خلصوا لما تجيبى لنا راقصات من روسيا ...ويارتهم بيعرفوا يتنيلوا...دا حاجه تقطع القلب والهدوم كمان
انا الحمد لله مكنتش مركزة على الشو لكن كنت مركزة اكتر انى اتابع ردود فعل الحضور جميعا
لاقيت فى ناس اتدورت الناحية التانيه وادتهم ظهرهم
وغالبية الشباب طبعا كانوا متنحين
وحاسين انهم بيتفرجوا على روتانا دايركت وبدون حواجز
لا حول ولا قوة الا بالله
اللهم اهدى شباب المسلمين
تم افساد فئه كبيرة من سكان مدينه نصر
مكنش العشم يا جاسى
عارفه لو فرح اختك هيكون كدا توقعى انى مش جايه من دلوقتى...انا بقولك اهه...علشان تبقى عارفه...:-)
----
كنت عايزة اطرح عليكم سؤال بفكر فيه بقالى كتير اوى
وهو كالأتى....:من هم اكثر الشخصيات الأكثر تأثيرا عليكم ف حياتكم سواء تأثير ايجابى او سلبى..؟
شخصيه قريبه او شخصيه عامة؟؟؟
؟او مواقف اثرت عليكم ف حياتكم بردو؟
انا هقولكم على رأيي بس انا مستنيه اقرأ ردودكم اولا
وشكرا

Sunday, December 16, 2007

ليس كل ما يتمناة المرء يدركه

السلام عليكم
كل عام وانتم بخير وعيد اضحى سعيد عليكم
ممكن انسان يبقى ف بيته وربنا يقدر له انه يمر بواقف معينه قد تكون غريبه
لكن الاغرب انك تحس انك كنت ف حلم عشته بكل كيانك وكنت مفتح وحاسس كل شىء فيه
ومقتنع انه واقع ..وتعيشه بكل تفاصيله
وتكتشف انك لما جيت تحط رجلك على السلم فلتت ف وقعت واتخبطت واتعورت..... بس فوقت وعرفت انك كنت بتحلم وان الى عشته كان ف خيالك انت وبس
ممكن تفوق على حقيقه مرة
وممكن تعرف انك غلطت ..بس المهم تقدر تصلح الغلط وتراجع نفسك قبل فوات الاوان
انا بحب الاحلام اوى...ومنها بقدر اعيش واحب واحس الى مقدرش احسو ف ارض الواقع...بس انا للأسف مبحلمش غير كل فين وفين
بفرح اوى لما الاقى حد يعرفنى ويقولى انه حلم بيا...ببقى سعيدة اوى بغض النظر عن الحلم كان ايه....لانه حلم ...خيال..مش واقع
--
انا مقتنعه ان مفيش شىء يخلى الانسان يندم على حاجه عملها حتى لو غلط ...مدام عرف الصح فين وبدأ يتغير
كل شىء الانسان بيمر بيه ف حياته ..بيستقطع من وقته لازم يعتز بيه
حتى لو جرح

Tuesday, December 11, 2007

الف مبروك


ومن آياته ان خلق لكم من انفسكم ازواجا لتسكنوا اليها وجعل بينكم مودة ورحمة

انهاردة 12/12

فرح اتنين غاليين عندى اوى

من اصحابى..... اقصد اخواتى ..عشرة اربع سنين من اجمل ايام حياتى في كليه اعلام القاهرة

العروسين

احمد وهاله

الف مبروك يا اخواتى وربنا يكرمكم ويسعد ايامكم

انا من يومين طلعت كل الصور والذكريات الجميله وقعدت اتفرج عليها وانا فرحانه اوى

وكل ما الاقى صورة فيها احمد وهاله اقول لماما هما دول العريس والعروسه..اصحابى

بصى حلوين ما شاء الله اذاى.. تحسى انهم مش مجرد خطيب وخطيبته...انا بحس دايما انهم توأم

واى اتنين بيربطهم شىء بحس انهم بيبهتوا على بعض..لدرجه اننا ممكن نتخدع ونفتكرهم اخوات

انهاردة بإذن الله كتب كتابهم وزفافهم

ادعوا معايا ربنا يسعدهم ويكتب لهم كل خير

اللهم بارك لكما وبارك عليكما وجمع بينكما فى خير

Saturday, December 8, 2007

يوم من ايام هبههههوب

اهلا وسهلا قرائى واصدقائى الاعزاء
وحشتونى وحشتونى وحشتوووونى
انا حصل معايا موقف انهاردة واتكرر 3 مرات
---
الحمد لله مواعيدى ف الغالب مظبوطه وبحب اوصل دايما قبل ميعادى
المهم انا امبارح نمت متأخرة شويه على 1.30 كدا
المهم عندى شغل الساعة 9
وانا صحيت من النوم 9 الا خمسة
وف 4 قايق اتوضيت ولبست ونزلت..طبعا دا انجاز...الغريب بقى ف الموضوع انى ف عز زنقتى ولهوجتى الاقى الموبايل الى مبينطقش بيرن ورقم غريب.
ونغمتى دعاء....(و اللهم اجعل القرآن الغظيم ربيع قلوبنا) .....فرديت
الو السلام عليكم مين
بقى كدا يا وحشه مش عارفانى
اةة اهلا اذيك يا مروة
مروة مين انا مش مروة انا ريهام.. رومى يا وحشه...كدا مش عارفة صوتى
سورى والله يا رومى مش واخدة بالى انا اصلى صحيت مفزوعة ولاقيت الساعه 9 والمفروض انزل 9 الا ربع
المهم انا استغربت ان الموبايل ممكن يقعد باليومين ميجيليش مكالمة يترد عليها
وميجيليش المكالمه دى غير وانا متأخرة...يالا الحمد لله
المهم لاقيت عربيه توصلنى الشغل بسرعه الحمد لله وانا داخله الشغل لاقيت واحدة صاحبتى مشفتهاش من سنة اولى اعدادى...والبنت كانت وحشانى اوى وكان نفسى اسلم عليها
الا انى قلت لها اذيك يا هند معلش انا متأخرة ومنغير ما اقف حتى اسلم عليها ...كدا وانا بجرى
---
شفتوا الدنيا عامله اذاى.....لما تجرى وراها تجرى منك ولما تمشى ف الاتجاة التانى هى الى تجرى وراك...زى خيالنا بالظبط
-----
المهم رحت الشغل وطبعا كنت متنحه وشويه وبدأت افتكر انا مين وهشرح اية انهاردة
المهم اليوم عدى على خير
ولما رجعت كلمت مى صاحبتى ف اخر سنة طب وقلت لها يالا نخرج نعمل شوبنج ونشترى شويه حاجات
المهم كلمتها واتفقنا نخرج الساعه7 ومن بعد المكالمه لحد 7 اخدت شاور وريحت شويه
وانا بلبس الساعه 6.30 واذ فجأة بمكالمه 6.45
الو مين..اذيك يا مرفت صاحبتى والبنت بتعيط فى ايه يا حبى مالك و7 دقايق ع الموبايل لحد ما رصيدها خلص
تانى مرة تجيلى مكالمه وانا مستعجله
المهم اتأخرت على مى وسبتها واقفه ف الشارع يا عينى ولما وصلت لها كانت هتعضنى
---
المهم اطرف موقف وكلاكيت تالت مرة.. لما خرجنا واحنا بنتمشى كنا جاعنين فدخلنا ناكل ف طاهى واحنا الاتنين بنحب بيتزا كواترو تشييز اوى
المهم الراجل قالنا ان الاوردر هيجهز بعد ربع ساعه..المهم رحنا نتفرج على محل جزم انا نقيت شوز بوت لمى وعجبتها واشترتها..يالا اى خدمه يا مى علشان تعرفى زوقى بس..المهم..بعد ربع ساعه كانت البيتزا جاهزة...اكلنا وخرجنا نتسوق ومن المفترض اننا احنا الاتنين خارجين نشترى جزمة بوت...المهم المحل التانى مى هى الى نقت وانا الى اشتريت
احنا زوقنا واحد
الطريف ف الموضوع ان وانا بقيس الشوز سوستتة مسكت ف الشراب ومش راضيه تسيبة ف حالة وحالفة لتقطعه المهم مى تشد من ناحيه والراجل من ناجيه وانا ماسكة نفسى وفطسانة على روحى من الضحك بس لجوة
المهم ف عز المعمعة دى الاقى الموبايل بيرن الووووووووو مين الاقى اخويا وبيقولى على شوية طلبات...
المهم قلت للراجل معندكش مقص...جاب المقص وقصينا الشراب ...المهم جبت من عندة البوت الى مسك ف الشراب لانى حبيتة اوى اوى اوى اوى وجبت من عندة شراب البسه بدل الشراب الذى تحول الى اشلاء( بقى 3 حتت )
------
بس كان يوم
الحمد لله
بس انا ومى انهاردة ضحكنا ضحك مضحكناهوش بقالنا زمان
ربنا يجعل ايامنا كلها فرحه وسعادة وضحكه حلوة من القلب
---
الى خلانى اكتب الموقف دا انه اتكرر 3 مرات ف يوم واحد
حاجه غريبه فعلا..لما اكون مستعجله ومركزة على شىء واحد ومش شايفه غيرة
الاقى من ناحية تانيه الدنيا كلها قدامى وانا الى بجرى منها
والعكس صحيح
لما بتكون عايز حاجات كتير مبتلاقيش ولا حاجه فيهم
حقيقى مفيش احسن من القناعه والرضا و والابتسامة واللحظه الحلوة

Wednesday, November 28, 2007

اصرخ قول للظالم لأ وسمعنى ..لما نموت علشان الحق وايه يعنى

يارب ومفيش بإيدى غير الدعاء
و حسبى الله ونعم الوكيل
----
يا من تغيث المستغيث ..ان لم تغيثنا... فمن يغيث
يارب محتاجه لك اوى ...محتاجه عطفك وحبك وحنيتك
مترددة اكتب ولا لأ ف البلوج
قلت يمكن لما اكتب ااخفف عن نفسى شويه
او احسس نفسى انى بكلم حد .. بستغيث.. بفضفض
---
انا مش بشتكى لحد ولا حاجة
يمكن الكتابة تدينى شحنه و تقوينى وتخلينى اقوى
احسن حد ممكن اشكى له حالى... هو ربى
الى خلقنى والى محدش هيسمعنى ويصبر عليا ويستحملنى غيرة
مفيش انسان يقدر يستوعب حد ويحتضنه ويفهمه... أد ربنا ..خالقنا وخالق الكون
---
لو حد عرف الى مضايقنى..ممكن يقول عليها حاجة عبيطه
وانى بدى اعتبار لحاجات تافهه واخدها على اعصابى وأديها اكبر من حجمها
وقد تكون كبيرة بالنسبالى وقد تكون هينه بالنسبه لحد تانى
---
محدش بيداوى حد...
ربنا الى بيداوى الناس ...
وفعلا محدش هيحس بالجرح أد المجروح ..مهما وصفت لبشر حجم الجرح ومدى عمقه وتأثيرة
---
الاحساس بالظلم صعب اوى... والى يوجع اكتر انك تحس بأن فى حد اتظلم وانت واقف مكتوف الايدى وعاجز ومش عارف حتى انك تبدى اعتراضك وتصرخ وتقول للظالم لأ-كفايا
عجبت لمن يخاف من عبادك وهو يعلم انك الجبار
وعجبت لمن يُخيف عبادك و هويعلم انك الجبار...المنتقم
لأمتى هنفضل نتطاطى ونكبر دماغنا ونشترى راحة البال ونكتم ف روحنا ونصرخ ف قلوبنا وصوتنا ميخرجش برانا
امتى يقدر المظلوم يصرخ بعلو صوته ويحس بيه غيرة ويقف معاة ويسانده...يحس بيه غيرة مش بكاء وضيق ونواح ...امتى هنبقى ايد واحدة ..ضد الظلم امتى هنتعلم اذاى ندافع عن غيرنا ..وخصوصا الضعيف مننا
قبل ما ندافع عن نفسنا
---
سورى انى بعد فترة انقطاع جيت وغمتكم
بس كنت محتاجه اكتب وادينى كتبت
--
يارب اصلح لنا شأننا كلة ولا تكلنا الى انفسنا طرفة عين
اللهم اهدى امة محمد( صلى الله عليه وسلم) الى ما تحب وترضى
"رب اغفر لي ولوالدي ولمن دخل بيتي مؤمنا وللمؤمنين والمؤمنات ولا تزد الظالمين إلا تبارا"

Monday, November 26, 2007

اللَّهُمَّ اجْعَلْ عَمَلَنَا كُلَّهُ خَالِصَاً لِوَجْهِكَ الكَرِيمِ


اذيكم يا حبايبى....وحشتونى ووحشتنى الكتابة ف البلوج

صحيح كنت واخدة اجازة من كل شىء حلو ...علشان عندى ضغط شغل كتير الايام دى وكنت بحاول ابعد شويه

واهه اريحكم منى شويه اكيد مزهقاكم طول السنة

واهى السنة خلصت بسرعه اوى ومرت مرور الكرام ...كل سنه وبلوج هبهوب طيب... ف الوقت دا وف اليوم دا ...كانت اول معرفتى بالبلوج وكانت اول لحظات انشاءة يوم 26/11/2006

واهه جات سنة 2007 واتمنى انى اكون اضفت لكم ولو شىء بسيط ف حياتكم من خلال البلوج


مع بداية عام 2007 كنت بدعى ربنا يجعل السنة دى من اجمل سنين حياتى واحس فيها بحاجات حلوة

الحمد لله ربنا استجاب لى وفعلا كانت سنة مختلفه عن اى سنه غيرها وحسيت فيها معانى كتير حلوة اوى الحمد لله وهفضل عايشه على كل ذكرى حلوة مريت بيها حتى لو كانت من ايام الطفولة وفعلا هى متتوصفش دى تتحس بس


وعلى اد ما حسيت فيها بأشياء جميله الا انى عشت فيها بردو ايام مؤلمة... والحمد لله الذى ألهمنى الصبر والرضا

الحمد لله

بس فعلا مبنحسش بقيمه الحلو غير لما نشوف الوحش

محدش يزعل من الظروف الصعبه...ما اخد الله منك الا ليعطيك....ربنا كريم وحنين اوى ...احن علينا من اهلنا


انا مش عارفة كنت هقول ايه كنت داخله اكتب وف بالى كلام كتير اوى وكله طار دلوقتى معرفش ليه

المهم انى قررت انى استمر ف الكتابه ف بلوج هبهوب

اللهم اجعلنا ممن يسمعون القول ويتبعوون احسنه

اللهم لاتجعلنا ممن ضل سعيهم في الحياة الدنيا وهم يحسبون انهم يحسنون صنعا


انا دلوقتى بدعى تانى ان ربنا يحيينى لعام مقبل جديد يمر على بلوج هبهوب ...ويارب يكون اكثر إفادة من زى قبل


ومتشكرة لكل الناس الى ردوا عليا سواء بكومنت او مباشرة او بالميل و...يارب اكون عند حسن ظنكم


Monday, November 19, 2007

البقاء لله

إن العين لتدمع
وإن القلب ليحزن
إنا لله وإنا إليه راجعون

Wednesday, November 7, 2007

رأيكم يهمنى..ارجو الاهتمام

السلام عليكم ..اذيكم قراّء بلوج هبههوب
انا نفسى اعرف مين الى بيقروا البلوج وهل هو مفيد ولا ملوش لازمه
انا عامله استفتاء عن عنوان احلى مقاله ف البلوج وتقييم للبلوج ككل.
.ياريت بليز يا قرائى الاعزاء تكتبوا ف مكان الكومنت ومحدش يكسل
انا مش هتعبكم المطلوب اسم المقاله الى عجباكم وتقييم .هل البلوج مفيد ام لا؟؟
الى مش عارف إذاى يعلق ذى ما ناس قالت لى ...بصوا..
اضغطوا على كومنت
Comment
وبعدين علموا على
Other
واكتبوا عنوان المقاله الى عجباكم ورأيكم ومتنسوش تكتبوا اسمكم ف الاخر
ثم نضغط على
Publish ..بس كدا
انا فعلا مهم عندى ردودكم وارائكم جداً..وعايزة اعرف هل فعلا البلوج مفيد ولا لأ؟؟؟
اعتبرونى بعمل وقفه مع البلوج ..وقفه للتقييم...وعايزاكم تساعدونى لو سمحتم بأرائكم
ياريت الكل يرد اصحابى الى يعرفونى و بالأخص الى بيقروا البلوج وميعرفونيش
قد يتوقف على ارائكم استمرارى فى الكتابه او لأ....
انا عامله البلوج دا علشان الناس صحيح انا بحكى مواقف شخصيه فيه كتير ..
لكن الهدف الاول هو افادة الناس ...فلو انتوا شايفين انه مش مفيد انا هرضيكم بردو
ولو فى حد عندة اقتراح بتعديل ما ياريت يتفضل بطرحه
وشكرا جزيلا قرائى الاعزاء
الى حابب ان البلوج دا يستمر يرد على البوست دا

Thursday, November 1, 2007

بوكية نصائح من هبهههوب



نصائح خاصة جدا:

-لا تكره أحداً مهما أخطأ في حقك
- عش في بساطه مهما علا شأنك

- توقع خيراً مهما كثر البلاء

- أعط ما في إستطاعتك بدون إنتظار مقابل ولو حرمت

- أبتسم ولو القلب يقطر دماً
----
بعض النصائح من كتاب ( اسرار الأشخاص الناجحين):
اعمل حيث تعيش وعش حيث تعمل
افضل دفاع هو ان تنصت
موقعك يعتمد على نظرتك
الماضى ليس هو المستقبل ..ليس معنى انك فشلت مرة انك شتفشل دائما
تقبل القدر
تعلم من الخسائر
اخلع غمامتك
إذا كنت تخشى الخطأ فسوف تخطىء
لا ترغب فى كل شىء
قد تسوء الامور قبل ان تتحسن
المال ليس كل شىء
كن واقعى فى تعاملك مع نفسك
اذا كنت لا تثق بنفسك فلن يثق بك احد
إذا كنت تشك فى قدراتك فسوف تفشل
الثقه فيروس حميد ينتشر في جسدك
الأمل ينبع من الداخل
تحرك للأمام وواصل تحقيق احلامك
---
الحياة مثل علبة الشيكولاته:انت لاتدري بأي قطعه منها سوف تحظى بها

------------
تعليق على اول نصيحه ..لا تكره أحداً مهما أخطأ في حقك:
فعلا..كلنا كبشر فى تعاملاتنا قد نصيب وقد نخطىء.. وممكن نكره موقف من شخص ونحب موقف اخر من نفس الشخص..لكن لماذا نكرهه رأينا منه الحسن قبل القبيح...الايوجد فى قاموس البشر التسامح ام انها صفه الاهيه يتصف بها الله عز وجل...والبشر قلوب قاسيه!!
قال الرسول صلى الله عليه وسلم الخير في وفى امتى الى يوم الدين.
ليه كتير من الناس لما بتمر ف فترة من حياتهم بظروف معينه بتفتكر الحاجه الوحشه قبل الحلوة...رغم ان الذكرى الحلوة هى الى بتفضل وبتعيش جوانا طول العمر مهما اتملت بألاتربه ..تظل دائما ف الذاكرة...
تخيلوا ان فى ناس كتير مبتسامحش بعض ..وهما بشر وبيغلطوا بردو زى غيرهم .
ربنا سبحانه وتعالى رب الكون بيسامح...نبقى احنا ايه بقى علشان يبقى عندنا قسوة قلب ومنسامحش
ليه بنركز على الوحش ونكبرة ف عنينا و نصغرالحلو وننساه...هل دا حل عشان نكرة الشخص ومن ثم ننساة وننسى اساءته.!!!!!!!..قد يكون حل فى فكر بعض الافراد
الانسان الاصيل عمرة ما يقدر ينسى الجميل والخيروالكلمه الحلوة الى من القلب.. حتى الابتسامه مش ممكن تتنسى ابدا
هل ممكن انسان يقدر يمسح ماضيه كله بأستيكه ف لحظة وينسى كل شىء واى شىء؟--ممكن نعيش بدون ماضى وبدون ذكرى؟.!!
الى ملوش ماضى ملوش حاضر والى ملوش حاضر ملوش مستقبل
مفيش انسان ينفع يمسح تجاربه من حياته...لكن ممكن نستفيد من اخطائنا الى فيها ..ونحب نبروز كل حاجه حلوة فيها ولو كانت بسيطه
يكفى اننا هنحب نفسنا اكتر ومش هنضايق لما نفتكر شخص او موقف او تجربه ما
---
صحيح نسيت اقول لبلوج هبهههوب كل سنه وانت طيب...دا الشهر الى اتولد فيه بلوج هبههوب وهيتم السنه قريب وعقبال 100 سنه...لسه بيبى
..شهر نوفمبر عند هبههوب مش هتقدرتفتح عنيك ..وخد بالك من الشعاع

Saturday, October 27, 2007

لا اله الا انت سبحانك انى كنت من الظالمين

ولو يعجل الله للناس الشر استعجالهم بأخير لقضى اليهم اجلهم ,فنذر الذين لا يرجون لقاءنا فى طغيانهم يعمهون
يونس11
وإن يمسسك الله بضر فلا كاشف له الا هو وان يردك بخير فلا راد لفضله ,يصيب به من يشاء من عباده وهو الغفور الرحيم
يونس107
وما خلقنا السموات والارض وما بينهما الا بالحق وإن الساعه لأتيه فأصفح الصفح الجميل وإن ربك هو الخلاق العليم
الحجر85
وإن تعدوا نعمه الله لا تحصوها ان الله لغفور رحيم والله يعلم ما تسرون وما تعلنون
النحل 18
ما عندكم ينفذ وما عند الله باق ولنجزين الذين صبروا اجرهم بأحسن ما كانوا يعملون
النحل96
ومن الناس من يعبد الله على حرف فإن أصابه خير اطمأن وإن اصابته فتنه انقلب على وجهه خسر الدنيا والأخرة ذلك هو الخسران المبين
الحج11
أفمن اسس بنيانه على تقوى من الله ورضوان خير ام من اسس بنيانه على شفا جرف هار فأنهار به فى نار جهنم والله لا يهدى القوم الظالمين
التوبه109
الذين امنوا تطمئن قلوبهم بذكر الله الا بذكر الله تطمئن القلوب
الرعد28
الذين يستحبون الحياة الدنيا على الاخرة ويصدون عن سبيل الله ويبغونها عوجا اولئك في ضلال بعيد
إبراهيم3
وألف الله بين قلوبهم ولو انفقت ما في الارض جميعاً ما ألفت بين قلوبهم ولكن الله ألف بين قلوبهم إنه عزيزٌ حكيم
الأنفال 63
إنما المؤمنون اخوة فأصلحوا بين اخويكم واتقوا الله لعلكم ترحمون
الزخرف66
نريد ان نمن على اللذين استضعفوا ف الارض ونجعلهم ائمه ونجعلهم الوارثين
النمل5
صدق الله العظيم

Monday, October 22, 2007

إن الله لا يظلم الناس شيئاً ولكن الناس انفُسهم يظلِمون


سألت رجل ف الستين من عمره لديه زوجه وستة ابناء..لماذا تزوجت وماذا كان هدفك قبل الزواج

رد الرجل قائلا انى تزوجت منذ 30 عاما وكنت قبل الزواج انسان عادى ومقطع السمكه وديلها مش عايز اقولك انى بلغه عصركم كنت واد مخلص وروش ولما فكرت اتجوز كان هدفى انى اعقل وااعمل بيت واسرة قبل فوات الاوانوكنت اريد ان التزم

فقلت له هل التزمت حقا فقال لى ليس بالضبط(ايجابه عايمه)ماعلينا

انى تزوجت امرأة جميله وكان يحكى بجمالها زمان وهى ام اولادى الستة

وسألته هل كنت تصلى قبل الزواج .. فقال لأ...انا ارد ان اتزوج حتى اصبح انسان ..بمعنى الانسان

فسألته هل تؤديها الان ام لم يأن للذين امنوا ان تخشع قلوبهم لذكر الله وهل اصبحت اقرب لله

فقال انا فعلا اصبحت اقرب الى الله ..زمنيا وليس روحيا

هل زوجتك واولادك يؤدون فرائض الله وهل هم ناجحين ف حياتهم؟؟

قال لى اولادى السته وزوجتى قريبين الى الله وسبحان الله اول مرة احس ان اولادى ناجحين ف حياتهم رغم غفلتى

سالته هل انت تشعر بهذه الغفله؟؟نعم اشعر بذلك..ولكن لماذا يكرمنى ربى ف اولادى وانا هكذا..هل ليوصل لى رساله انه كلما كنت غامل كلما بارك هو لى ف اولادى وزوجتى وما الهدف من ذلك

ولما فكرت ف الجمله دى قلت فعلا ايه الحكمه ف كدة ...لاقيت ان عقلى بيقولى ان اكثر الناس ابتلاء هم الانبياء والصالحين وان المومن يبتلى على قدر ايمانه

لما شفت ابناءة لاقيت انهم مبتلين فعلا الى فيهم مريض والى فيهم حصل له ازمه ف حياته والى والى ...لكن ابوهم هو الى ميعرفش عنهم حاجه وفاكر انهم ناجحين وغير مبتلين

مفيش انسان ربنا مبيبعتلوش رسائل تفوقه من غفلته ربنا عايزنا كلنا نقرب ونبقى كويسين الا من رفض منا

المهم مين بيشوف الرسائل ويفهم معناها

في ايه ف القراّن هى علقت معايا لما قريتها ف رمضان الماضى والى ربنا بيقول فيها"قد جائكم بصائر من ربكم فمن ابصر فلنفسه ومن عَمَى فعليها " الانعام ايه 104

سألته ايه هو هدفك ف الحياة ؟؟قال لا اعرف بصراحه انا صعقت من الرد

رجل ف الستين لا يعرف لما ذا هو عايش وعايز ايه ورايح فين ...مش ف دماغه اى شىء حقيقى حاجه تبكى ربنا يهديه

صعب الانسان يعيش منغير هدف ....لانه هيبقى هائم على وجهه كان فى جمله حلوة اوى كان بيقولها صلاح صالح الراشد "ان لم تخطط لحياتك تكون من ضمن مختططات الاخرين

قال تعالى "وما خلقت الجن والانس الا ليعبدون" ربنا خلقنا علشان نعبدة ..كويس اوى لما يكون فى انشان هدفه يكون انسان ناجح ف شغله ومش عيب لما يكون عندة هدف انه يبقى عندة عربيه حلوة ويكون انشان غنى وميسور الحال ويكون عندة اسرة حلوة وزوجه صالحه وحياة هانئه

كل دا مش عيب لكن كل دا لازم يصب ف الهدف الام وهو عبادة الله ورضاه وطاعته..علشان ياخد ثواب تعبه ويحصد ثمار جهدة ف الاخرة من بعد الدنيا

لازم نعود نفسنا ان كل عمل بنعمله اننا بنبتغى بيه رضا ربنا وانه خالص لوجه الله تعالى

وقبل ما امشى قلت له نفشك ف ايه دلوقتى؟؟؟؟فقالى نفسى الحياة تبقى حلوة وجميلة وبعد كلامى معاكى هحاول افكر ان لكل شىء نهاية وان فى موت وحساب

يااااة لسه بتفكر ف الدنيا تانى بعد الستين بس كويس انك هتفكر ف دار البقاء وتحاول تعمل ليها ..بس يارب تلحق

الدنيا يا عم الحاج دار ممر وليس دار مقر ...اعمل لدار المقر هتكسب الممر والمقر

بس فعلا اكتشفت ان: من عاش على شىء مات عليه ومن مات على شىء بعث عليه

ربنا ينور بصائر الناس والنفوس المؤمنه لنور الله

قال تعالى"هل ينظرون الى الساعة ان تأتيهم بغته وهم لا يشعرون,والاخلاء بعضهم لبعض عدو الا المتقين

وقال تعالى ف سورة ابراهيم"الذين يستحبون الحياة الدنيا على الاخرة ويصدون عن سبيل الله ويبغونها عوجاً أولئل فى ضلال بعيد

Saturday, October 20, 2007

قد أفلح المؤمنون

قد أفلح المؤمنون
بسم الله الرحمن الرحيم{قد أفلحَ المؤمنونَ * الذينَ هُم في صلاتِهِم خاشعونَ * والذينَ هُم عن اللغوِ مُعرضونَ * والذينَ هُم للزكاة فاعلونَ * والذينَ هُم لِفُروجهم حافظونَ * إلاّ على أزواجهم أو ما ملكت أيمانُهُم فإنّهم غيرُ ملومين * فمن ابتغى وراءَ ذلك فأولئكَ هُمُ العادون * والذينَ هُم لأماناتِهم وعَهدِهِم راعونَ * والذينَ هُم على صلواتِهم يُحافظون * أولئكَ هُمُ الوارثونَ * الذينَ يرثونَ الفِردَوسَ هُم فيها خالدون}.
(المؤمنون/1ـ11)
لابد ان ندرك أن القرآن مدرسة هداية، ومنهج دعوة، ودستور حياة، وفي ظلاله يجد الإنسان معنى الحياة، ويحيا فسحة الأمل، ويتنسم شذى الأمن والسعادة.لنقرأ القرآن، ولنقرأ معانيه
من اراد جنة الفردوس فاليقرأ الأيات ثانيةً
اللهم ادخلنا الجنة وأجيرنا من النار
اللهم انى اسألك الفردوس الأعلى

Friday, October 12, 2007

Happy Feast


السلام عليكم
كل عام وانتم بخيير
تقبل الله منا ومنكم
بصوا انا مليش نصيب اكتب البوست دا لانى مرتين ادخل اكتب ويحصل حاجه قبل ما اعمل ببلش
وخصوصا اخر مرة كنت مبدعه عموما الخلاصه قبل ما يحصل اى حاجه وبسرعه كدا اقولكم ربنا يسعد ايامكم وتعيشوا احلى ايام يارب
وخدوا بالكم من أكلكم ف رمضان رفقأ ببطونكم والكعك
واهم من كدا انكم تحافظوا على الروحانيات الحلوة الى كنا عايشينها ف رمضان وكل انسان كان بيعمل حاجه كويسه ف العبادات او المعاملات انه يواظب عليها ف غير رمضان ولو جزء قليل منها بس المهم الاستمرار عليها وبلاش هجر كتاب الله...والناس الى كانت بتصلى الفجر جماعه
وياريت تصلوا مش هقولكم 8 ركعات قيام...كفايا اتنين بس كل يوم قبل النوم...الله يكرمكم
وعلى فكرة الدعاء مش ف رمضان بس...ادعوا الله يكرمكم لنفسكم وللآهليكم وللمسلمين


عيد سعيد عليكم وربنا يعود علينا رمضان بالخير واليمن والبركات

Wednesday, October 3, 2007

يا جبار ..اجبر بخاطرنا

يارب اجبر بخاطرنا يارب واعتقنا الليله وبلغنا ليله القدر يارب
رمضان بيودعنا ..الحقوا يا جماعة العشرة الاواخر...تذللوا لله وادعوا ان ربنا يعتقنا جميعا من النار
اللهم انك عفو تحب العفو فأعفوا عنا...ياجبار يا رحيم اعفو عنا واجبر بخاطرنا وادخلنا الجنة بلا حساب ولا عذاب
--
-
اللهم انى اشكو اليك ضعف قوتى وقلة حيلتى وهوانى على الناس
انت رب العالمين
انت رب المستضعفين وانت ربى .. الى من تكلنى ..الى بعيد يتجهمنى
ام الى عدو ملكته امرى
ان لم يكن بك على غضب فلا ابالى
---
يارب ..عجبت لمن يعرفك كيف يخاف من عبادك وانت الجبار
ويارب ..عجبت لمن يعرفك كيف يخيف عبادك وانت الجبار
يا بخت من بات مظلوم ومباتش ظالم
مسكين الى مسمعش الحلقة دى ومعرفش المعنى دا
الى يحب يسمعها يعملها دون لود من اللينك دا

Friday, September 28, 2007

على باب الجنة

اغنيه أحمد فهمى تتر برنامج (مصطفى حسنى).... على باب الجنة
ناسينوا وعايشين من رزقه ونتنفس ف هواه.. يوم مانقابلو ا خايفين نبقى مش جاهزيين للقاه
مين هيعدى صراطه بسرعه ومين فينا هيستنى
لوفينا الخير يبقى هنتقابل على باب الجنه
-------
شايف نفسك واقف فين ..ابعد واحد شايفاه عين.. ولا عملت الى يخليك واقف جمب رسول الله
لو بتحبه وهو حبيبك ...ايده هتبقى يوميها ف ايدك وهتطمن مش هيسيبك ويدخلك الجنه معاه
--------
لوفينا الخير يبقى هنتقابل على باب الجنه
-----------
اضغط هنا لسماع الأغنية:
قناة اقرأ الساعة 4.20 قبل الفطار
ربنا يجعلنا جميعا من اهل الجنة

Tuesday, September 25, 2007

Happy Birthday


كل سنه وانا طيبه
السنة دى احلى عيد ميلاد ف حياتى
لانه اول مرة يجي ف رمضان
الحمد لله.. ويارب كل سنه يجى ف رمضان
ربنا يجعله عام سعيد عليا وعلى كل الناس وكله سعادة وهنا
يارب
...
متشكرة لكل الى افتكرونى وقالوا لى كل سنه وانتى طيبه
ومتشكرة للى تعبوا نفسهم وبعتوا لى كروت اول كارت الى شفتوة فوق ع الشمال اتبعت لى من ريهام ميرسى يا قمرة...وكمان قطتى فاطمة الزهراء كمان تعبت اوى وبعتت لى كارت من عمايلها متشكرة يا حبى
http://www.4shared.com/file/24987347/95766d55/AAAAA.htmlدا الكارت عسول اوى...متشكرة و ميرسى لزوقكاحلى حاجه ان فيه وردة حمرا....انا اصلى بموت ف الوردالله يكرمكم يا يارب
.نجاملكم ف الافراح ان شاء الله
----------
يالا حالا بالا بالا هنوا ابو الفصاد
هيكون عيد ميلادة الليله اسعد الاعياد
هنوا ابو الفصاد

Tuesday, September 18, 2007

اسألكم الدعاء


اللهم إني عبدك ابن عبدك ابن أمتك
ناصيتي بيدك ماضِ في حكمك
، عدل في قضاؤك أسالك بكل اسم هو لك
سميت به نفسك أو أنزلته في كتابك
، أو علمته أحداً من خلقك أو استأثرت به في علم الغيب عندك
أن تجعل القرآن ربيع قلبي
، ونور صدري وجلاء حزني وذهاب همي
.رواه أحمد
.اللهم إني أعوذ بك من الهم والخزن ، والعجز والكسل والبخل والجبن ، وضلع الدين وغلبة الرجال "
---
سيد الاستغفار
اللَّهُمَّ أَنْتَ رَبِّي ، لا إِلَه إِلاَّ أَنْتَ خَلَقْتَني وأَنَا عَبْدُكَ ، وأَنَا على عهْدِكَ ووعْدِكَ ما اسْتَطَعْتُ ، أَعُوذُ بِكَ مِنْ شَرِّ ما صنَعْتُ ، أَبوءُ لَكَ بِنِعْمتِكَ علَيَ ، وأَبُوءُ بذَنْبي فَاغْفِرْ لي ، فَإِنَّهُ لا يغْفِرُ الذُّنُوبِ إِلاَّ أَنْتَ . منْ قَالَهَا مِنَ النَّهَارِ مُوقِناً بِهَا ، فَمـاتَ مِنْ يوْمِهِ قَبْل أَنْ يُمْسِيَ ، فَهُو مِنْ أَهْلِ الجنَّةِ ، ومَنْ قَالَهَا مِنَ اللَّيْلِ وهُو مُوقِنٌ بها فَمَاتَ قَبل أَنْ يُصْبِح ، فهُو مِنْ أَهْلِ الجنَّةِ » رواه البخاري .

Tuesday, September 11, 2007

سارعواااااا...........لعلكم تتقون




كل عام وانتم بخير وصحه وسلامه ربنا يبلغنا رمضان
يارب
يارب
يارب
ويبلغنا ليلة القدر


Sunday, September 2, 2007

الازهر بارك


السلام عليكم

اذيكم يا كتاكيت... فينكم

يارب تكونوا كلكم بخيير وبصحه وسلامه

الاول كل سنه وانتوا طيببن بمناسبه قرب شهر رمضان

الحمد لله اننا عايشن لحد دلوقتى...ربنا يبلغنا رمضان ويعتقنا من النار يارب امييييين

ادعوا يا جماعه بذمه ف رمضان ... واوعوا تنسونى ف دعائكم

ربنا يسعد ايامكم جميعا

انا فرحانه اوى انهاردة ..انا كنت بوظب مكتبى ودولابى ..احتفالا برمضان

لانى مبوظبش مكتبى بالذات الا ف المواسم والاعياد السعيدة.هههه

المهم وانا بوظب مكتبى اتفرجت على صورى بتاعة الطفولة والجامعة وقريت كروت كتيييير كتبناها لبعض انا واصحابى ....كانت ايام جميلة.... اجمل ذكريات.... انا صحيح بكيت لما شفت الحاجات دى

بكاء... فرح على حزن على تمنى عودة الايام و الذكريات ... وانا بفتكر اجمل ايام حياتى ..وأقول للزمان ارجع يا زمان

الحمد لله

وعلى رأى اخ عزيز...دوام الحال من المحال ..لكل شىء نهايه

واد ايه كنا اطفال ...اطفال ف كل حاجة

مكناش شايلين هم الدنيا ومش عارفين هى مخبيه لنا ايه والمستقبل عامل اذاى...ربنا يكتب لنا كلنا مستقبل سعيد باهر كله سعادة وفرحة

انا مش زعلانه على اى حاجه مريت بيها ف حياتى سواء حلوة او وحشه
كله نصيبى ومكتوبلى اشوفه

انا عايشه علشان اتعلم.. بحاول قدر الامكان افتكر الحاجه الحلوة دايما واتعلم من الحاجه الوحشه... المهم انى مكررش غلطى
الحمد لله على كل شىء


يووووووووووووووة نسيت الموضوع المهم الى انا جايه اكتب عنه انهاردة وهو ان يوم الثلاثاء الماضى رحت انا و اخويا وريهام رفيقتى واختها وبنتين صحابهم.... رحنا الازهر بارك علشان نحتفل مع 300طفل من مرضى انيميا البحر المتوسط...اد ايه يا جماعه الاطفال دول محتاجين يفرحوا ويضحكوا ويحسوا ان فى حد بيحبهم ويلعب معاهم .

عارفين الاطفال دول محتاجين دم يتنقل لهم بأستمرار...والى عرفته ان البنت علشان تتبرع لازم مرة كل اربع شهور مش اكتر من مرة واحدة تخيلوا هما محتاجين كام بنى ادم يتبرع لهم بالشكل دا....ربنا يكون ف عونهم ويشفيهم يارب

ربنا يشفيهم يارب ويشفى كل مريض قادر يا كريم

انتوا عارفين .. انا اليوم دا كنت مخنوقه و مضايقة شوية من الدنيا وعمايلها...لكن عرفت ان انا ف نعمة ....واحسن منغيرى كتير والحمد لله على كل شىء
والحمد لله على نعمه الصحه .. وحاجات كتيرمبنحسش بيها غير لما بنشوفها بتتاخد مننا او بنشوف حد محروم منها
فعلا الى بيشوف هموم الناس بتهون عليه همومه

لو شفتوا الاطفال دول!؟!؟!... رغم مرضهم وعجزهم عن انهم يبقوا ذى الاطفال الى ف سنهم الا انهم متشبثين بالحياة وعارفين قيمتها وبيجروا يلعبوا بكل حب وفرحة

ف نهايه اليوم اتأكدت من حاجه مهمه اوى.... وهى ان الانسان ممكن يكون جواة حزن كبير لكن لما يحس انه اسعد انسان بأبسط شىء وهو البسمه ...و انك تضحك انسان وترسم البسمه على شفتيه...اد ايه بتنسى حزنك وتحس انت بفرحه وسعادة مضاعفه عن التى سببتها للى قدامك

وخصوصا لما يكون الانسان دا طفل برىء ملوش اى ذنب ف الحياة.. واتولد لقى نفسه مريض وعندة ابتلاء

احلى حاجه انهم روحهم حلوة ...عارفين لو الاطفال دول استسلموا لمرضهم وحزنهم كانوا انتهوا من زمان

لكن هما عندهم ايمان بالله وصبر ...تخيلوا عندهم ايمان بالله وصبر رغم صغر سنهم
..سبحان الله ...الناس بتبقى سليمه ويمرضوا نفسهم بالمشاكل.
الى يواجهه مشكله ويحس بيأس ...يفتكر الاطفال دول واذاى بيتعاملوا مع
حياتهم وهما عارفين انهم مرضى.....ومرض ملوش علاج..!!!ربنا يشفيهم
لكن مشكلتك ممكن يبقى لها حل...ولو ملهاش حل ممكن ننحيها جانبا ونكمل حياتنا عادى ونعتبرها كأنها عقبة او مطب وراح لحاله بس المهم نتعلم منه ونستفيد
ولو ذكرى بتألمنا منفتكرهاش اصلا ولا كأننا مرينا بيها...

ربنا يشفيهم ويشفى كل مريض ويلهمة الصبر والحياة
ربنا يشفينا جميعا من كل داء
سورى طولت عليكم...وسورى كمان لو فى اى اخطاء املائية..انتوا عارفين انى بكتب بالعامية
ربنا يسعدكم يارب ويديكم الصحه والعافيه ويبعد عنكم اى مشاكل او اى حزن
سلام مؤقت

Monday, August 27, 2007

اختيار شريك الحياة والسعادة الزوجيه

السلام عليكم
اذيكم يا رب تكونوا بخير وحشتونى
انا صحيح بقالى فترة مش بكتب كلام من عندى واواخر كتاباتى كانت منقوله عن ناس تانيه
دا لانى مش عندى اى استعداد انى اكتب اى شىء بس الحمد لله ان البوستات الى نشرتها كانت بتعبر عن جزء من الى عاوزة اقوله
ما علينا بلاش نتكلم ف الماضى وخلينا ف انهاردة
عموما انا كتبت انهاردة علشان لسبب او رساله عاوزة اوصلها لكم
انا كنت بلغت الناس عن دورة تنميه بشريه بعنوان( اختيار شريك الحياة - والنساء من الزهرة والرجال من المريخ --والسعادة الزوجيه) ..انا فعلا رحت وحضرت المحاضرات دى
وكنت ناويه اكتب لكم خلاصه الثلاث محاضرات الى حضرتها بس مش الفترة دى علشان كان نفسى اكتبها على رواقه ....بس انا مضطرة انى اكتب دلوقتى مش بس لاننا وعدنا ف نهايه المحاضرة اننا نبلغ العلم الى عرفناة دا وانها امانه علينا...وانا كتبت دلوقتى لان اخر محاضرة الى هتكون الرابعه ف المحاضرات دى هتكون يوم الجمعه الجايه يوم 31/8/2007 والمحاضرة دى فرى مجانيه لكل الى عاوز يحضرويجيب معاة الى هو عاوزة ويسمع خلاصه المحاضرات دى
علشان كدا انا كتبت دلوقتى عشان انقل لكم الكلام الى اتقال ف المحاضرات دى علشان تاخدوا فكرة عن الموضوع والى يهمه انه يجى ويستفيد الدعوة عامله يوم الجمعه( ف جمعيه رساله ميدان الحجاز مصر الجديدة خلف المطافى امام مسجد ابو زهرة) الساعه7م
انا حضرت انا واخويا سوا المحاضرات دى وكان نفسى كل اهلى واصحابى يكونوا حاضرين المحاضرات دى لانها فعلا مهمه وبتتكلم عن حياتنا ومستقبلنا واد ايه فى حاجات كتير احنا فاهمنها غلط وبسلامه نيه او بجهل بمعنى اصح ممكن ندمر حياتنا
لما تسمعوا الكلام الى هقوله هتصدقوا ان الحاجات دى بتحصل فعلا ف حياتنا واننا بنشوفها كتير بس مش فاهمين ليه وانها ممكن تدمر كتير من البيوت!!!!!
كان المحاضرين بالترتيب ا/صفا مصطفى و ا/وليد جلال وا/نهى عبد العزيز وقالوا الاتى
احنا لازم قبل ما نقدم على الزواج نسأل نفسنا احنا بنتجوز ليه؟؟؟؟الجواب اكيد عاوز مجلدات ...مش كدا....طيب احنا نقعد ونفكر؟!؟!؟!؟!؟
علشان الحياة تبقى سليمه ومتزنه لازم يكون عندى الاول اتزان عاطفى واتزان اسرى قبل الاقدام على الزواج
والرسول (ص)امر اهل العروسه ان يتلمسوا ف خاطب ابنتهم الدين والخلق
وامر اهل العريس ان يتلمسوا كتر من شىء ف المرأة منها جمالها ومالها وحسبها ونسبها فأذفر بذات الدين تربت يداك
هنا فى نقطه مشتركه وهى الدين
انا هبتدى بجزئيه حلوة ومهمه جدا من المحاضرة التانيه الى بتتكلم عن ان الرجال من المريخ والنساء من الزهرة
الرجل والمرأة مختلفين ف كل شىء والمحاضرات دى معموله علشان نعرف ايه هى الاختلافات دى واذاى نتكيف معاها ونتعامل معاها اذاى
طول ما الاتنين بيتعاملوا مع بعض على انهم مختلفين وان كل واحد له طباعه الحياة بتكون كويسه لكن لما بينسوا انهم من كوكبين مختلفين بتبدأالمشاكل تظهر
ومن المشاكل دى...الاختلاف ف تناول المشكلات... الراجل لما بيواجه مشكله بيحب ينعزل وياخد جنب ويفكر وبيدخل ف الكهف سواء كان الكهف دا جريدة او تلفزيزن او خروج او انعزال ف مكان....لكن المراة لا لما بتواجه مشكله بتحكى ومبتحبش تنعزل
وهنا الاتنين لازم يفهموا دا... متجيش بقى الناصحه تلاقى جوزها دخل الكهف تدخل وراة وتعالى هنا بقى.. قولى مالك ..وايه مضايقك.. واحكى.. وفضفض ..دا انا مراتك حبيبتك ......هى شايفه انها علشان بتحب تحكى وكدا هو كمان زيها....لكن لا متعمليش كدا لانه ممكن يذهق عليكى بدل ما تقولى له انت مبقتش تحكى انت مبقتش تحبنى طلقنى وطبعا دا مخنوق فيقوم مطلقها ...... اصبرى سيبيه وهو لما هيهدى هيجى لوحدة يحكى لك...ساعتها ورينا شطارتك كمستمعه جيدة
لكن الزوجه لما بتواجه مشكله بتحب تحكى والراجل طبعا مش فاضى يسمع لانه راجع من شغله تعبان وهى مش بتفهم دا وبتعتبر دا نوع من عدم الاهتمام والاهمال ....ودا بيعمل مشاكل كتيير اوى والحل :...ان هو معلش يحاول يسمعها ويديها فرصه تتكلم وميديهاش الحل على طول لانها مش بتبقى عاوزة تحكى لانها عايزة حل...لا هى عاوزة تحكى وتفضفض دا بيريحها انها حاسه ان جوزها بيسمهع ويفهم ويتفهم وياسلام لما يتعاطف مع كلامها كمان ببتحبه اكتر....لكن طبعا الزوج تعبان وعايز يخلص فيقوم مديها الحل علشان تسكت...تقوم هى تتضايق ..
دى كانت نقطه من نقط الاختلافات الظريفه مابين الاتنين واد ايه هيا مهمه وبتعمل مشاكل كتيييييييير
------------------------------------------------------------------
عاوزة اقول ارشادات ف موضوع الخطوبه واذاى تعرفى الانسان الى متقدم لك دا عندة اخلاق ولا لأ؟
اولا منحكمش على الى قدامنا من اول موقف ندى فرصه واتنين وتلاته ..ومش من اول موقف احكم على الشخص بأنه عصبى او بخيل اواو او.......
لازم ادى اكتر من فرصه ولو اتكررت كتير يبقى دى جزء من قيم الانسان دا او الانسانه دى ساعتها يشتغل جرس الانزار وساعتها هسأل نفسى هل هقدر اتأقلم مع الصفات دى واتعايش معاها ولا لأ.....؟؟.
لازم نعرف ان مفيش حد كامل واننا لازم نتقبل عيوب الاخر ..وكل انسان حسب استطاعته ..هو ممكن يتأقلم مع دا ولا لأ...؟
واننا لازم نتقبل اختلاف الاخر لاننا بنكمل بعض
بس لازم يكون فى حاجتين مهمين ف الاتنين : اهداف مشتركه -وقيم(اخلاق) مشتركه
تانى حاجه منركزش على السلبيات لان المخ بطبيعته لما بيركز على شىء واحد بيكبرة وبيشوفه اكبر من حجمه ومش بيشوف اى حاجه تانيه..

المعايير
الهدف:انت عايش ليه؟؟
عاوز تتجوز ليه؟؟؟؟؟
عاوز اعمل بيت كويس ....طب اذاى؟؟؟؟؟ .
انك تفهم الناس ذكاء ...انك تفهم نفسك حكمه

مش مهم الواقع ايه....المهم انت عاوز ايه

القيم:القيم بتتبنى ف الطفل من وهو ف بطن امه....بتكون عندة ف العقل الباطن الى هى بتمثل اخلاق الانسان دا
والحاجات الى ف العقل الباطن دى الى هى التلقائيات....الى بنكتشفها من غير ما تتقال صريحه من خلال المواقف والانفعالات
لا يكن احدكم امعه اذا احسن الناس احسن واذا اساء الناس اساء
المشورة:هل بيسمع ويأخد رأيك ولا لأ.. هل بيتأسف ولا لأ....الانسان السوى بيكون منفتح على اراء الاخرين ويسمع الى قدامه والقرار النهائى ليه
مينفعش حد يحل مشكلته من نظرته هو بس والى بيبقى داخل كادر الكاميرا
مبيشوفش حاجه لازم يخرج براها علشان يشوف الدنيا صح

هرجع تانى لكتاب المريخ والزهرة
بس بأختصار اد ايه المحاضرة دى بالذات كانت تحفه
انا هقول اللاختلافات بسرعه لانى طولت عليكم اوى والى عاوز يستفيض يجى يحضر المحاضرة يوم الجمعه
الاختلافات:اول حاجه ان فى اختلافات فى ترتيب الاولويات للحاجات
الرجل بيسعى للثقه والتتقدير والتقبل و التشجيع
المراة تسعى للاهتمام والرعايه والفهم والاحترام والافضليه
ولو كل واحد اعتقد انه لما هيقدم للى قدامه حاجه بيحبها وانه متوقع رد فعل من نفس النوع يبقى غلطان لان مش معنى انى بحب الشكولاته وبحب انسان ان بالضرورة الانسان دا هيحب الشكولاته !!!!لانى بحبها فلازم يحبها زيي
الاختلاف فى رد الفعل للضغوط...زى ما انا حكيت عن موضوع الكهف ف الاول
تانى نقطه لغه الحوار....المراة ممكن تلف وتدور علشان توصل لك فكرة او احساس لكن الراجل مختلف.... يعنى ممكن مثلا تقولك انت مبقتش تحبنى...معنى كدا انها بتقولك قولى انا بحبك ومقدرش استغنى عنك
لكن الراجل بقى مش بيفهم دا وتنقح عليه كرامته ويقول انها مش شايفه انا بعمل لها ايه....!! دى مش بتقدر....!! ويفكر ف انها بتقول كدا علشان مش عاوزانى ومش بتحبنى
الاختلاف ف تقديم المساعدة...بلاش تتطوعى وتقدمى النصيحه وتعملى فيها الواعظ الناصح لان الراجل مبيحبش كدا لما يسألك عن رأيك قولى غير كدا لأ
متبقوش راكبين العربيه وتقولى له اة دا الطريق من هنا فعلا ...لالالا ادخل من الشارع دا...كل دا بيسحب من حساب بنكك العاطفى عندة صحيح حاجالت بسيطه بس بتأثر
Emotional bank account

وف الاخر هقول استوصوا بالنساء خيرا...رفقأ بالقوارير
لا تؤزى المرأة زوجها الا قالت لها زوجته من الحور العين لا تؤزيه قاتلك الله
الاذى هنا خدى بالك ممكن يكون بكلمه ممكن تؤزيه

الكيس من دان نفسه وعمل لها بعد الموت ...والعاجز من اتبع نفسه هواها وتمنى على الله الامانى

ويقول العيب مش فيا ويشاور ان الغلط بعيد عنه


عش كريما ولا تصادم القدر
ماتمر الحياة الا كلمح البصر
افعل ما استطعت لن ترضى كل البشر
خيرك مع الناس يبقى ولو رحل القمر

Sunday, August 26, 2007

أعز الناس


على طول الحياة نقابل ناس ونعرف ناس
ونرتاح ويا ناس عن ناس
وبيدور الزمن بينا يغير لون ليالينا
وبنتوه بين الزحام والناس
ويمكن ننسى كل الناس
ولا ننسى حبايبنا .....أعز الناس حبايبنا
سنين وسنين تفوت
ولا ننسى حبايبنا
أعز الناس
اهداء لكل اصحابى الى بقالى سنين مشفتهمش

Wednesday, August 22, 2007

فاعتذروا لقلوبكم

قلوبكم مدينةٌ جميلةٌ نقيّة.. فحافظوا على نظافتها.. ولا تفتحوا أبوابها إلا لأولئك الذين .. يستحقون !! نعم..قلبكم الأبيض وطن ..وحلمكم الأخضر مدينة ..فنظفوا طرقاتها من آثار أقدامهم ..إذا شعرتم يوماً أو اكتشفتم أنهم لا يستحقون..ولا تصدقوا..مهما حاولوا إقناعكم أنّ في القلب غرفةً واحدةً فقط ! ..لا تستوعب سوى إنسانٍ واحدٍ يكون هو الحبَّ وهو الحلم وهو الحياة ..وأن هذا الانسان إذا ما فُجعنا يوماً برحيله توقفت ساعة الزمن عنده وتوقفت الدنيا بعده.. لاتصدقوا ..لأن في القلب غرفاً كثيرةً ..يقيم فيها الكثير من الناس الذين نلتقيهم وتجمعنا بهم الحياة في ظروفٍ مختلفة.. ونقاسمهم تفاصيل الحياة ثم يرحلون تاركين خلفهم أشياء كثيرة مختلفة ..
فالبعض منهم يترك خلفه وردة حمراء تفقد بريقها مع الوقت..والبعض يترك خلفه حلماً ناقص النمو يلفظ أنفاسه مع الوقت..والبعض منهم يترك جرحاً نازفاً لكنه يلتئم مع الوقت..وهنالك من يترك خلفه إحساساً بالندم نحتسيه فترة من العمر لكنه أيضاً يتلاشى مع مرور الوقت..
فهذه هي لعبة النسيان..تلك التي يمارسها الوقت معنا ونمارسها نحن على قلوبنا مرغمين..حين نشعر بأن الذكرى قد تعوق خطواتنا الثابتة نحو الحياة..ومع مرور الوقت نتقن اللعبة فنلعبها على أنفسنا فننسى ونتناسى ..
لكننا بالتأكيد حين نزور مدينة قلوبنا نلتقي الكثيرين من الناس الذين نحتفظ بهم في أعماقنا..والذين لم يتمكن غبار الوقت من إخفاء ملامحهم..فنصافحهم بشوقٍ ونحتويهم بحنين..ونتذكرهم بألم..
جميلٌ أن نحبهم إلى الأبد..لكن الأجمل أن يبادلوننا هذا الحب وإلى الأبد !كيلا يتحول إحساسنا الجميل تجاههم إلى نوع من العذاب..نمارسه على أنفسنا في الوقت الذي لا يشعرون فيه بنا..
فالألم العظيم هو أن تحب إنساناً لا يحبك..والألم الأعظم هو أن تحب إنساناً يحب سواك!لأن إحساسك الجميل يتحول مع الوقت إلى زنزانة مظلمة..تعيش فيها وحدك !وتحلم فيها وحدك !وقد تموت فيها وحدك !ولا يشعر بك.. إلا أنت ..
فاعتذروا لقلوبكم إذا أخطأتم يوماً الاختيار.. واحرصوا على أمنياتكم العذبة..فهذا الزمن يغتال الأحاسيس الجميلة ..ويفقدنا القدرة على الحب..وأشياء أخرى لا تستمر الحياة إلا بها..
فشكراً للقلوب التى أحبتنا وبرغم الحب لم تخلص لنا .. وشكرٌ أكبر.. للقلوب التي أخلصت لنا وبرغم الإخلاص لم تحبنا..
فأحياناً.. قد نشعر بها ولا نقولها..وأحياناً أخرى..قد نقولها ولا نشعر بها..
نكسر الحب حين يأتي قبل الأوان..ويكسرنا الحب.. حين يأتي بعد الأوان..
بالفعل إخواني وأخواتي ..يجب علينا تنظيف قلوبنا وتطهيرها من كل الأحقاد ..وألا نسمح لغير المستحقين فقط بدخولها
منقووووووول.

Thursday, August 16, 2007

الحلم الصغير

منقول
شعر جميل عجبنى ف بلوج



حلم جميل ببيت صغير....... فوق جزيرة عالمحيط هما اتنين بحلم واحد.......... وبيجمعهم الف خيط ننام ونصحى فى حضن الهوى...............لكن على صوت صراخها فى يوم صحيت............؟؟الزمن خطفها منى.... ولو عاديت الزمن ابقى عبيط ووقفت مكسور حزين.... و خبط راسى فى كل حيط هحكى حكايتى من البدايه ...من غير زواق ولا تظبيط اول كلمه بحبك سمعتها وزلزلتنى كلمه بحبك قلتها..سمعتها وسمعتنى ممكن تكون سمعتها قبلى بس هى فضلتنى كنا عايشين مع بعضنا....... فى الحلم بنصحى ونبات الفرحه دايما فى قلوبنا........... وحياتنا تبات ونبات لكن صحينا على الفراق.......... ماخلاص الحلم مات ماتت معاه الفرحه فى عيون الصغارماتت معاه الشمس فى قلب النهارحتى اللى مات واندفن صحى علشان يموت والكروان انكتم له الصوت والسما بكت فى سكوت ومات الحلم الجميل........ فى جنازة لاعظم تابوت وراح البيت الصغير....... وراحت معاه كل البيوت

منقول من بلوج الساحر

إن الناس في الغالب ينسون ما تقول، وفي الغالب ينسون ما تفعل، ولكنهم لن ينسوا أبداً الشعور الذي أصابهم من قِبلك. فهل ستجعلهم يشعرون بالسعادة أم غير ذلك. وليكن شعارنا جميعا وصية الله التي وردت في القرآن الكريم: "وقولوا للناس حسنا

Sunday, August 12, 2007

البعض نحبهم


البعض نحبهم
البعض نحبهم لكن لا نقترب منهم... فهم في البعد أحلى وهم في البعد أرقى... وهم في البعد أغلى
و البعض نحبهم ونسعى كي نقترب منهم ونتقاسم تفاصيل الحياة معهم ويؤلمنا الابتعاد عنهم ويصعب علينا تصور الحياة حين تخلو منهم
و البعض نحبهم ونتمنى أن نعيش حكاية جميله معهم ونفتعل الصدف لكي نلتقي بهمونختلق الأسباب كي نراهم ونعيش في الخيال أكثر من الواقع معهم
و البعض نحبهم لكن بيننا وبين أنفسنا فقط فنصمت برغم ألم الصمت فلا نجاهر بحبهم حتى لهم لان العوائق كثيرةوالعواقب مخيفه ومن الأفضل لنا ولهم أن تبقى الأبواب بينناوبينهم مغلقه
و البعض نحبهم فنملأ الأرض بحبهم ونحدث الدنيا عنهم ونثرثر بهم في كل الأوقات ونحتاج إلى وجودهم ....كالماء ....والهواءونختنق في غيابهم أو الابتعاد عنهم
و البعض نحبهم لأننا لا نجد سواهم وحاجتنا إلى الحب تدفعنا نحوهم فالأيام تمضيوالعمر ينقضيوالزمن لا يقف ويرعبنا بأن نبقى بلا رفيق
و البعض نحبهم لان مثلهم لا يستحق سوى الحب ولا نملك أمامهم سوى أن نحب فنتعلم منهم أشياء جميله ونرمم معهم أشياء كثيرة ونعيد طلاء الحياة من جديدونسعى صادقين كي نمنحهم بعض السعادة
و البعض نحبهم لكننا لا نجد صدى لهذا الحب فيقل وبهــم فننهار و ننكسرو نتخبط في حكايات فاشلة فلا نكرههم ولا ننساهم ولا نحب سواهم ونعود نبكيهم بعد كل محاوله فاشلة
إذا قررت يوما أن تترك حبيباً فلا تترك له جرحاً فمن اعطانا قلباً لايستحق ابداً منا ان نغرس فيه سهماً او نترك له لحظه الم تشقيه...وما أجمل أن تبقى بيننا لحظات الزمن الجميل...وإذا فرقت الايام بينكما فلا تتذكر لمن كنت تحب غير كل احساس صادق...ولاتتحدث عنه إلا بكل ماهو رائع ونبيل...فقد اعطاك قلباً...واعطيته عمراً وليس هناك اغلى من القلب والعمر في حياة الانسان...واذا جلست يوماً وحيداً تحاول ان تجمع حولك ظلال ايام جميلة عشتها مع من تحب، اترك بعيداً كل مشاعر الالم والوحشة التي فرقت بينكماحاول ان تجمع في دفاترك كل الكلمات الجميله التي سمعتها ممن تحب...وكل الكلمات الصادقة التي قلتها لمن تحب...واجعل في اي مجموعة من الصور الجميلة لهذا الانسان الذي سكن قلبك يوماً...ملامحه...وبريق عينيهالحزين...وابتسامته في لحظة صفاء...ووحشته في لحظه ضيق...والامل الذي كبر بينكما يوماً...وترعرع حتى وإن كان قد ذبل ومات
منقول

Friday, August 10, 2007

نكت

واحد بلدياتنا وقع من الدور العاشر .. جاله صداع


مره واحد أهبل قال والله العظيم ما هنام الا اما اخلص اللبانه

واحد ركب اتوبيس.. جاله الكمسرى بيقول له تذاكر ... قال له امين
شرطه..... سابه وراح للجانبه قال له: تذاكر ... قال له: أبراهيم شرطه


مرة واحد غبي حب يطور الطيارة الهليكوبتر فك المروحة وركب بدالها
تكييف


مرة واحد غبي ابنه قاله انا عاوز موبايل ابوه قاله موافق بس بشرط
تركب اخواتك معاك

واحد ماشى ورا وحدة قالها الحلوة وراها مشوار قالتلة لا وراها
حمار

مرة 3 تلاميذ اتأخروا عن الحصة الاولى ، و لما وصلوا المدرسة
قالتلهم انتوا كنتو فين؟ الأول قال أنا ضاع منى الخاتم بتاعى، الثانى قال وأنا كنت
بدور معاه، فسألت الثالث وأنت كنت فين؟ قلها كنت دايس عليه!!

توأم قال لأخوه انت كنت فين من الصبح يازفت. ماما حمتنى مرتين

مره واحده حامل ابنها الصغير بيسألها:ايه اللي في بطنك ده يا
ماما قالتله :ده أخوك يا حبيبي...تاني يوم و هوه في المدرسه المدرس سأله:انت عندك
اخوات؟ قاله:كان عندي واحد بس ماما أكلته.


مرة واحد عصبي اتجوز وحدة عصبية الدكتور جاى ينزل الولد قاله
اوعى ياعم انا نازل لوحدى

واحد مشغول اتجوز واحدة مشغولة خلفوا ...عيل مش فاضيلهم

مرة واحد بيسال مراته انتى بتحبينى اد ايه قالتله اد ما انت بتحبنى
قالها وليه كده انا عملتلك حاجه لاسمح الله


عريس بيقول لعروستة لازم تعرفي ان كلمتي في البيت زي الساعه بصتلو
بنظرت غضب...قالها يعني لا بتقدم ولا بتأخر

عريس مسطول على الآخر في يوم فرحه..بعد المعازيم مامشيوا دخل البيت
لقى العروسة قاعدة، قال والله انا كنت عارف في الهيصة دي هاينسوا حد!

سألو واحد بخيل طحن: تعمل ايه لو الدنيا برد؟ قال: أروح جنب
الدفاية. قالو: ولو الدنيا بردت أكتر؟ قال:أقرب من الدفاية. قالو: ولو بردت أكتر؟
قال: ألزق في الدفاية. قالو: طب ولو نزل تلج؟ قال: أشغل الدفاية بقى وأمري لله

واحد بخيل دخل على ولاده وقعد يزعق بصوت عالى علشان مشغلين المروحه
على 3 وهما 2 بس


واحد بخيل عندو ثلاث تفاحات فتح الاولى لقى فيها دود التانية فيها
دود وصل للثالثة طفا النور و أكلها


مرة واحد بخيل شقتة ولعت ادى للمطافى رنة

واحد مسطول راجع البيت كل مايحاول يفتح الباب يترنح ، ويترنح ابنه
بص له من الشباك وقال له بابا أحدف لك المفتاح أبوه قاله المفتاح معايا ياواد احدف
خرم الباب

محشش قطع رأس أخوه وهو نايم...وقعد يضحك ويقول: هيتجنن لما يصحى
الصبح وميلقهاش

مرة واحد سكران ماشي في الشارع لقى واحد عنده حسنة فوق عينه قالو
ياخي عين دي ولا غين

واحد مسطول ركب تاكسي فالسائق قال له ممكن تشوفلي الاشاره اليمين
شغاله ولا لا فطلع المسطول رأسه من الشباك قال للسواق شغاله مش شغاله، شغاله مش
شغاله، شغاله مش شغاله!!!


مرة واحد مسطول قابل واحد قاله الساعة كام قاله خمسة وخمسة فرد
عليه المسطول وقاله ما تعرفشى تقول عشرة وخلاص

مرة صرصار كان زهقان قال اّخد عودين كبريت وقال اما أخش أتزحلق فى
الفريزر


نكت منقوله من موقع مصراوى

السعادة رحله وليست محطه وصول

نعم
ليس كل ما يتمناة المرء يدركه
ربما تأتى الرياح بما لا تشتهى السفن
وكمان محدش بياخد كل حاجه
كل انسان له 24 قراط ف الدنيا بياخدهم والنا س كلهم ذى بعض ومحدش يفتكر ان فى حد احسن من حد
ال24 قراط متوزعين لكل انسان فى الى واخدهم كلهم ف صحته وفى الى واخدهم كلهم مال او جمال او مكانه اجتماعيه او حب الناس للانسان
وفى وفى وفى الى متوزع عندة ال24 قراط ف كل جانب بقسط
المهم مين يعرف كدا ويرضى
والله ما فى احلى من الرضا
ليه مفيش انسان سعيد على الارض......ليه الناس مهمومه كدا ومش حاسين بنعم ربنا عليهم
هو احنا مبنحسش دايما بقيمه الحاجه غير لما بتروح وتزول من وشنا لما نسخط ونغضب عليها
فين الرضا
عارفين الانسان دا غريب اوى.....لو الدنيا جت له كلها وبكل ما فيها من متع ف طبق من فضه او دهب حتى ...بردو مش هيبقى راضى
احنا عايشين ليه؟؟؟حد حاول يجاوب على السؤال دا قبل كدا
فى ناس عايشه كل همها المال والبحث عنه ف كل مكان وبكل الطرق والوسائل وناسيين ان محدش بياخد معاة حاجه
وان مش الفلوس الى بتخلى الانسان سعيد صحيح الفلوس مهمه واكيد لها دور ف السعادة
بس اكيد مش الدور الرئيسى
......ايه الى بيخلى الانسان سعيد
مش عارفه
كل انسان فى الى يسعدة...ولا زم يفكر اايه الى بيخليه سعيد
ويحاول يعمل الحاجه الى تحقق له السعادة
انا كنت قريت ميل اسمه لا توجد لحظه اسعد من الان
كل ما احس انى مش سعيدة بقرأ الميل دا
وبيفكرنى بكلمه قالها ابراهيم الفقى رائد التنميه البشريه ف مصر..حين قال عيش كل لحظه كأنها اخر لحظه ف حياتك عيش بالأمل عيش بالحب وقدر قيمه الحياة
---
احنا ليه بنحزن ....ليه بنحس اننا مخنوقين وان حياتنا مش على هوانا
عارفين ليه....اقولكم انا رأيي :ان الحمد لله على كل شىء وان دا من فضل ربنا علينا اننا بنحس بالحزن والزعل ...علشان لما تيجى علينا لحظه فرح ...نفرح من القلب ونحس بالفرق بين الاحساسين وان الفرحه والضحكه طالعه من القلب
بس
الفرحه بقت غاليه ومبقتش بالساهل
الضحكه و الفرحه الى من القلب مبقتش بردو بالساهل
كتير الواحد بيسامح وبيتنازل عن اشياء قد تكون مهمه ف حياته وكتير بردو محدش بيقدر
لازم نبتغى وجه الله ف كل الى بنعمله حتى لو حاجه بنعملها علشان نرضى انسان لازم يكون نيتنا رضا ربنا قبل الانسان لان مش بالضرورة الانسان بيرضى
....اسفه لو كلامى ضايقكم ...يمكن علشان انا مخنوقه شويه
وف الاخر عايزة اقول صحيح ليس كل ما يتمناة المرء يدركه...ولكن بردو مفيش لحظه اسعد من الان
وان السعادة دى مش محطه وصول كلنا نتمنى نروح ونوصل لها
لا السعادة دى طريق وكلنا ماشيين فيه ...بس مش كلنا بنحس بيه
وف الاخر مفيش احسن ولا اهدى من الحمد لله
الحمد لله عدد ماكان وعدد ما يكون وعدد الحركات والسكون