كل لبيبُ بالاشارة يفهمُ

السلام عليكم

اذيكم كلكم يارب تكونوا بخير

هو ليه الانسان بيحس ف ظل الظروف الصعبه الى احنا عايشينها انه مش هيقدر على مواجهه الحياة والمواقف والمصاعب .رغم ان الانسان نفسه لو مستسلمش ليأسه ولتفكيرة السلبى وفكر ف انه يقدر يقاوم ويواجه ويحقق .ساعتها الاحساس السلبى بيتحول لقدرة على الفعل عجيبه ومكانش يتوقع انه ممكن يقوم بالمهمه الصعبه الى الظروف حطته فيها

الانسان لو فضل يقول انا خايف انا يمكن افشل انا مش هقدر ...كل الكلام دة مش هيخليك تتقدم وهتفضل دايما محلك سر ومفيش جديد ف حياتك

لكن لو قلت اقدر واحاول وحتى لو فشلت يكفينى شرف المحاوله ويكفينى انى فكرت اغير وابقى احسن وسيب النتيجه على ربنا... احنا منعرفش النتايج ولا نقدر نتنبأ بيها بس نقدر نتفائل ونحاول وبإذن الله هنقدر

كفايه سلبيه بقى وكفايا نشوف الغلط ونسكت ومش نتكلم ونقول كدة كتير

ف البدايه لازم نكون احنا كويسين الاول وبعدين نصلح الى نشوفه غلط ف اصحابنا وف الى حوالينا

لكن مينفعش نقول كدة غلط واحنا بنعمله مينفعش يكون جسمنا وعقلنا سليم وصحتنا كويسه وواقفين محلك سر

انا لما بشوف ناس معوقين وبيعافروا ف الحياة وموهوبين ومستغلين قدراتهم ومش يائيسين من مرضهم وقالوا ان الحياة وقفت مع اول مشكله . بل بالعكس والله يا جماعه انا بشوف المعوق والمريض عندة تشبس بالحياة وتفاؤل اكتر من الناس السلام والله يا جماعه انا شفت واحد اعمى كان بيتكلم مع مديرى ف الشغل . مش عارفه اقولكم اد ايه هو مثقف ومحترم وبيتكلم بكل ثقه وكأن عينه ف عين المتحدث معه وبيضحك وعندة رضا كتير مننا معندوش النعمه دى_نعمه الرضا_الحمد لله

هو شاب صغير بس تحس انه راجل كبير مش قصدى انه شال الهم بدرى ..لا اقصد انه عاقل وحاسس بالمسؤليه وبصراحه انا قارنت بينه وبين شباب تقريبا ف سنه ولاقيت ان الفرق كبير اوى وبقيت ماشيه اشوف الشباب ف الشارع وع القهاوى وبجد خزنت اوى لما لاقيت ان الى صحته على قدة عايش احسن من الى صحته تمام وبيضيعها ف يأسه واستسلامه وبيضيع عمرة كمان مش صحته بس

ياترى الانسان علشان يفوق ويصحى من حاله الاغماء دى لازم تحصل له مأساة او مشكله؟؟؟ليه منستفدش من تجارب الناس ومنستناش لما تحصل لنا احنا المصيبه علشان نفوق ونصحصح...ليه؟؟؟؟

وبلاحظها اوى بردو ف موضوع التدين تلاقى الشباب ولاد وبنات مبيفوقوش ان ف جنه ونار وان الدنيا دى رحله وهتخلص ف يوم من الايام واننا فيها ضيوف ...كل دة مبيحسوش بيه الا لما يحصل لهم دروب ف حياتهم او يموت حد قريب لهم ساعتها يحسوا ان الواحد لازم يفوق بقى ويعمل لأخرته

ليه دايما بنقوق متأخر ...كل لبيبُ بالاشارة يفهمُ

ف الاخر عايزة اقولكم ان احنا شباب مصر يعنى لو احنا مش كويسين و مفيناش خير وحب لبلدنا يبقى عليه العوض فينا وف بلدنا

اناشد نفسى واياكم.......... اعمل لدنياك كأنك تعيش ابدا ...واعمل لاخرتك كأنك تموت غدا