السلام عليكم
انا احب انقل لكم تجربه مريت بيها انهاردة وهى محاضرة او بمعنى اصح كورس تدريبى بعنوان مهارات التفاوض
Negotiation Skills Course.
وف البدايه عايزة اشكر اخويا الى صحى من النوم بدرى علشان يوصلنى المحاضرة ويتطمن عليا. دى شهامه اشكره عليها
ثانيا اشكر فريق وجروب
ITDA للتنميه البشريه
وبألاخص الاخت العزيزة المحاضرة رشا . كل الى اقدر اقوله جزاك الله كل الخير وبصراحه انا كنت مرهقه جدا وتعبانه ومكنتش ناويه اكمل المحاضرة واروح ع المكتبه بدرى وانا لسه بصحتى.. بس الحقيقه اسلوبك وروحك الحلوة خلتنى اكمل المحاضرة للاخر وكنت ف مود حلو اوى وانا ف وسط ناس جديدة عليا اول مرة اشوفهم وكنا بنتكلم بكل صراحه وكأننا اصحاب من زمان وكل واحدة فينا بتقول رأيها ونرد على بعض ف جو نقاشى جميل جدا كنت محتاجاه من زمان اوى
عارفه يا رشا انا حسيت انى خرجت من المحاضره انهاردة انسانه تانيه وربنا يوفقك ويسعد ايامك يارب ..امييييين
ثالثا احب اشكر البنات الى اتعرفت عليهم انهاردة واتمنى انها تبقى صداقه تدوم ع الخير بإذن الله وانا محستش انى معرفكمش بالعكس انا كنت حاسه انى ف وسط عيلتى بقول الى انا عايزاة و على طبيعتى
انا طولت عليكم بس كان لازم انقل مشاعرى ليكم علشان تحسوا معايا الموقف
المحاضرة انا استفد منها حاجات كتير اوى احب انى الخصها لكم علشان تعم الفائدة يارب يكون اسلوبى سهل وتفهموه
اولا رشا قالت لنا حاجه مهمه اوى ف البدايه هى ان الانسان مبيوصلش لأكتر من الى هو بيحلم بيه وعلشان كدة لازم تكون احلامنا كبيرة ونتطلع لامال كبيرة علشان مع المحاوله والاصرار نوصل بالقرب من الهدف على الاقل
اولا ايه هو التفاوض؟؟؟ومعناه ايه؟؟؟ التفاوض دة عباره عن اتصال وعلاقه بين شخصين او اكثر وحوار من اجل تحقيق كلا الطرفين لاهدافهم من خلال تحقيق اقصى استفاده ممكنه والرضاء كلا الطرفين
والتفاوض دة بيحصل لنا كلنا ف حياتنا اليوميه مع سواق التاكس وف البيع والشراء ف السوبر ماركت وف البيت مع بابا وماما واخواتنا
وف شغلنا ومع زملائنا ف العمل
Everything is negotiable...Every one is a negotiator
طب اذاى اتفاوض مع الاخرو يكون فيه اقصى استفادة للطرفين ورضا ومكسب ف نفس الوقت
اولا لازم نتبع مبدأ
Win-Win
يعنى انا اكسب والطرف الاخر بردو يكون كسبان او على الاقل مش خسران وزعلان
علشان يكون فى تفاوض اكيد هتلاقى ان فى خطوط مشتركه بينك وبين الاخر او نقطه وسط عند هذة النقطه يتم تحقيق الرضا لدى الطرفين وهنا تكون اقصى استفادة للطرفين مع وجود عنصر الرضى وكذلك وجدود علاقه شخصيه مع الاخر
طب اذاى اكون مفاوض ناجح ؟؟؟؟
اولا لازم تكون مستمع جيد تسمع للاخر وتعرف بيفكر ف ايه واذاى علشان تقدر تتكلم وانت عارف الاخر وايه الى يرضيه
ثانيا لابد من وجود لحظات للصمت لك وللاخر
ثالثا اكتب ملاحظاتك واهدافك والانفو الى بتلاقيها ف طريق تفاوضك مع الاخر
عدم الانزعاج من حدوث اى صراع او هجوم او خلاف مع الاخر بل احرص على بقاء العلاقات طيبه حتى فى حاله فشل عمليه التفاوض
رابعا:لابد انت تعرف ان الصبر ف التفاوض مهم جدا وعدم اظهار الرغبه الشديدة فى احتياجك لما تتفاوض عليه ختى لا تكون فريسه ف يد الاخر
خامسأ: عليك عدم التسليم بسرعه مع الضغط من قبل الطرف التانى
وف النهايه اهم شىء نحاول تحقيقه هو
win -win NOT win -lose
