Saturday, January 26, 2008

الذكريات تطردنى



السلام عليكم
اذيكم عاملين ايه وحشتونى
اسفه على التأخير عليكم بس ضغط شغل اعمل ايه... الحمد لله
انا مقدرش ابعد عنكم ابدا ولا عن البلوج لانى فعلا بلاقى نفسى فيه وبحس انى سعيدة فعلا وانا بكتب وبقول كل الى ف نفسى
انا حابه احكيلكم عن يومى انهاردة
انا رحت الشغل الساعه 9 الصبح وخلصت الساعه 3 المهم الجو انهاردة مطرة والحياة مبلوله خالص
المهم كان عندى درس قراّن الساعه 3 رحت الدار ملقتش حد راح لان الدنيا كانت مطرة قلت الحمد لله علشان اتكى على الحفظ اكتر
رجعت البيت ورنيت على ماما الجرس من تحت البيت علشان اقولها عايزة حاجه اشتريهالك من برة؟؟
المهم قالت لى ايوة ولاقيت لستة الطلبات اتحدفت لى من فوق ... المهم رحت واتمشيت وانا بجيب الحاجه والشوارع فاضيه وكنت حاسه انى ملكة زمانى .. مفيش حس خالص والناس كلها مستخبيه ف بيوتها من المطرة ..بس بصراحه الجو كان روش وتحفه اوى انا فضلت اتمشى واتمشى وحاسه انى خفيفه اوى وطايرة ف الهواء ومبسوطه اوى من الجو ومن الهدوء ومن الفضا ... بجد كنت حاسه انى ماسكه النجوم بإيدى
يوووووة نسيت كنت جايه اقولكم ايه انهاردة كنت جايه اللخص لكم الكتاب التانى
يارب يكون عجبكم الكتاب الى فات وبصراحه كان احلى من الكتاب دا "الذكريات تطاردنى"دا اسم الكتاب..بصراحه انا جبت لكم منه مقتتطفات استوقفتنى رغم انه ككل مش عجبنى اوى...
انا جاتلى ردود من ناس على الميل ان لما بلخص كتاب بتكلم فيه على لسان الكاتب ومش بقول رأيي فيه... دا حقيقى فعلا انا لما بقول كلام الكاتب الى ف الكتاب انا بكتب الكلام الى فعلا حاسه انى مقتنعه بيه علشان كدا مش بقول انى مع الرأى دا او لأ ولو بختلف ف نقطه معينه مش هكتبها اصلا ولو حسيت انها مفيدة ليكم هقولها حتى لو مش مقتنعه بيها وهقول رأيي فيها ايه وبختلف ف ايه مع الرأى دا
عموما الكلام الجاى دا هو بعض الجمل الى عجبتنى ف الكتاب التانى ويارب تعجبكم وتفيدكم:

اجعل قيادة قلبك بين يديك ولا تتنازل عنها ابدا....ردد لنفسك ان من يستطيع الابتعاد عنى لا يتسحق منى ان امنحه لحظه واحدة من عمرى ولو بالتفكير
من الجميل ان تحرص على عدم تكرار التجربه السيئه التى مررت بها، ولكن مع ضرورة الحذر من المبالغه في الخوف، حتى لا يمنعك من السعادة في حياتك فقد قيل عن حق ان الخوف هو اسوأ مستشار للأنسان ويفضل طردة فورا واستبداله بالحذر المعقول
من لم يتفقد النقصان فى نفسه فهو في نقصان ومن يتعامل مع الحياة على انه كامل يخسر بشدة واثبتت الحقائق العلميه انه لا يوجد شئ يستمر على حاله، ولابد أن يتغير إما الى زيادة أو الى نقصان
العجوز الحقيقى هو من يكتفى بما حصل عليه في الحياة ولا يقاتل لزيادة نصيبه من الوعى والنضج والنجاح والسعادة
من يتذكر الله سبحانه وتعالى سيفوز بتذكر الله له ، وفي ذلك الفوز العظيم......"احفظ الله يحفظك"
الاذكياء هم الذين يربتون علي انفسهم بحنان وحب واحترام عند وقوعهم فس اى خطأ ليس للتقليل منه او الاستهانه به ، وانما للمساعدة فى تقليص توابعة لأقل درجة ومواصلة الحياة بثقة وثبات
تذكر دائما انه لايوجد انسان يحظى بالقبول الدائم و يفوز بكل ما يريد فى تعاملاته الانسانيه وانه من الطبيعى ان نختلف مع من نتعامل معهم، ايضا الانسان الذكى هو الذى يفرح بما لديه ويحاول زيادة نصيبه منها عن طريق المواجهه الذكيه لما يكره وليس عن طريق الهروب الى عالم الخيال لانه يضاعف من معاناته في الحياة بلا ايه فوائد...بصراحه انا شايفه ان الخيال له فايدة وفايدة كبيرة كمان وبتخيل كمان ان الى عايز يعمل حاجه ويخطط لها وعايز يحققها ...لازم يحلم بيها ويتخيلها الاول...وشايفه ان دا بيساعد على تحقيق الهدف
ان ما لا يدرك كله لا يترك كله
التراجع فى بدايه الاعجاب يكون اسهل بمراحل كبيرة منه بعد الارتباط العاطفى
الحياة مهما طالت قصيرة ، وليس من الذكاء إهدار أى ثانية منها مع اناس لا يعطوننا ما نستحقه من الاحترام

لابد من التفرقه بين الحب والاعجاب ، فالاول لا يأتى الا بعد تعاريف حقيقى وتفاهم متبادل ومعرفه عيوب الاخر وعدم الاقتصار على رؤيه مزاياه ، اما الاعجاب فهو احساس يغلب عليه الانبهار بصفة من صفات الاخر ، مما يحول دون النظر بموضوعية الى بقية الصفات وهو ما يوقع الانسان فى توهم الحب وقد يساعد على ذلك وجود إحساس بالفراغ العاطفى او رغبة في التخلص من ذكريات حب فاشل واستبدالها بحب اخر
تذكروا دائما ان الحب الناضج هو الحب المتبادل بين طرفين يحرص كل منهما علىاسعاد الاخر ، اما الحب المريض فهو الذى يتعذب فيه طرف من هجر الطرف الاخر له.
اسفه انى طولت عليكم ...واسفه لو الكلام جامد عليكم ..انا الى فعلا قلبى وجعنى لما قريت الكلام دا تانى وانا بكتبه دلوقتى ...ومكنتش هكتب ملخص الكتاب دا ليكم الا انى وعدتكم انى اكتب لكم ملخصه
عموما يارب يفيدكم وربنا يكتب لكم كل خير ويسعد ايامكم قادر يا كريم ومتشوفوش يوم وحش ابدا
سلام