السلام عليكم
اذيكم...خدوا اللينك دا الاول...هايل جدا
محاضرات الدكتور ابراهيم الفقي المدرب العالمي
ايه الاخبار معاكم يارب تكونوا بخير
انهاردة خرجت مع مى صاحبتى الدكتورة ..ادعوا لها هى وريهام الى ف طب بردو .. ربنا يكرمهم ويوفقهم يارب ويبقوا احسن دكاترة ف مصر يارب
المهم انا مش هقولكم عن مغامراتى انا ومى وحجم التدمير الى بيحصل ف الاماكن الى بنروحها..انا بهذر طبعا
بس هقولكم انى كلمتها الصبح قلت لها يالا نخرج قالت لى ماشى بس خدى بالك مش هناكل حاجه برة
قلت لها اوك اتفرجى عليا وبلاش تاكلى .... عادى جدا....على فكرة هى كلت معايا...هههههههه
خرجنا ورحنا نتمشى ع الكورنيش واحنا ماشيين لاقينا زحمه وناس كتير عند جامع ناصر الى ف الكورنيش
المهم بقول لمى ايه الزحمه دى ما تيجى نروح نتطفل.. دا اكيد كتب كتاب
قالت لى ايوة يالا بينا نروح...بقولها يا بنتى بهذر.. نروح فين احنا منعرفش حد
قالت لى يمكن نروح نلاقى حد نعرفه...وشدتنى ودخلنا
واول ما قربنا من الناس لاقيت انسانه غاليه عندى اوى وهى( مدام مستورة) من متدربين موظفى البريد الدورة الى فاتت ...واد ايه الانسانه دى بحبها وبرتاح لها وهى كمان بتحبنى اوى
المهم سابت زوجها وجت تتمشى معايا انا ومى وراحت تزور قرايبها ف اخر الكورنيش واتمشت معانا وجابت لنا ايس كريم ووقفنا على الكورنيش
----
شوفتوا النصيب...سبحان الله
شوفوا انا كنت بعاند مع مى وبقولها يا بنتى بلاش نروح احنا منعرفش حد..سبحانه.
عسى ان تكرهوا شيئا وهو خير لكم وعسى ان تحبوا شيئا وهو شر لكم
والله يعلم وانتم لا تعلمون
----
المهم روحنا ناكل ف مطعم اول مرة ندخله... هو انا سمعت عنه قبل كدا بس ياريتنى ما روحت
البيتزا طلعت محروقه والراجل بقالو ساعه بيطبخ فيها وف الاخر عماله اشبه عليها.. اشبه عليها
اتاريها شبه رغيف العيش بعد ما صغر وبقى لقمة
بمناسبة رغيف العيش صحيح احب اشكر المسؤلين عن رغيف العيش انه بقى على اد احتياج المواطن المصرى
انا واحدة من الناس احب لما اكل حاجه اخلصها ومفوضش شىء..وكان الرغيف الاول كبير اوى وكنت باكل نصف رغيف دايما واسيب الباقى
لكن دلوقتى... باكل رغيف واتنين كمان..
والحمد لله بقوم شبعانه
لانه بقى شبه البيتزا الى جبناها انهاردة
----
نسيت اقولكم على موقف عسل اوى واحنا ماشيين مى ضاعت منها التوكه الى ف الشوز بتاعها...وزعلت اوى ورجعنا نمشى ف نفس الطريق الى جينا منه علشان نلاقيها مقلكوش مى كانت هتفطس لو ملقتش التوكه لان معنى كدا انها يا هتشيل التوكه الى ف الفردة التانيه او هترمى الجزمه
المهم طول ما هى ماشيه تقول يارب
اللهم رب الضاله رد إلي ضالتى
المهم واحنا ماشيين عماله اخض فيها واقولها هى دى يا مى؟!؟!؟! ...والبنت تترعب
المهم
ف الاخر لاقيناها الحمد لله
كانت هتكئبنى طول الطريق لو مكناش لاقيناها...الحمد لله...كان ممكن متاكلش كمان
...هى كلت فرحاً بعودة التوكه ...هههههه
المهم مى بعد ما لاقتها قعدت تقولى اوعى يا هبه تكتبى الكلام دا ف البلوج.... قلت لها انتى بتقولى ايه يا مى سرك ف بير
اكيد اول ما اروح بيتنا كل شىء هيتنشر على الصفحات الالكترونيه ...انت بتشتمينى ولا ايه؟!؟!؟
----
انا بخرج مع صحبات كتير ...بس معظم الخروجات الى بتكلم عنها ف البلوج بتكون مى فيها معايا...مش عارفه ليه
بس جايز علشان بتبقى كلها مواقف مضحكة ومغامرات
الحمد لله
ربنا يسعد ايامكم ويكتب لكم كل خير يارب
والبسمه ما تفارق وجوهكم ابدا
اوعوا تشيلوا هم حاجه ابدا
اللهم دبر لنا فإننا لا نحسن التدبير
خدوا بالكم من نفسكم
سلام مؤقت
وخدوا اللينك دا كمان ربنا يجعله ف ميزان حسناتكم
الى بيشتغل كتير ع الكمبيوتر ممكن يشغل اذاعه القرآن الكريم وهو قاعد ياخد حسنات
