حصاد الصبر

اذيكم اتمنى يكون كل انسان على وجه الارض اعرفه ويعرفنى يكون بخير وكل صحه وسلامه
عايزة احكيلكم ما دار فى يومى انهاردة انا كنت نايمه قليل وكنت مسافره القاهرة علشان ارجع الكتب للمكتبه وبابا نزلنى عند المترو ولانى بقالى كتير مسافرتش مصر لاقيت حاجات كتير اتغيرت مش عارفه ليه كنت حاسه انى غريبه وانى اول مرة اروح المكان دة رغم ان كل الاماكن الى عديت عليها كتير مشيت فيها ...المهم
حتى المترو ايام الجامعه كان عليه اعلان واحد وف اكتر من عربه لكن اكتشفت ان الوضوع انتشر اوى...ماعلينا المهم
وانا ف المترو افتكرت اصحابى رفاق الكليه والمترو وافتكرت ايامنا الحلوة وحسيت ان المترو كان واحشنى اوى وانا مش واخدة بالى ومرت قدام عينى ذكرايات اربع سنين من اجمل ايام عمرى وحياتى وافتكرت انطلاقنا ف مترو السيدات وايام الامتحانات والمواقف كلها كانت كشريط سينيمائى بيتعرض قدام عينى
المهم خلصت المترو ورحت المكتبه ونقيت كام كتاب وقعدت اقرأ .وشفت الى رايحه المكتبه تجيب كتب عن الطبيخ وشكلها بيقول انها حديثه الزواج ...والى قاعدين يرسموا ولوحاتهم كلها فن وجمال...ولاقيت ولد سنه يتراوح بين ال18-20تقريبا وكان مبهدل شويه وشكله ابن ارياف لكن شكله مكافح وكان قاعد يقرأ وحاطط كتب جامبه كتير لدرجه انه مستخبى فيهم المهم بصيت ف الكتب من بعيد لاقيتهم كلهم كتب انجليزى....سبحان الله حسيت ان ظروفه صعبه وغير ميسور ماديا ولكنه رغم ذلك مجتهد ولديه هدف ..كان ذلك استنباط دون ان يرانى وانا استكشفه هكذا....لكنى تعلمت منه العزيمه وان الانسان اذا اراد شيئا وعزم فسيصل بعون الله بغض النظر عن اى عقبات...ماعلينا المهم انا كنت قاعدة بجانب الاستاند الذى يحتوى كتب الاب الروحى بالنسبه لى ...عبد الوهاب مطاوع وكان على الاستاند 10 كتب له وانا قاعدة سرحانه ف كل شىء حواليا وشايفه كتب عبد الوهاب مطاوع الناس عماله تيجى وتاخدها من قدامى ...وقلت ف نفسى انا مش هاخد غير الكتاب الى ربنا كتبه ليا....المهم فضل ف الاخر كتابين....تخيلوا الى اخدته اسمه ايه؟؟؟؟
(حصاد الصبر)
ابتسمت للكتاب وقلت له اهلا بنصيبى واخدته وانا ف قمه الرضا
المهم انا فكرت كتير اوى انهاردة لانى كنت طول المشوار لوحدى فكنت بفكر ف كل لحظه وف اكتر من موضوع...هو دة الى انا بسميه ان الواحد يقعد مع نفسه ويفكر ويتفكر ف نفسه وف الناس وف الكون وف قدرة ربنا
وف النهايه اقول
الحمد لله

سبحان الله

قبل ان نأكل البرتقاله اكتشف ابى انها مكتوب عليها اسم الله الاعظم وف الجانب الاخر مكتوب احمد الله

............................ ومحمد

سبحان الله الخالق سبحانه

الحياة تخطيط

إذا اقبلت على الله، اقتربت منك الدنيا أما إذا أقبلت على الدنيا وابتعدت عن الله فلن تنال الدنيا ولن تظفر برضا الله.
لا تيأس وواجه الحقيقه..مهما كانت الظروف...جوردن.
إننا نتشكل تبعا لما نحب...جوته
ماتكسبه من حب يعادل ما تبذله من ود....لينون وماكرتنى.
تعلم الصبر،إنه سر الطبيعه.
ابتسم للحياه لكى تعيش طويلاً......سكوتش
السعادة هى حاله الوعى الناجمه عن تحقيق المرء لقيمه.
الحب خيمه تؤسسها الطبيعه ويزينها الخيال............فولتير.
عندما ادرك سر الاشياء سأكف عن التعجب........ليتون مارتنى.
اعرف نفسك.....فروم بلترش.
لاتدع الفرصه تفلت من يديك،فلن تدرك قيمتها الا عندما تضيع منك....ميتشل
القلق والاستياء من ضرورات التقدم......إديسون
هذا العالم هو عالم الاقوياء.....إيميرسون.
قل لى ماذا تأكل اقل لك من انت.....سافارين.
مهما كنت متشائما فمن الصعوبه ان تظل دائما أسيرا لهذة الحاله....توملين
اذا لم تكن قادر على مواصله الطريق حتى النهايه فأحرى بك الا تبدأه....ايد نورتون.
التعميم هو شعار الحمقى....ويليام بلاك.
بعد كل شىء ..ماهى الواقعيه فى كل الاحوال..؟ غير مجموعه خبرات......جون واجنر.
إن التغييرات التى يشهدها العالم يجب الا تدفعك للبكاء ولكن لو ظل العالم على حاله مستقرا بلا تغيير لحق لك الانين.
عندما يتحتم عليك اختيار ولا تقوم به؟فإن ذلك فى حد ذاته يعد اختيارا.
سر النجاح هو اتساق الغرض
إن شعبا يقدم امتيازاته على مبادئه سرعان ما يخسر الاثنين معا.
إن الهدف الاسمى لوجودنا ف هذا العالم هو ان نغرس فى انفسنا الارادة.
ليس الامر اننى أخاف الموت غير انى أود الا اكون حيا عندما يداهمنى....اّلن.
إذا لم يكن لى خير فى نفسى فمن يمنحنى الخير ؟ واذا كنت أؤثر نفسى فقط فمن انا إذا؟ وإذا لم أفعل الان ، فمتى؟.....هيليل

دة ملخص كتاب الحياة تخطيط

لدكتور ريك كير تشنر ودكتور ريك برينكمان

ليه كدة

ربنا يكرم بنات المسلمين ايه الى حصل هى البنات مبقتش بتتكسف ولا ايه

انا كنت بسمع برنامج ف الاف ام ولاول مرة اكتشف ان الموضوع ذاد اوى مش ممكن البجاحه دى ابدا

بس بصراحه ومن غير زعل

انتِ احسن لك تحبى على روحك بدل الفضايح دى

البرنامج كان ف فترة كويس ومش خارج ابدا والمذيع كانت نصايحه حلوة ..

.لكن معرفش ف الفترة الاخيرة البنات ايه الى حصلها مبقاش يشغلهم غير الحب

والكلام الفارغ دة .....لالالالالا اعتقد ان الحب مش كدة ابدا

هو دة علشان يمكن فاضيين ولا علشان ايه..ربنا يهدى

والغريب ان البرنامج دة مفيش ولا ولد بيتصل يقول انا متبهدل وبحب وهى مش معبرانى

يعنى من الاخر البنت بتحب على روحها والى بتحبه

مش حاسس بيها ومش متبهدل ذيها يبقى ليه تعملى ف روحك كدة من الاول

الى عايزك هيدور عليكى وهيعمل كل شىء يرضيكى.. خلكى عزيزة ومكرمه وبلاش تهينى نفسك. كل دة حب حرام

وخليكى دايما مكرمه ذى ما الاسلام كرمك

NO COMMENT

احيانا تتمخض نوايانا الحسنه عن أفعال عبقريه واحيانا تتمخض عن غير ذلك
داستين هوفمان

وقفه للسنه الجديدة

بسم الله الرحمن الرحيم

دايما بتكون الوقفه قبل العيد بس ان ادعوكم لوقفه من نوع خاص قبل السنه الجديدة

وقفه مع النفس

انهاردة اول يوم ف السنه الجديدة سنه 2007 ربنا يسعد ايامكم جميعا

انا عندى اقتراح يارب ينال اعجابكم وهو: اولا نجيب ورقه وقلم ونكتب ونكتب ....هنعمل وقفه مع النفس ..بمعنى اننا نفكر ايه الى حصل ف السنه الى خلصت وايه كان حلوفيها وايه كان وحش ونحمد ربنا على الحلو والوحش

ثانيا الاحداث التى كان لنا دخل فيها نفكر فيها شويه انا حاسه انها عدت بسرعه اوى ومحستش بيها رغم انها مليانه بالاحداث ...المهم عايزين نفكر فيها وف احداثها علشان لما نكتشف اننا غلط ف حاجه نصلحها ومنفضلش عايشين عمرنا كله فى حاجه غلط... لازم نقف وقفه حازمه ونفكر ونفكر........ نفكر ف علاقتنا مع ربنا ومع اهلينا ومع اصحابنا واصحابنا نفسهم عاملين ايه ..المرء على دين خليله فلينظر احدكم من يخالل... لا وكمان يحشر المرء مع من احب فياريت نفكر شويه ويكون كل الاصحاب بيحبوا بعض ف الله مش لسبب او لمصلحه

اخر واهم حاجه علاقنا مع نفسنا وحقها علينا ..ان لنفسك عليك حق

بعنى الى مقصر ف حق نفسه لازم يهتم بيها شويه ولو مزعلها لازم يصالحها ف 2007

وف الاخر عايزة اعرف ايه هى امنياتكم لسنه 2007 وتتمنوا يكون فيها ايه ولو ف الخيال؟؟؟؟؟؟

انا بصراحه متفائله جدا وحاسه انها هتكون فيها تغيرات كتيير اوى بالنسبه لى وعندى احساس كمان انها هتكون احلى سنه ف حياتى قولوا امييييييييييييييين (كله احساس يارب يتحقق

وكمان انا نفسى تكون سنه الناس كلهم فيها سعيدة وبيحبوا بعض ونفسى كمان تكون سنه كل الناس يعيشوا فيها بالاتقان ف كل حاجه صدقونى هتفرق كتير وكمان نفسى تكون شوارع مصر من انظف الشوارع ف العالم

ومفيش بطاله ولا اطفال شوارع ضحايا والاسعار تبقى معقوله والناس تتمنى انها تعيش ف مصر مش ف حته تانيه

ونفسى كمان الناس تبقى ماشيه ف الشارع كلهم تفاؤل وحيويه واقبال ع الحياه

اتمنى لكم 2007 جميله وحياة اسعد من العمر الى فات كله

وكل عام وانتم بخير

ف انتظار ردكم وخيالاتكم

وشكرا للقارئ