اذيكم قرائى الاعزاء
كل عام وانتم بخير
ممكن ناس تعترض على انى بهنيكم بعيد الحب
انا بحب اليوم دا جدا...لكذا سبب وأولهم انى بحب اللون الاحمر جدا
وببقى مبسوطه اوى وانا شايفه الناس كلها لابسه احمر
لون جميل رومانسى ..بحس انه رقيق وفيه دفئ وحب وكل حاجه حلوة
انا مش بحتفل بعيد الحب مع حد ......لكن بحب اليوم دا بردو لانى بعبر عن حبى لأهلى و لأصحابى فيه
واكيد الحياة بتبقى واخدانا كل واحد ف شغلنا وف حياته وممكن اكون جوايا مشاعر حلوة كتير لأصحابى ...لكن بعتبر اليوم دا وقفه علشان الناس كلها تعبر عن حبها للى حوليهم من اهل او اصحاب ...اتبسطت اوى لما الاقى ف برامج الراديو..ازواج وزوجات بتتصل وتقول لشريك حياتها كل عام وانت حبيبى
حاجه جميله اوى....لما تلاقى ان الحب بعد الجواز مستمر بين الناس المخلصين وتعرف ان الحب الحقيقى فعلا بعد الجواز مش قبله
فى ناس بتقول ان اليوم دا المفروض المسلمين مش يختفلوا بيه وانه بدعه وووو
بس انا بستفتى قلبى ..ومش شايفه انها حاجه وحشه ...ولو زوجين عبروا عن حبهم لبعض ف اليوم دا او اخوات او اصحاب...يبقى ليه لأ وايه المشكلة
واكيد مش بتكلم عن الى بيحبوا بعض ف الخفاء...بتكلم عن الحب الى ف النور- الحب ف الله ..بين الاهل و الاصحاب و الازواج
ومن هنا بدعوكم تحبوا الحياة ونفكر ف اننا اد ايه بنحب ربنا واد ايه هو اغلى حاجه ف حياتنا
و نفكر شويه اننا ممكن اوى نكون بنحب اهلنا واخواتنا واصحابنا والى حواليا لكن منجيش ف مرة واقول لماما او حد من اخواتى انا بحبك اوى واد ايه انت غالى عندى
كلمه بسيطه بس هتفرق كتير اوى مع الطرف التانى الى هيسمعها
وليه كمان ميكونش يوم للتصالح واسترجاع الحب بين اى اتنين متخاصمين
انا كنت بحب اوى اليوم دا وانا ف الجامعه لما كنت بلاقى الدنيا كلها احمر ف احمر وكنت انا كمان بلبس احمر ...مشاركه وجدانيه
مع الاعتراض على الى كان بيحصل بين شباب وبنات الجامعه
بس كنت بحب احساس الحب نفسه...زى ما تقولوا كدا بحب الحب
ودى فرصة اقول لأهلى - بابا وماما واخواتى وكل قرايبى بحبكم اوى
وربنا يخليكم ليا وميحرمنيش من وجودكم ف حياتى
بحب كل اصحابى واى حد عرفته.. اصحاب وكل الطلبه ف شغلى اى حد اتعامل معايا ولو معامله بسيطه
بحب الناس كلها
احب اقدم برقيه حب لمجموعتين البريد الى كان اخر يوم لهم امبارح وأول امبارح واشكرهم على احتفالهم بيا ف اخر يوم والهدايا الجميله الى جابوهالى بجد حلوين اوى واحلى حاجه ان شنطه الهدايا عجبتنى اوى كانت حمراء ومرسوم عليها وردة حمرا وقلب احمر كبير :-)
متشكرة اوى .. وربنا يسعد ايامكم...ذوقكم جميل ااوى
احب اقدم اهداء خاص جدا لريهام رومى واقولها بحبك اوى...ومفتكرش يا رومى ان حبك ف قلبى هيذيد عن كدا...علشان لازم ف يوم هيبقى فيه غيرك ف قلبى .... انتى كدا اخدتى اكتر من وقتك بصراحه
قاعدة ومتربعه ...جوا قلبى ومطمنه اوى...ممكن توسعى شويه ....عايزين هوا
ههههه
بحبك اوى يا رومى ...ربنا يسعد ايامك ويكتب لك كل خير ويكتب لك كل حب وسعادة ويحقق لك كل ما تتمنى
وربنا يخليكى ليا يا قمرة
على فكرة انا ورومى كنا هنخرج الخميس ونعيش الحب واحنا سوا...وجبت لك قلب احمر ووردة حمرا يا حبى
---
بس ربنا مأردش اننا نتقابل
انا مكنتش عندى شغل الخميس ...بس فى شغل مستعجل بكرة فمضطرة اروح بكرة الشغل ...معلش يا حبى مش هقابلك
معلش
ربنا مأردش...لعل فى ذلك خير...وهلبس بكرة احمر بردو و هروح اشترى لنفسى وردة ولا يهمنى عادى جدا....هههههه
بس انتى ف بالى على طول انتى وكل الناس الى بحبهم
قلبى عمال يتضخم من كتر الناس الى فيه ....هيطرشق....ههههههههه
اوريكم بقى صورة الهدايا الى قدموهالى مجموعتين البريد....مشكورين
واهم جاحه شنطه الهدايا زوقها عجبنى اوى ...واكيد الناس فهمتنى غلط وانا مروحه بالشنطه دى وقالوا ان هديه الفلانتين جاتلى بدرى يوم.....شنطه شبهه بصراحه...هههههه
حتى شوفوا
بحبكم ف اللهاهديلكم اغنيه احبك (لعبد الحليم) أمير الرومانسية
10 comments:
السلام عليكم و رحمة الله و بركاته
من هبه سمير لبنهاء بحبك قوي يا اختي بالاختيار و بحب شلتنا كلها و هم استي بالاختيار و نفسي كل انسان يتوقف لثانيه واحده يعز فيها نفسه عن العالم .... مش عايزه غير ثانيه واحده يفصل نفسه عن كل شئ و يتكلم مع نفسه و فطرته و بعدها هايعرف ايه هو الحب و مش هايبقى عليه غير انه ينفذ اللي عرفه .... و صدقيني الثانيه اللي هايعشها اللي هايعملها عمره ما هاينساها و هاليلتزم بيها
على فكره امبارح كان كتب كتاب محمد فايد و مياده و انهارده (يوم الفالنتين) زفافهم ... انا كنت في كتب الكتاب و كان رائع ... كان كتب كتاب اتنين بيحبوا ... ادعيلهم بالتوفيق و البركه .... يا رب السنه الجايه يكون كل الناس عرفوا الحب يعني ايه و كمان ياخدوا قرار بالحب
سلام يا حبي و يا رب تعيشي الحب مع زوجك قبل و بعد الزواج ... لا قبله بس و لا بعده بس
هبهوب
كل سنة وأنتي بخير وسعاده
أنا بحبك في الله
أنا معاكي أن النهاردة مش بس للمخطوبين أو المتزوجين أو أي اتنين بيحبوا بعض
النهاردة فرصة كويسة نعبر فيها لاصحابنا وأهلنا عن مشاعرنا
وأنا كل ما أقابل حد النهاردة أقول له كده
تحياتي
السلام عليكم
حبيبة قلبي بوباااااااااااااااااااا والله وانا كمان بحبــــــــــك جدا جدا جدا وكان نفسي اوي نخرج انهاردة سوا ماتعرفيش انا اد ايه كنت مستنية اليوم ده بفارغ الصبر بس الحمد لله ولعل في ذلك خير وانا بجد عايزة اقولك انهاردة اني طول عمري كنت بابحث عن اخت وصديقة والحمد لله ربنا رزقني بيكي ونفسي نفضل مع بعض لاخر يوم في عمري ولعلمك بقي هافضل كده قاعدة مربعة في قلبك شئتي ام ابيتي هههههههههههه عافية بقي.ربنا يسعد ايامك يا هبة وعلي طول اشوفك مبسوطة انتي لما بتبقي مبسوطة باحس الدنيا كلها بترقص في عنيا يارب يارب يارب تبقي مبسوطة كده علي طول
اما بالنسبة لحكاية ان في ناس بتقول ان اليوم ده بدعة وغيره وغيره انا رايي من رايك مافيهاش حاجة لما نستغل اليوم ده ونعبر للي بنحبهم عن حبنا اهلنا واصحابنا لان الدنيا بتليهينا وبتبقي فيعلا جوانا مشاعر كتير للي حوالينا بس مابنعبرش عنها وبنبقي مش قصدين لكن في يوم زي ده لما الواحد مثلا يرزو حد من اهله بقاله كتير ماشفهوش ويقوله بحبك بجد هاتبقي حاجة جميلة اوي اوي
ونفسي اشوفك قريب يا بوبا وارغي معاكي كتير لانك بجد وحشاني اوي واسفة لو كنت طولت عليكي
بحبــــــــــــــــــــــــــك
السلام عليكم ورحمة الله وبركاته اذيك يامس عامله ايه يارب تكونى بخير وسعاده.واتمنى ليك عيد حب سعيد وتحقق كل امنياتك اللى بتتمنيها.ويارب برضو يحققلى كل امنيات وخصوصا امنيه وحده بدعيه يحققهالى. اللهم آمــــين ،أمـــينوالسلام عليكم ورحمة اله وبركاته.قريبا
ازيك ياحبيبتى -كل سنة وانت طيبه-وان شاء الله السنه الجايه تحتفلى بعيد الحب مع حد يحبك وتحبيه-ويكون يستاهل قلب كبير زى قلبك-يارب التعليف ده يتنشر احسن انا تعبت فوى -كل مرة اكتب لك ومفيش حاجه بتوصلك -داليا-
متشكرة اوى ليكم
بجد كان يوم جميل... عبرت فيه بحبى لكل الى شفتهم ولأهلى من والديا واخواتى وقرايبى
وجبت لكل بنت ف الشغل من زميلاتى وردة حمراء
اد ايه انا كنت مبسوطه اوى وانا بهديهالهم ...يمكن كمان كنت فرحانه اوى وانا حاسه انى اسعدتهم وقدمت لهم حاجه حلوة بيتمنوها
والله حسيت انى فرحانه اكتر منهم بجد...وانا شايفه السعادة ف عنيهم
----
ربنا يسعدكم كلكم ويجعل كل ايامكم حب ف حب
----
متشكرة يا بوبه برسل برقيه حب ليكى ولكل اصحابنا ف اليوم الجميل دا وبقول لكل خريجين كليه اعلام جامعه القاهرة وخصوصا قسم العلاقات العامه والاعلان ...هابى فلانتين
وبجد متعرفيش انا اد ايه فرحت لميادة ومحمد ... وبجد الف الف مبروك وبجد احلى خبر سمعته ف عيد الحب
والاحلى انى عرفته منك يا بوبة
وكان نفسى تكون دفعتنا كلها ف الفرح...ربنا يسعد ايامهم يارب ويكتب لهم كل خير
----
متشكرة على تعليقك يا هبه
ومتشكرة يا رومى يا قلتى ...ربنا ميحرمنيش منك ابدا
---
شكرا يا أمين على تعليقك...وربنا يحقق لك كل امنياتك
--
ميرسى يا داليا وحشانى اوى وايه اخبار الامارات على حسك..واذى الاولاد سلامى ليهم كتير اوى..وشكرا على تعليقك
---
وهابى فلانتين ليكم جميعااااااا...اسعد الله ايامكم..وحقق لكم كل امنياتكم
وسلام مؤقت
وانا كمان باحبك يا هبههوب ومبسوطة جدا اننا بقينا اصحاب
والحمد لله يوم الخميس انتيمتى حبيبتى جت لى الكلية وقضينا يوم جميل سوا
ربنا يخليى لك اصحابك وكل حبايبك ويخلى لى حبيبتى وروح قلبى أية
صفحتك رقيقة جدا
كل سنه وانتى طبه يا هبههههههوب
والسنه الجايه تكون اسعد ويجيلك فيها قلب احمر كبيييييييير
نحياتى يا جميل
السلام عليكم ورحمة الله وبركاته
والله العظيم الكلام ده كله جميل،بس الرحمه حلوه،لانها صفه من صفات الله وهو الرحمن.فربنا لما بيحب انسان بيرحمه ليه احنا ما بينرحمشى بعض.والله ده حرام اوى.
نستودع الله دينكم وخواتم اعمالكم الذى لاتضيع عنده الودائع،ورحمته وبركاته
Post a Comment