السلام عليكم
وحشتونى اوى اوى
النت عندى حالته صعبه كل شويه السلك يتأرج وبردو بيتهز ويعلق
ربنا ينفخ ف صورته ويصلح له حالو لحد ما اخلص كتابه البوست دا
متشنكرة اوى ليكم كلكم وشكرا لكل الى سألوا عليا وكانوا مضايقين لأختفائى وكانوا مفتقدينى
كلكم واحشنى بلا استثناء
مكدبش عليكم
والله هو زوجى جاب لى النت ف البيت بس بردو مش بقعد كتير على الكمبيوتر لانى بخاف اقصر ف حق بيتى وزوجى
او انى اتشغل بالنت عن واجباتى الزوجيه الى مبتخلصش
الموضوع كبييييييييييييير اوى يا جماعه
فعلا مسؤليه كبيرة اوى
كل شويه تلاقى مسئوليه جديدة بتظهر ...انا كنت متخيله ان الجواز حياة كلها فسح وخروج وكلام حلو
الحياة الحقيقيه غير كدا خالص
ف الاول طبعا بيبقى فى اختلاف بين الشخصيتين حتى لو عرفوا بعض كويس ف فترة الخطوبه
الحياة الحقيقيه غير الساعتين الى بنشوف بعض فيهم ف الخطوبه
بعد الجواز بتلاقى حد قدامك وانت قدامه اربعه وعشرين ساعه
الحياة مختلفه خالص
طباع غير الطباع
ان الانسشان يتأقلم بياخد وقت طويل
انا مكدبش عليكم
انا قعدت لى فترة مكنتش بعرف انام من تغيير المكان قعدت تقريبا شهر وشويه مش بيجيلى نوم ونومى متقطع
كل حاجه جديدة وحياة جديدة وشخص جديد واهل غير الاهل
كل دا يخلى الانسان مينامش فعلا
بس الحمد لله اهو الواحد اتأقلم وبيتأقلم شويه شويه على الحياة الجديدة
والله المستعان
اوصى كل البنات بالطبيخ
لازم تكونوا بريمو
انا بعرف اطبخ بس مش بريمو
وبدأت اتعلم واحدة واحدة
وادينى بعافر واكافح واحارب ف المطبخ
كل يوم اطبخ يعنى مش عايزة اقولكم حاجه تزهق
كتير قالوا لى اعملى الاكل على يومين
بس انا بحب الاكل يكون طازة
بس الظاهر انه هيطلع على نفوخى
انا صحيح رجعت الشغل ودلوقتى بدى كورس فوتوشوب ف السنتر الى بشتغل فيه
والله المستعان
والحمد لله رجعت درس القرآن بفضل الله وربنا يعنى ويقدرنى ومسيبوش تانى
كفايا كدا عليكم انهاردة
بكرة اكمل لكم باقى مغامراتى مع المطبخ
حبى التانى وقلبى الجوانى
وسلاموز مؤقت
