سمعت جمله من انسانه قريبة منى كان نصها"انا لازم احط على قلبى حجر ومحبش علشان متعذبش"
الكلمه ضايقتنى رغم انها كانت بتتكلم على لسنها هي ..بس هل دا فعلا ممكن يحصل ان الانسان يقدر يعيش منغير ما يحب؟!؟!؟ وهل هى فعلا هتقدر تعمل دا ولا دا كلام بيتقال وقت الغضب
ولو فعلا نقدر نعمل كدا ونستحمل دا وان دا ف صالحنا؟!؟!؟...مكنش ربنا بث ف قلوبنا الحب والاحساس بالغير وكنا نبقى عايشين ف غابة
ومحدش بيحس بحد ولا بيخاف على حد ونعيش نجرح ف بعض ...ماهو محدش بيحس وكأننا بنعامل بقر مش بشر....لأ وغير كدا ان ممكن كمان لما نجرح منحسش احنا عملنا ايه ف الى قدامنا ..وكمان الى اتجرح ممكن كمان يبقى عديم الاحساس ومتبلد و كأن شيئا لم يكن
دا احنا من رحمة ربنا بينا ان خلق ف قلوبنا الحب والحنية والاحساس بالغير

---
ليه بنشوف حد بيتفرج على فيلم وف مشهد مؤثر يبكى وقلبه يوجعه تأثرا بالمشهد رغم انه فيلم مش حقيقة
لو فعلا نقدر نحط على قلوبنا حجر ف مواقف حياتنا الفعليه.. كنا عملناها واحنا بنتفرج على المواقف المؤثرة ف الافلام رغم تيقننا انه فيلم خيالى
وانا بكتب البوست دا كنت مشغله قناة العفاسى اون لاين من اللينك دا http://www.way2allah.com/modules.php?name=live
وكان الشيخ مشارى راشد بيرتل القرآن المهم سمعت الآيه الى بيقول فيها الله جل جلاله
"عسى ان تكرهوا شيئا ويجعل الله فيه خيراً كثيرا"صدق الله العظيم

--
كتير اوى ممكن نتمنى اشياء تحدث او لاتحدث وربنا يعمل شىء اخر...ونبقى زعلانين ومنعرفش ان ربنا عمل لنا الخير
وانه عمل الشىء دا لسبب لا يعلمه الا هو وتعرف مع مرور الايام ان ربنا عمل كدا علشان يعوضك بشىء اخر ..وعايز يعرف انت فعلا كنت صابر على قضائه؟ومفوض امرك له ولا لأ؟
وانه القادر على كل شىء ولا لأ؟
وهل انت موكله وراضى ولا لأ؟
الدنيا دى كلها اختبارات وابتلاءات
دنيا فانية...دار ابتلاء..دار ممر لا مقر
فى ناس بأحتكاكنا بيهم بنتعلم منهم حاجات وبنحبهم وساعات ناخد بعضهم قدوة...لكن الصدمه الى بنقع فيها لما نفتكر ان القدوة الى احنا تخيلناها مكنتش بالصورة والى رسمناها.... انا اتعلمت من الحياة ان فعلا الجمله الى كتبتها ف اول البوست والى سمعتها وضايقتنى ..دى جمله صعبه التحقيق وان محدش يقدر يعيش ويلغى قلبه او عقله...وف نفس الوقت مقتنعة ان الى بيحب اوى بيتعب اوى

--

ليه بنسمع ساعات يتقال ان الحب قوة وساعات تانيه نسمع ان الحب ضعف هو قوة ولا ضعف؟!؟!؟!؟!؟! احتارت الحقيقة ومش عارفه فعلا هو قوة ولا ضعف بس اعتقد ان الحب الحقيقى الطاهر ف الله..و النابع من إقتناع من العقل و القلب.. بيواجه اى مشاكل واى صعوبات واكيد بيحتاج غير اقتناع كلا الطرفين بالاخر لحاجه مهمة جدا وهى الإحترام

--
ف كل الاحوال ما فى احسن من الاعتماد على الله والتوكل عليه ف كل امور حياتنا ...وان الى يقدرة ربنا لينا لأزم نرضى بيه وانه افضل شىء لينا...لأنه اختيار رب العالمين
ولو زعلنا من اى انسان لايمكن نزعل من رب العباد
لان محدش بيحبنا ولا بيخاف علينا اد الى خلقنا

---
والله ما فى احلى من الرضا والاسلام والاستسلام لله تعالى وتفويضه وتوكيلة ف كل امورنا واقتناعنا بأنه مش هيخذلنا ابدا...و طول ما الانسان ماشى صح وبيتقى ربنا ف كل امورة ومش بيحاول يظلم حد ربنا هيقف جمبه ويعمل له الخير ويبعد عنه كل شر
--
استغفر الله العظيم* والحمد لله رب العالمين*.. ملىء السموات وملىء الارض وملىء ما بينهما وملىء ما شئت من شئ بعد.. كمان ينبغى لجلال وجهك وعظيم سلطانك
*اللهم دبر لى بإنى لا احسن التدبير