السلام عليكم
اذيكم انا راجعة من محاضرة تنميه بشريه طازة عن العادات السبعة للشخصية الاكثر فاعلية
المهم المحاضرة كانت تحفة وحابة اللخصها لكم ناو
كتاب العادات السبع دا ل ستيفن كوفى
والى استفدتة من المحاضرة ان الانسان لازم ميحطش نفسة ف اطار تفكير معين ويفكر خارج الصندوق
think out of the box
فكرتنى الجمله دى بكلمه صاحبتى وحبيبتى هبه سمير الغالية...لما كانت بتقولنا ف الكليه لحد امتى هنفضل نمشى جوا الجزمه....ههههه...وحشانى يا بوبة ووحشانى ايام الصبا
المهم احنا اذاى نتغير للأفضل؟؟
احنا اصلا بنرفض التغير لأننا مبنستوعبش الفكرة الجديدة او لأننا غير مؤمنين بيها ولا نعى التغير او لاننا مشغولين او كسلانين او انى مقتنع انى صح علشان كدا مش عايز اتغير ولا قابل فكرة التغير اصلا
طب نتغير اذاى...عارفين فى مثال قاله المحاضر :اننا ممكن نكون عندنا وجهه نظر معينه وممكن تتغير لما نعرف معلومه معينه
مثال:واحد كان ف القطار وراجل جمبه معاة اطفال المهم الاطفال بيلعبوا والراجل قرفان منهم ومن ازعاجهم
المهم قال ف سره.. الراجل دا مش عارف يربى عياله وووو...المهم اخر ما زهق قاله انت مش بتحكم عيالك وسايبهم يضايقوا البشر ليه
فرد الاب عليه وقالوا اصلهم أمهم لسه متوفيه ف المستشفى من ساعه ومش عارف ابلغهم اذاى
الراجل زعل من نفسه انه فكر ف الراجل بطريقه سلبيه وصعب عليه هو والاطفال
---
فى حاجه كمان مهمه اوى وهى بنك العلاقات انا اتكلمت عنه قبل كدا ف البوست الى كان بعنوان السعادة الزوجية واختيار شريك الحياة
الى بنسميه emotional bank
خلاصته ان اى علاقه بين اتنين بيبقى في بنك للعواطف بينهم ...من خلال المواقف الى بتحصل بينهم بنلاقى ان كل انسان ممكن يسحب من الرصيد دا ويقل لو حاجه ضايقة الطرف الاخر حتى لوحاجه تافهه
والرصيد بيزيد لما يعمل اى طرف للأخر حاجه حلوة ترضيه
هدخل ف موضوع العادات..احنا بنكتسب العادة اذاى:؟
معرفه --مهارة---ارادة
يعنى لو عايزة مثلا اقرأ قرأن كل يوم بعد صلاة الفجر لحد الشروق
دى معرفه او حاجه عايزاها
المهارة هل بعرف اقرأ ...والارادة هل عندى الرغبه انى اواظب على دا ولا لأ
والاستمرار ف الفعل دا بيجعل الانسان يتعود على الشىء دا ويصبح عادة
---
العادات السبع هم
العادة الاولى:كن فعال
العادة الثانية:فكر ف الغاية
العادة الثالثه:ابدأ بالاهم فالمهم
اول ثلات عادات بيحققوا الانتصار الشخصى وبالتالى الاعتماد على النفس
العادة الرابعة :المنفعه للجميع
العادة الخامسة :افهم نفسك حتى يُسهل فهمك
العادة السادسة:المشاركه والتكاتف
والثلاثه دول بيحققوا التعاون مع الاخرين
اخر عادة واهم عادة هى الاهتمام بالنفس
---
لو اى حد عايز توضيح على اى عادة من دول انا ممكن استفيض فيها بس منعا للأطاله قلت نقاط فقط
---
اتكلم كمان ف جزء الفرق بين الشخصية الفعاله والاشخصية الانفعالية...وقال مثال عجبنى بيقول ايه؟؟
الشخصية الفعالة دى شخصيه مسؤلة عن حياتها تتقبل مسؤلية افعالها ولا تلقى باللوم على الاخرين وشخصيه مرنة
الشخصية الانفعاليه: تسمح للعوامل الخارجية من مشاعر ومزاج وظروف ان تتحكم ف تصرفاتة
مثال ال10% وال 90% بمعنى ان فى ف الظروف وردود افعالنا عشة ف الميه ملناش دخل بيها وتعتبر ظروف بتحصل غصب عننا شئنا ام لم نشأ
والتسعين ف الميه التانيين دول بيكونوا بناء على ردود افعالنا لل ال10% الى حصلت
مثال على كدا كان في زوج وزوجته وبنتهم بيفطروا ... وكل واحد رايح مصالحه بعد الفطار والبنت رايحه المدرسه
المهم البنت غصب عنها وقعت الشاى على باباها
الراجل اتنرفز وقعد يزعق للبنت وقعدت تعيط لأن مش قصدها
ويزعق ف مراته وقام يلعن اليوم من اوله
المهم راح غير هدومه وقعد يصالح ف النت الى زعلها والاتوبيس بتاع المدرسه مشى ...وكمان قعد يصالح مراته انه انفعل من الموقف وهو كان متأخر ووو
المهم راح وصل البنت المدرسه لان اتوبيسها مشى...المهم ف الاخر وصل شغله متأخر ساعه
وكل دا ليه ..؟؟علشان خلى الظروف والعوامل الخارجيه تأثر على حالته وعالمه الداخلى..بمعنى اصح ال10 ف الميه الوحشين بوظوا ال90 ف الميه الباقيين
----
قال كمان ان فى ف حياتنا فى ناس حامله عدوى التأثير
بمعنى اننا لو فكرنا ف الاشخاص من حولنا هنلاقى فى منهم الى بيأثر علينا بالايجاب وفى الى بيأثر بالسلب
المهم ان الشخصيه الفعاله هى التى لاتترك مساؤئ الاخرين تتحكم ف قراراتهم
---بالنسبة لجزئيه الاهتمام بالاهم فالمهم
الشخصيه الناجحة الى عايزة تبقى افضل مماهى عليه ..دى الشخصيه الى بتحاول انها تعمل اشياء هامه وغير عاجله...مثل قراءة كتاب ما عن مشروع ما هتعمله ف المستقبل والتقليل من الاشياء الغير هامه والغير عاجلة
--
اما عن الاهتمام بالنفس
فالمنتج دائما يحتاج للأهتمام بالمصدر
كيف تهتم بنفسك؟؟
لازم توزع اهتمامك على:
الاهتمام البدنى من رياضه وتاخد بالك من اكلك
الاهتمام ااذهنى من قراءة واطلاع
اهتمام روحى من خلا ل الصلاة والتقرب ال الله
اهتمام اجتماعى من خلال بنك العلاقات الى اتكلمت عنه قبل كدا
---
ف النهاية
احب اشكر المحاضر الى حاضر المحاضرة دى أ-معتز الشوربجى
استودعكم الله الذى لا تضيع ودائعه
---
اول مرة اكتب بوست فورمال كدا. مفهوش كلمة عنى.بس يمكن لانى تعبانه ومش عايزة اتطرق لأى كلام عنى والا هبدع
واكيد فى ناس هتضايق وتزعل وانا ميرضينيش
8 comments:
هبهوب
ازيك يا بنتي وفينك بقالك مدة كبيرة مختفية
وبعدين الكلام اللي قلتيه في أخر البوست قلقني بجد
ياريت تطمنيني عليكي
بالنسبة للموضوع اللي بتتكلمي عنه فالموضوع جميل ومفيد جدا
مش عارفة واللي اشكرك ازاي
المجهود اللي بتبذليه هنا كبير ويسحتق الشكر والاهتمام
المحاضرة فعلا ومهمة وعرضك ليها ممتاز
وبالنسبة لي تقريبا فهمت المقصود من العادات السبع
وغالبا أنا شخصية انفعالية جدا بس هأحاول أطبق السبع عادات دول يمكن أغير من نفسي
بنك العلاقات أول مرة اسمع المصطلح ده بصراحة ومش عارفة بيتهيألي إن احنا ساعات بندي قروض بدون ضمانت لما بنكون عايزين في بنك العواطف ده حتى لو كان الرصيد ضعيف
تحياتي ليك وعلى مجهودك
ومستنية اخبارك
ميرسى يا هبه انك بتسألى عليا وقلقانه عليا
الله ييكرمك ويخليكى ليا وميحرمنيش من اهتمامك وذوقك
انا كويسه الحمد لله...بس كنت مرهقه شويه من مشوار مصر وكنت مضايقه شويه من حاجات عاديه بتحصل كل يوم ف حياتنا ...سواء تصرفات ناس او ردود معينه ممكن تسمعيها من حد مكنتيش متوقعه الرد دا وووو...حاجات تافهه بتندرج ف ال10 ف الميه وبتأثر بالسلب على ال90 ف الميه
المهم مش تقلقى عليا يا قمرة انا بخير طول ما انتى بتسألى عليا
لا شكر على واجب يا حبيبتى انا حابه اوصل اى معومه اعرفها للدنيا كلها والى اقدر عليه هو انى ابعت الكلام دا هنا ويارب يكون كل الى بيقرأ بيستفيد وانى مكونش بخنوقكم بطول البوست
بلاش تكونى شخصيه انفعاليه ..اكيد كلنا بننفعل وممكن نتعصب على حاجه تافهه بس لو فكرنا لحظه ف مثال الاب الى زعق لبنته ونكد على نفسه وعلى البيت كله لما البنت وقعت عليه الشاى ...هنعرف اننا ممكن حاجه صغيرة كئيبه تقلب يومنا كله نكد...وكمان لازم نعرف ان الزعل دا مبيضرش غير صاحبه
وكمان اللحظه الى عايشنها مش بترجع تانى وعلشان كدا لازم نعيشها بأفضل وضع
دا غير رسولنا الكريم عليه افضل الصلاة والسلام...قال لا تغضب
انا كمان بحاول اعود نفسى اول ما اكون هبتدى اتنزفز على اى موقف افتكر كلمه لاتغضب فبهدأ شويه
موضوع بنك العلاقات دا مشروح بالتفصيل الممل ف بوست السعادة الزوجيه احب انك تقريه اد ايه هو مفيد..انا نفسى بحب اقراة كل فترة
متشكرة على اهتمامك يا بوبه وربنا يكتب لى اشوفك قريب
الحمد لله أنك بخير وفي أحسن حال
أنا أصلا قلقت لأني حسيت أنك مدخلتيش من مدة كبيرة بس مالقتيش ميل اراسلك عليه بس الحمد لله اطمنت عليكي
على العموم حاولي ما تخليش حاجة تضايقك
أنا كمان هأحاول أعمل كده
أنا هأدور على بوست السعادة الزوجية وأقراه وأكيد هيكون مفيد مادام أنتي اللي كتباه
على فكرة أنا جاوبت على الأسئلة بتاعتك اللي كانت بعد التاج
سلام مؤقت وأشوفك على خير
هبهوبه الله ينور عليكى
انا كمان بحب اقرا فى التنميه البشريه
وسيفن كوفي كتابه رائع حقيقى
شكرا على تبسيط المعلومات كده يا هبهوبه بجد جميله
---
انا كمان بحاول اعود نفسى اول ما اكون هبتدى اتنزفز على اى موقف افتكر كلمه لاتغضب فبهدأ شويه
---
I was doing so ,but,ba2aaly fatra mesh doing so , so i'll be doing so ;) , 7ad fahem 7aga :D
thanks for the post ;)
و متنسيش النيه
;)
السلام عليكم ورحمة الله وبركاته.ازيك يامس هبه احب اهنيكى على المحاضرة الجميلة ديه.بس كان ليه تعقيب على حاجة،وهى انك لازم دائما تحافظى على هدوء اعصابك ولازم ماتخليش حاجه تزعلك.وخاصة النت علشان انا شوفتك زعلانه اوى.واتمنى ليكى التوفيق وتحققى كل اللى تتمنيه وانا كمان اللهم آمين أمــــــــــــين
ميرسى يا هبهوب وميرسى يا لماضه وشكرا لأنسان جديد..وشكرا لأمين
متشكرة على ردودكم جميعا
جزاكم الله كل الخير
يارب يكون الكلام مفيد ومهم ليكم
انا فعلا بقول الكلام الى انا فهمته من المحاضرة والى انا مقتنعه بيه ف الغالب
لكن مش ف كل الاحوال بعرف اطبق كل حاجه بحزافيرها
كتير اوى بنمر بمواقف ومنعرفش ننصح نفسنا ولما نلاقى غيرنا ف نفس الموقف تقوله اعمل كذا وكذا وتلاقى النصايح كتير اوى وتقول لنفسك كل دا كان فين وانا ف نفس الموقف
انا اتعصبت انهاردة ف شغلى لما دخلت اللاب اشرح نت ومش لاقيت النت شغال ..فقلت للأدارة يشغلوة ...ولما خرجت ف البريك لاقيت ان محدش عبرنى كأنى كنت بكلم حد ف سنتر تانى...ف حاجه تحرق الدم بصراحه
صحيح انا المفروض كنت تمالكت اعصابى شويه صحيح
لكن انا لما بضايق مش بعرف اخبى...يعنى والموضوع كان فيه ملاباسات تضايق
يالا حصل خير ...الحمد لله
بسم الله الرحمن الرحيم
بوست ممتاز جدا يا هبه و ربنا يبارك فيكي
انا استفدت منه كتير
سلام
Post a Comment