السلام عليكم ورحمه الله وبركاته
اذيكم كلكم وحشتنى الكتابه ف البلوج
واكيد انتوا كمان وحشكم كلامى(غتاته بقى
المهم...انا رحت المكتبه من كام يوم وهحكيلكم على اليوم دة ذى ما اتعودت
انا المرة دى مرحتش لوحدى ...انا رحت مع ريهام صاحبتى...وبصراحه كان يوم حلو اوى
واكتشفت حاجه مهمه جدا....ان المكان مهما كان حلو وفيه من انواع المتع الاشكال والالوان...ممكن منحسش بجماله لو كنا فيه لوحدنا
ولو رحنا نفس المكان وكان معانا حد بنحبه بتكون الحياة لها طعم تانى
دة الى انا حسيته اول ما رجعت من المكتبه ...رغم انى كل شويه بروحها الا ان المرة دى كان لها طعم تانى ,....وافتكرت جمله كنت بعترض عليها كل ما اسمع حد يقولها قدامى...والى بتقول ان الجنه من غير ناس ما تنداس
مش معنى كلامى دة انى موافقه على الجمله دى..لكن الى اقصدة ان الاصحاب والاخوات والاهل لهم دور مهم كبير اوى ف حياتنا وف اسعادنا
انا يمكن حسيت بالفرق دة لانى كل مرة بروح هناك بكون لوحدى لكن لما غيرت حسيت بالفرق
والاحساس دة خلانى اعرف قيمه الاصدقاء...وقلبى يتقبض لما الاقى حد لوحدة ومش له رفيق ولا حبيب
انا الحمد لله اصحابى كتير ربنا يكرمهم يارب ويخليهم لى ويجمعنا ف الجنه امييييييييييين
عارفين لما الواحد يكون ميسور والحياة وردى ...وبعدين يمر بضائقه ماليه.....تخيلوا لما يفوق من الازمه ويخرج من الضائقه دى بيكون ايه احساسه بالناس الفقراء..وبيحمد ربنا على نعنه المال ...وبالمثل بالنسبه للصحه لو الانسان جاله شويه برد او اى مرض اللهم احفظنا.....وكانت صحته تعبانه وبعدين ربنا من عليه بالشفاء...بعد ما بيخف بيحمد ربنا على نعمه الصحه
----------
انا بحمد ربنا على كل نعمه عليا
وعلى نعمه الاصدقاء ربنا يخليهم لى ويسعدنا ببعض...وربنا يجمعنا يوم القيامه ف الجنه ان شاء الله ونكون ماسكين ايد بعض
ونعين بعض على طاعه ربنا ويارب يكون راضى عننا دايما
مكلمتكوش بقى على ريهام ....دى صاحبه صاحبه واحدة صاحبتى بعيدة شويه ...انا اتعرفت عليها يوم ما كنا رايحين معرض الكتاب السنه دى...هى ف طب...وبصراحه احنا بقينا اكتر من اخوات....ادعولها ربنا يوفقها ف دراستها وتجيب امتياز يارب
وربنا يخلينا لبعض وميحرمناش من بعض ابدا ابدا
ربنا يكرم الجميع ويسعد كل الاصحاب والاهل وكل الى بيحبوا بعض حب شريف وبيراعوا ربنا ف بعض
ربنا ميجعلش حد وحيد ابدا ف الحياة
للحياة طعم حين تعيشها لله ولها طعمان حين تعيشها لله مع احباب ف الله
3 comments:
السلام عليكم ورحمة الله وبركاته
عندك حق فعلا ياهبهوب والله
الصداقة حاجة جميلة جدا لكن ما يشعرش بلذتها الا اللي ربنا أنعم عليه بصديقات أو أصدقاء كويسين بيكونوا بالنسبة للواحد كل شئ في حياته لأنهن هن جعبة أسرارنا واكسير حياتنا هم اللي الواحدة بتجري عليهن وقت الشدة يبكي على اكتافهن ويشكي لهن همومه
وكذا الواحدة لما تحس أنها في ضيقة اللي نوعا بيهون عليها إنها بتحس إنها مش لوحدها لكن فيه حد جنبها بيحبها ويخاف عليها ويساعدها والمساعدة هنا مش بس مادية لكن والله المساعدة الروحية والمعنوية أهم بكتير من اي حاجة
شكرا يا هبهوب على الموضوع الجد جميل ده اللي لو اتكلمنا فيه لحد السنة الجاية مش هنخلص منه أبدا وشكرا ليكي ولكل صديقاتي على كل الايام الحلوة اللي قضيناها سوا وربنا يخلينا لبعض وما يحرمناش من بعض أبدا
السلام عليكم ورحمة الله وبركاته
بجد يا هبة الصداقة دي اجمل حاجة في الدنيا لان الانسان مخلوق اجتماعي بطبعه والدنيا دي لو من غير اصدقاء مش هانعرف نعيش فيها ابدااااااا لما بنبكي مين بيمسح دموعنا غير اصدقاءنا؟لما تقسو علينا الحياة بمختلف الصورة مين بيحنو علينا غير اصدقاءنا؟والاحساس ده يا جماعة انا حاساه اوي اليومين دوول لاني السنة دي مريت بظروف كتير صعبة قادرة انها تهد اي بني ادم وتخليه يتخلي عن احلامه لكن اصحابي وقفوا جنبي ودعموني كتيير وكنت كمان هأجل مادة بس منعوني وقالولي لازم تحاولي مااكدبش عليكوا الموضوع كان صعب عليا اوي لان منهج سنة 3 طب كبير جدا.ومن ضمن اصحابي دوول هبة برغم اني عرفتها من قريب مش مدة كبيرة لكن هي بقت عندي حاجة كبيرة اوي اوي اوي بجد يا هبة انتي احن صديقة انا عرفتها ولولاكي بعد ربنا انا كان زماني استسلمت لضعفي وماكملتش السنة دي .اما بالنسبة ليوم المكتبة بقي احنا رحنا في فترة صعبة بالنسبة لي في وسط زحمة الامتحانات والناس كلها بتذاكر بس انا تعبت ولاقيت طبعا ترحيب من هبة اننا نروح المكتبة سوا والله والله انا كنت بابص لوشها بارتاح وضحكنا كتير وهزرنا كتيير وكمان حسيت ان في عالم انا كنت بعيدة عنه هو عالم الكتب برغم اني في طب بس عمري مثلا مااشتريت كتاب وقريت فيه لكن لما رحت المكتبة بجد حسيت اني ماكنتش عايشة وحسيت ان الكتب دي دنيا تانية ممكن نتعمل منها حاجات كتير اوي والفضل يرجع لك يا هبة بعد ربنا ويارب مايحرمنيش منك ابدا ونفضل علي طول مع بعض لحد اخر يوم في عمري
متشكرة يا ميويتى على الكومنت
وبنا يخليكى ليا يارب
ومبروك يا عم البلوج الجديد
وان شاء الله اقرأ فيه كل جديد وجميل
انت اسلوبك هايل يا ميويتى
انت لازم حد يكتشفك
ويكتشف موهبتك
ربنا يخليكى ليا يارب
وميحرمنيش من كل اصحابى
ربنا يسعكم جميعا ويجعل ايامكم كلها فرح وسرور
-----------
ربنا يخليكى ليا يارومى وميحرمنيش منك ابدا
وايه الكلام الجميل دة
ربنا يخليكى انا معملتش معاكى غير الى اى انسانه بتحب صاحبتها تعمله
وانت عندى مش صديقه لا انت اخت واخت عزيزة اوى
ربنا يوفقك ويسعد ايامك..وتبقى اشطر دكتورة فيكى يا مصر
-----------
Post a Comment