الحمد لله الذى بنعمته تتم الصالحات

السلام عليكم

اسفه ع التأخير والانقطاع عن الكتابه التى كانت بسبب التفكير فى اكثر من موضوع سوف اطرح عليكم ما يمكن طرحه منهم

اولا نوع من انواع التفكير مع النفس لمحاوله فهمها ومحاوله للبحث عن اجابه لسؤال: من أكون...الى اتسألته ومعرفتش ارد وحتى بعد ما فكرت كتير اوى وصدعت من كتر التفكير بردو موصلتش لاجابه مرضيه....لاقيت ان صعب اوى انى اوصف نفسى بصفه ما او احدد ماذا اكون وماذا اريد.......انا مش عارفه هل من الصح اننا نفهم نفسنا علشان منعملهاش الى هى عايزاة ولا احنا بنعرف نفسنا علشان نعمل حاله من المصالحه مع الذات...انا اعرف ان النفس امارة بالسوء...رغم ان دة مش عندى او ان نفسى مش بتؤمرنى بالسوء انا مش بشكر ف نفسى بس بجد انا اول ماحاولت افكر ف الموضوع فكرت من زاويه اذاى افهم نفسى واحبها بس افتكرت المقوله الى بتقول النفس امارة بالسوء..فمعرفتش اكمل تفكير لانى مش عارفه افكر من انهى زاويه.ما علينا الموضوع كبير والكلام فيه مش هيخلص

تانى موضوع كان شاغلنى هو اذاى ان راجل ملو هدومه وعندة شخصيه يرضى ان اهله يخطبوا له دى حاجه غريبه بس اكتشفت انها بقت منتشرة اوى الايام دى وكاننا بنرجع للخلف مش بنتقدم

مش معنى كلامى انى موافقه ان الولد والبنت يتفسحوا علشان يتعرفوا على بعض ....لا ...انا قصدى ان الى هيتجوز دة هو الى يختار بعينه مش بعين مامته ولا باباه ...يا خساره شباب اليومين دول...طبعا مش كلهم اكيد فى رجاله كتير عندهم شخصيه قويه

انا لاحظت كمان حاجه ان الشباب الى بيعرف ويصاحب بنات دة بيبقى ف اول قائمه الى بيتجوزوا جواز صالونات

ما علينا.....جواز الصالونات مش غلط على فكرة ولا فاشل بالعكس فى جوازات كتير ناجحه بس الى هيتجوز هو الى يشوف عروسته ويتعامل معاها ويشوف هيعرف يكمل حياته مع الانسانه دى ولا لا

(هو الى هيتجوز مش مامته ولا باباه

يالا ماهما اصلهم نفسهم يفرحوا بأبنهم فعايزين يجيبوا له لعبه علشان تفرحه........ماعلينا

الموضوع التالت هو انى كنت فى حاله اختيار صعب بين 1-انى اقلل ساعات شغلى فى حين انى اكمل حفظ القرأن ف دار التحفيظ

او2- انى اشتغل اكتر واكسب اكتر واسيب درس القرأن الى ربنا هدانى اليه واد ايه بيفرق معايا الدرس دة وبخرج منه كأنى مولودة من جديد ربنا يدومها عليا نعمه ويحفظها من الزوال

المهم بقى او الغريب ف الموضوع انى قررت اخد ساعات اقل علشان ميعاد الدرس ميتعارضش مع شغلى واخترت راحه بالى والحاجه الى فيها طاعه لربنا

لكن اليكم المفاجأة اتغير ميعاد الشغل بحيث يسمح لى ذلك بقبول العمل الاضافى وف نفس الوقت مسيبش الحاجه الى بحبها والى بتقربنى اكتر لربنا سبحانه وتعالى

وف النهايه احب اقول الحمد لله الذى بنعمته تتم الصالحات

الحمد لله كثيرا ملىء السماوات والارض وملىء ما بينهما كما ينبغى لجلال وجهه وعظيم سلطانه