شم النسيم

السلام عليكم ..اذيكم يارب تكونوا كلكم بخير
ايه اخبار الفسيخ والبصل معاكم
اكيد الناس الى هترجع شغلها من بكرة هيبقوا ف طور ممنوع اللمس او الاقتراب ...اكيد من مفعول اكلات اشم النسيم وطبعا البصل القمور....انا متخيله الناس راجعه شغلها متنحين تتنيجه ...هههه
من تأثير البصل وحاله الاغماء والتمويم المغناطيسى الى هما فيه....انا واحدة من الناس بحب الاسماك جدا
بس مش بطيق الفسيخ ولا ريحته
بحب الرنجه اكتر
وعلشان بحبها اكلتها يوم الاحد والاتنين احتفالا بيها
بس مقولكوش بصراحه كل ما اقوم من النوم انام
مش عارفه فى ايه ...هروح بكرة الشغل اذاى انا مش عارفه
----
المهم احيلكم بقى على اليوم الى رحت فيه القاهرة وحتى لحظتنا هذة بأختصار
انا نزلت من البيت الساعه 1 بعد صلاة الظهر على طول ف عز الحر
المهم وانا رايحه ركبت العربيه من موقف بنها لموقف احمد حلمى علشان اركب لمصر الجديدة
المهم انى وانا راكبه العربيه كانت الدنيا هوووس والناس بتستعد ليوم شم الفسيخ
طلعت الام بى ثرى علشان اسمع حاجه ...وبعدين بسأل نفسى هتسمعى ايه يا هبههههوب
انا حاطه فيها قرآن واناشيد واغانى
المهم انا بقالى كام يوم كارهه الاغانى ومقررة مسمعهاش تانى ابدا ان شاء الله
المهم قولت اسمع سورة البقرة...المهم رحت مشغلاها وبعد مفيش خمس دقايق لاقيت السواق راح مشغل قرآن وشغل سورة البقرة بردو...والغريب انه شغل نفس الآيه الى كنت بسمعها
بصراحه فرحت اوى

وقومت قافله الام بى ثرى وقولت اوفر الشحن شويه
ههههه
ولما وصلت احمد حلمى رحت اشتريت عصير وكيك علشان اعيش حياتى ف المواصله التانية
المهم رحت اركب لاقيت بنتين صغار قاعدين وسايبين مكان فاضى جوا العربيه جمبهم وبتقولى لو هتقعدى يا ابلة ادخلى جوا ..اتاريهم مش عايزين يدخلوا جوا علشان مكان الكرسى الى جوا عليه شمس..المهم قولت لهم بقى مش عايزين تدخوا علشان الشمس؟..طيب هاتونى انا جوا

ودلوقتى لما العربيه تتحرك الشمس هتبقى عندكم ...المهم صدقوا واضايقوا وبصوا لبعض وصدقونى صغيريين بقى وحسوا انى عملت فيهم مقلب...ههههه
المهم قولت لهم كل سنه وانتوا طيبين علشان هما كانوا كريستيان وكان يوم عيدهم
---
المهم انا روحت البيت واخدت الاهل وروحنا عند خالى ف التجمع الاول مش عايزة اقولكم ان من يوم ما خالى نقل هناك وكل ما نيجى نروح نزورة اكون انا مش فاضيه وعندى شغل واسيب اهلى يروحوا له لوحدهم
خالى دا بقى حته سكرة... ميعزش حاجه اد الاكل...عندة ولدين مؤمن وفادى
ربنا يحميهم يارب
انا كانت دى اول مرة ازور خالى ف بيته من اربع سنين من ساعه ما نقل
المهم اول ما وصلنا لاقيت خالى جايب لى اربع وردات ( بلدى احمر)....وبيقولى هبهههوب انا عارف ان البنات بتحب الورد اتفضلى....انا تنحت
بصراحه انا مصدقتش وفرحت اوى ..لان خالى ميعرفش انى بحب الورد اصلا ...بس والله زوق وكمان ورد احمر ...يا خراشى...كنت هطير من الفرحه....قعدت اتصور بيه زى الهبله...وكان ريحته تحفه
بجد متشنكرة يا خالو يا عسل
عايزة بقى احكى لكم على جمال التجمع الاول والهدوء الى هناك
مكان كدا تحس انه صحرا لسه عمران جديد والناس قليله وفلل وعمارات اسكان الشباب هما مش كتير بس يكفوا شباب مصر طبعا بتتريق ...هما ممكن يكفوا لو كل عشرين شاب اخدوا شقه
او يمكن اكتر بكتير كمان
المهم المكان كان تحفه وانتوا عارفين انا اد ايه بحب الهدوء...كنت مبسوطه اوى انى لاقيت مكان زى دا هادى بفكر ان شاء الله بعد ما ابقى تيته اروح اعيش هناك واستمخ مع الهدوء الجميل دا

---
بس حصل حته موقف واحنا ماشيين
لاقينا بجى 20 كلب طالعين من ورا فيلا
وانا كنت ماشيه مع حسام اخويا واحمد كان مع ماما وخالو كانوا ماشيين ورانا المهم انا سمعت صوت الكلاب من هنا طلعت اجرى وحسام هو الى وقفنى وزعق وقالى اوعى يحسوا انك خايفه ليجوا عليكى ويعضوكى وانا طبعا هسيبك واجرى
وانا اقوله حاضر
حسام دا اصغر اخواتى على فكرة بس بينى وبينكم انا ممكن ابين انى مش خايفه ظاهريا لكن من جوايا مرعوبه
لكن يقولى اوعى يحسوا انك خايفه طب تيجى دى اذاى
المهم الحمد لله احنا مشينا عادى وانا قلبى ف رجلى ...وهما مشيوا بعيد الحمد لله

----
وماما بتحكى لخالو ان اى نحله تدخل بيتنا متقرصش حد خالص ف البيت الا هبه
بس خالو حبيبى ...يرد ويقول ماهو لو النحل كان لقى حاجه حلوة غيرها كان قرسها لكن هى العسل الى ف البيت علشان كدا النحل بيجى عليها

هههههه
الله يكرمك يا خالو ...مش بقولكم خالى دا ...عسل
----

روحنا النادى الى ف التجمع الاول فيه حمام سباحه كبير وواحد تانى صغير ..وخالو خدنى انا واحمد وفرجنا على النادى انا كنت حاسه ان منطقه التجمع الاول دى مش ف القاهرة والزحمه وكدا كنت متخيلها تبع مرسى مطروح او اى مكان غير القاهرة
يعنى انا نفسى افهم الناس الى متكربسه ف القاهرة دول لو يروحوا يشوفوا المدن الجديدة دى هيعزلوا فورا
كل عمارة او فيلا حواليها جناين والناس طبعهم كمان هادى
في احلى من كدا
المهم وانا راجعه انهاردة بقى مقولكوش المواصلات كانت مش اوى ف العربيتين الى ركبتهم وانا جايه الاولى مش عارفه اوصفهالكم اذاى كانت فيها راكبين ناس مش عارفه اقول عليهم ايه هما كانوا سبع سيدات وبنات ومعاهم اطفال وعمالين يحكوا ويجيبوا ف سيرة فلانه وفلان ويشتموا ولا كأن فى حد معاهم ف العربيه وكأنهم رايحيين رحلة واى حد يركب او ينزل من العربيه لازم يتكلموا عليه ...بالخير طبعا...ههههه
المهم كانوا بشعيييييييين...مش عارفه اقول عليهم حاجه غير كدا
الحمد لله الذى عافانا مما ابتلاهم به وفضلنا على كثير مما خلق تفضيلا
المهم انى روحت على خير وكانت اجازة حلوة الحمد لله
غيرت جو وروقت شوية الحمد لله

----

احكولى انتوا بقى عملتوا ايه ف شم الفسيخ

اوعوا تكونوا شمتوا الفسيخ فعلا

ربنا يحرسكم ويحميكم يارب

الآ ان حب الله عزٌ وأمل ...وحب غير الله خزيٌ وخجل

السلام عليكم..... اذيكم

http://www.youtube.com/watch?v=QlSbtWp85dI
حياتى كلها لله.

..الحياة فعلا المفروض تكون ف ايدينا مش ف قلوبنا

-----
من كام يوم قالى مهندس الشبكات ف الشغل انه قرأ البلوج بتاعى من اوله لأخرة
بصراحه انا اتبسطت ...وبفرح اوى لما بلاقى حد مهتم بالبلوج وبيقراة...لانى فعلا بيضيع فيه وقت كبير سواء كتابه او تفكير ف الفكرة او ف الموضوع الى هتكلم فيه
المهم سألته على رأيه ف البلوج وقالى انه حلو وكل حاجه بس قالى جملة انا لحد دلوقتى بفكر فيها
قالى انا سمعت جمله ف فيلم رابعه العداويه بتقول:؟

"الا ان حب الله عز وأمل... وحب غير الله خزي وخجل"

المهم انا لحد دلوقتى بفكر ف الكلمة ومش عارفه الاقى لها تفسير
والى فهمته من كلامه ان البوست الى كان بعنوان "الوان من الحب" انا اتكلمت فيه عن تلخيص لكتاب بيتكلم عن كل انواع الحب وانى ف كلامى مذكرتش فيه آسمى انواع الحب وهو "حب الله".هو
صحيح انا اكيد غلطانه ف النقطه دى ...اعترف....لكنى كنت بلخص كتاب ...ومكنتش بضيف شىء جديد من عندى وكان معظم كلامى ف التلخيص ف اطار فصول الكتاب..الا انى كان المفروض اذكر الجزء دا
----
الا ان الجمله فعلا استوقفتنى
صحيح معظم البوستات الى بكتبها بتتكلم عن الحب والحياة وحواراتها....ودا لانى بحب الحب وبحب الحياة بكل ملابساتها واحب استكشفها...ونفسى اعرف وأعرف الناس على خبايا الحياة وفوازيرها واى معلومه بعرفها بحس انها هتفيدكم بقولها لكم

----
ليه الى بيقرا مدونتى وكلامى فيها بيفتكر دايما انى عايشه اجمل قصه حب ساعات سعيدة وساعات لأ
الى يعرفنى كويس منكم عارف انى عمرى ما احب اى انسان غير خطيبى الى دبلته ف ايدى...والى هيكون زوجى..مهما بلغت درجة اعجابى بشخصيته كأنسان
.-----
البنت ممكن اوى تتعلق بأنسان ...اتقدم لخطبتها ولقت فيه حاجات كويسه كتير كانت بتحلم بيها...لكن تحبه معتقدش.. هى مش دايما احلام الانسان بتتحقق...يا اما لظروف معلومة اوغير معلومة واكيد لأن ربنا مش رايد ان الموضوع يتم ودى بتكون وقعها على النفس اقل ألما...والاصعب لما بتكون البنت فاكرة ان الى قدامها دا بصفات معينه ...ولما بتكتشف العكس بيبقى الموضوع صعب عليها وبتحس بإنها معرفتش تقيم الناس صح...غير ان دا بيهز ثقه الانسان ف نفسه ...الا انه بيأثر على ثقته كمان ف الى حوالية...وبيخليه اكثر حذراً
...لكن احب اعرف كل الموهومين انى عمرى ما حبيت بجد ف حياتى
وكل الحب الى دق على بابى وبعلم الاهل مكملش على خير..عموما...الحمد لله
الحمد لله على كل شىء وانا مش معترضه على امر ربنا ...قضاء اخف من قضاء
وانا مؤمنه ان الى ربنا عايزة هو الى هيكون
الا انى حابه اوضح حاجه مهمه لكل قراء البلوج ان اعتقد فيها وقد يكون اعتقادى خاطىء..الله اعلم وهى "ان الحب دا بيجى مع العشرة والتعامل والمواقف والشد والجذب والرحمه والتسامح ووووو"و
وكل دا الى يمر بما سبق يقدر يقول انه كدا ف حاله حب..لكن غير كدا ممكن اى شىء اخر الا الحب...والحب ف الله ارقى لان ربنا بيباركه..اى نوع من انواعه سواء حب الوالدين او الاخوات او الزوجه او الزوج او الاصحاب لازم علشان ربنا يباركه انه يكون خالص لله

كان الشيخ خالد الجندى بيقول ان البيت الاسلامى بيقوم على 3 اعمدة هما الحب والسكن والرحمه...والعمود التالت ...ربنا بيرفعهلما يكون الزوجين بيتقوا ربنا ف بعض

----
-وانا اعتقد ان الحب الحقيقى هو حب الزوجين مش حب المراهقين والى بيتكلموا من ورا الاهل ووقت الفجر ويخرجوا ف الخفاء ووو...لان الى بيتولد ف الظلمه يموت لو شاف النور
الخلاصه يا جماعه ان الحب موجود ف كل شىء ف حياتنا بدايه بالحب الاكبر .وهو..حب ربنا سبحانه وتعالى..وانا مش مختلفه معاك يا بشمهندس ف الموضوع دا نهائى.والى حبه لينا بيفوق بمراحل حب الام لأبنها...والى ربنا بيحبه بيلقى ف قلوب الناس كلها حب الانسان دا...وينادى عز وجل ف الارض والسماء انى احب فلان فأحبوه...ربنا يجعلنا جميعا ممن يحبهم الله ويظلهم تحت ظله يوم لا ظل الا ظله

------
الآ ان حب الله عزٌ وأمل ...وحب غير الله خزيٌ وخجل
والحب والرحمة ف كل شى ء في حياتنا واالى احنا بنستمدة من ربنا سبحانه وتعالى

اللهم إني اسألك حبك و حب من يحبك و حب عمل يقربني إلى حبك اللهم ما رزقتني مما أحب فإجعله قوة لي فيما تحب وما زويت عني مما أحب فإجعله فراغاً لي فيما تحب
---

ف الختام عايزة اطلب منكم طلب ...وهو انكم تدعوا لريهام صاحبتى واختى الى لم تفارقنى منذ قرابه عامين

هى فارقتنى امبارح لسبب وهو انها عايزة تثبت لى وتثبت لنفسها انها انسانه ناجحه ومتفوقه ...هى عندها امتحانات الايام دى وبعتت لى رساله فيها بعض الكلمات الى آلمتنى...ومنها....

"انا قررت ابعد عن النت وعن كل حاجة عشان ابقي في مواجهة نفسي مايبقاش قدامي غير ريهام ويا انا يا هيا ......ادعيلي يا هبة وماتنسيش اني طبيبة ممكن اكون طبيبة بشرية بس برده الانسان طبيب نفسه وربنا يكتب لي الخير حيث كان----خدي بالك من نفسك اوي اوي اوي وكل اما اوحشك قولي رومي هتبعد عني فترة الامتحانات.. كام شهر مش مشكلة بس المهم انها هترجعلي احسن مالاول----ادعيلي اوي""""دا كان كلام ريهام ...ادعوا لها يا جماعه ان ربنا يجبر بخاطرها ويكتب لها الخير ويوفقها ف حياتها ومستقبلها ويرجعهالى ريهام الى بحبها اوى رغم الفترة القصيرة الى عرفتها فيها الا انها كانت تقريبا طول الوقت معايا

وبقولها بعدك على عينى...استودعكى الله الذى لا تضيع عنده الودائع...وربنا يوفقك يا حبى وبالتوفيق ان شاء الله

الى مش هيدعى لريهام رومى انا هعرفه...ادعوا ولكم بالمثل

-----
قمة الحزن : ان تبتسم وفي عينيك الف دمعة
قمة الالم : ان تسكت وفي قلبك جرح يتكلم
قمة الاستغراب : ان تُجرح ممن تحب
قمة الحب : ان تحب من جرحك
قمة الامانة : ان تنسى جرح من تحب
-----

وحشتونى

السلام عليكم اعزائى
وحشتونى اوى ووحشتنى الكتابه من القلب
يارب تكونوا بخير
انا حابه اطمنكم انى بخير وشكرا بجد لكل الناس الى قلقت عليا وسألت عليا الفترة الى فاتت

جزاكم الله كل الخير
قبل ما ابدأ عايزة اقولكم انى امبارح مكنتش عارفه انام بالليل وكنت بفكر ف حاجات كتير اوى مع بعض
صحيح كان حصل حاجه كدا خلتنى اندهش واستوقفتنى لحظات ...وبعدها خلاص
عارفين لما يحصلكم موقف غير متوقع او تسمعوا كلام مش منتظر...بتبقوا عاملين اذاى
انا واحدة من الناس بتنح للحظة ... وافتح فمى واقول هااااااا...... وبعدين خلاص
وكأن شيئا لم يكن...ف الوقت الى احنا فيه بقى الانسان ممكن يتوقع اى شىء ويسمع اى شىء
رتم الحياة بقى سريع اوى وانا بصارع السرعة دى
الى يعرفنى كويس عارف اد ايه انا سريعه ف كل شىء محبش اضيع ثانيه منغير لازمة
وهباء...الوقت بيجرى اوى ودى من ضمن الحاجات الى كانت شاغله تفكيرى امبارح...انا حاسه ان امبارح كان شهر سته 2007 وبعد كام يوم هيجى 6 -2008 .....ياة احنا بنتخطف ولا ايه يا جماعه

مش عارفه اشمعنى الوقت دا ....يمكن علشان دا اخر وقت انا كنت فيه مركزة وف وعيي...ويمكن بعد الوقت دا بشهر ونص كمان...بعد كدا كنت مغيبه حتى وقت قريب اوى
والمفروض اسأل نفسى قبل ما اتسأل من رب العباد يوم الحساب ...السنه دى قضيتها اذاى واتعذبت فيها اد ايه
وانا بقول اتعذبت لانها كانت فعلا سنه قاسيه ف حاجات كتير مش هيهمكم ذكرها
الا انها اثرت عليا كتير واكتر حاجه اثرت عليا فيها الحاجات دى ان اتخطف من عمرى سنه محستش بيها
صحيح انا ف شغلى ومش بضيع وقتى نهائى قدر الامكان...الا انى محستش بالسنه فعلا كأنها كانت لسه امبارح
الواحد ممكن يتسرق كدا!!!!ا
انا اعرف ان الى بيسرق حد يسرق منه موبايل –فلوس-لكن عمركم سمعتوا عن حد يسرق عمر ووقت وحياة
جديدة دى
انا ايه الى خلانى تطرقت لموضوعات اخرى
قبل ما اقفل الموضوع لازم اخرجكم من مود الكأبه دا
واقولكم ان 2008 كانت فيها كتير اوى حلو الحمد لله وانا متفائله خير ان شاء الله...وبجد من بدايتها وحتى الان مشفتش من 2008 غير كل خير...الحمد لله
اقولكم متتوقعوش دوام النعمه.....لانها زواله...عيشوا اللحظه واعرفوا ان الوقت الى بيعدى مبيرجعش تانى ...دى مش نظرة تشاؤميه للحياة
بس بردو زى ما الحلو مبيدومش ...الوحش كمان مبيدومش....ان مع العسر يسرا
تفائلوا
عايزة احكيلكم على مغامراتى امبارح مع مى طب احنا خرجنا امبارح ...هى عدت عليا اول ما خلصت الشغل وخدتنى وخرجنا وانطلقنا...رحنا معرض واشترينا شويه حاجات حلوة الحمد لله
وبعدها نزلنا بنها شوبنج بردو احنا اصلنا نعز الشراء اوى
المهم كنا جعنا اوى وعماله طول ما انا ماشه اقولها جعان جعان جعان لحد ما كنت هاكل دراع البنية
المهم قولنا نروح مطعم على البحر اسمه روك
ROCK
المهم انا دايما اعرف ان المطعم دا مبيدخلوش غير مخطوبين
الراجل ياخد خطيبته انجاشيه...ويترسم عليها ويوديها المكان دا هو فعلا رومانسى جدا ...ديزاين المحل والاضاءة الخافتة وصوت ام كلثوم وما ادراكم ام كلثوم
المهم انا كنت مش عايزة ادخل المحل دا الا مع خطيبى الى مش لاقياه لحد دلوقتى

الظاهر انه ضل الطريق..الظاهر ان كل منا يبحث فى طريق بعيد عن الاخر

ربنا يقرب البعيد

خلينا ف الاكل دلوقتى
وانا بصراحه كنت جعانه اوى
والبنت مى حبت تخلص من زنى فقالت أأكلها واسكتها ....دخلنا وقعدنا ف اخر المحل ف الركن البعيد الهادى وبصراحه انا كانت عنيا على بنت وخطيبها كانوا قدام عينى وانا اقول ف نفسى المكان دا ميدخلوش غير مخطوبين يالا يا بنتى قومى من هنا
احنا ملناش ف القعدات الرومانتيك دى ومش عايزاكى انتى خالص يا مى بصراحه القعدة دى...انا بهذر يا ميويتى انتى غاليه والله يا حبى وكمان يا جماعه البنت مى كانت تعبانه جدا وعلشان مش تزعلنى خرجت معايا علشان انا كان نفسى اتفسح اوى
البنت شهمه جدا والله....وكل اصحابى تقريبا نفس القطعية
الحمد لله
المهم الراجل جاب المينيو وهو حاطط ايدة ورا ظهرة ...قلت هيطلع ايدة فيها وردة بما اننا اول مرة نشرف المحل.....المهم مدناش حاجه والمينو كانت شكلها تحفه الحقيقه والاكل يفتح النفس
قعدنا نطلب ف طلبات طلبات لحد ما خرجنا من المحل عندنا تخمه ومفلسين
انا قلت احنا ملناش دخول الاماكن النظيفه دى ...ودا مكان مش أكل دا عايز ناس تحب فيه وخلاص
الناس حوالينا قعدين يحبوا ف بعض وانا ومى نازلين هتتك بتتك على الاكل
انا ومى طول عمرنا مغامرين نحب نجرب مطعم جديد او محل جديد مثلا وهكذا بس كان يوم جميل
صحيح مش حكيت لكم عن نتاج تفكير امبارح...الى سهرنى لحد الساعه2 وانا المفروض بنام12
عايزة اقولكم على اليوم انهاردة انا الصبح رحت الشغل عادى جدا وخلصت وطلعت على مكتب دعايه واعلان اقدم فيه انى اشتغل واعرض على صاحب الشغل ظروف مواعيدى وكدا...ولو وافق وافق ولو موافقش خلاص عادى الحمد لله
المهم رحت الشركه وقابلت المدير وقلت له ظروف مواعيدى الفاضيه الى هى يوم واحد ف الاسبوع وهو الخميس...فقالى انا عايز حد يتواجد ايام الاسبوع كلها وووو
المهم قلت له علشان انا مواعيدى مش ثابته انا هتدرب لحد ما اكون متواجدة لو ربنا اراد ولو محصلش انا كدا كدا مستفيدة ومش هكلفك شىء..الراجل اخد نفس عميق وروحوا رجعت له ولقى حد يشتغل ببلاش
وقالى على طول مفيش مانع هتيجى امتى قفلت له دلوقتى لو ممكن انا حابه المجال دا والديزاين
قعدت شويه اتعرفت على الناس الى ف المكان زمايلى المصممين والسكرتيرة ودخلت تجولت ف المكتب ككل وشوفت مكن الطباعه اليفت الكبيرة والبلوترز وانواع البنر الى بيطبعوها وووو
كنت فرحانه جدا والناس هناك كلهم الحمد لله حبونى واستريحوا لى وانا كمان استريحت لهم
انا فعلا محتاجه اكون فرى ف مواعيدى ف الشغل دا اروح وقت ما اكون انا فاضيه ومش بمواعيد ثابته....ومش مهم المادة على ما اد ما مهم الاستفادة ....ودا الحمد لله اتحقق وانا من زمان مستنيه وقت اروح اتدرب ف مكتب دعايه واعلان ومش لاقيه وقت ...وسبحان الله مروحش اقدم الا ف الوقت الى مضغوطه فيه ف الشغل جدا وتقريبا بشتغل 9 ساعات يوميا
سبحانه مدبر الاحوال...لا الامر امرى ولا التدبير تدبيرى ..ولا الامور التى تجرى بتقديرى...لى خالق رازق ما شاء يفعل بى ...احيط بى علمه من قبل تصويرى.....فعلا
المهم بعدها رجعت البيت اتغديت وقعدت ف البيت ساعه واحدة بس...وطلعت على جمعيتى الجميله جمعيه رسالة
الى بحس فيها انى ما بين اهلى فعلا كان فى اجتماع للجنه الكمبيوتر ورحنا وقعدنا نتكلم نتكلم كلنا ونشد ونجذب ف الحوار لحد ما الساعه بقت 8.45....قومت وروحت ورحت اصور ورق عند المكتب الحديث وكملتها مشى....المهم انى وانا مروحه لبيتنا قابلت واحدة عزيزة عليا اوى هى كانت من المتدربين الى كنت بدرس لهم ف الدورة الى فاتت اسمها مدام كامله وهى مامة صحبتى...بجد الانسانه دى بحس فيها طيبه وصفاء مش عادى...وبرتاح جدا لما اقرب منها واسلم عليها....اد ايه ارتحت لما شفتها وتفائلت جدا...وبقيت ماشيه فرحانه اوى
وكمان كنت فرحانه اكتر ان يومى كان مثمر الحمد لله
بصراحه انا لما لقيت ان الوقت كدا كدا بيعدى وبسرعه جنونية...قلت مينفعش انا هتحدى الوقت وهبقى اسرع منه
ومش عارفه من امبارح ولحد دلوقتى وانا عندى طاقه وقوة عايزة اعمل حاجات كتير اوى ...اذاى وامتى معرفش...ربنا يقدرنى
غير شغلى ومكتب الدعايه ورساله وهكمل ف درس القرأن بإذن الله ومش هنقطع ...وكمان بفكر اروح العب رياضة...معرفش امتى واذاى الا انى عايزة استغل كل فمتو ثانيه ....حلوة فمتو دى..هههههه

..وربنا يبارك ف الوقت يارب
بحبكم قوى وهتوحشونى لحد البوست الجاى...معلش طزولت عليكم ...كبت بقى بعيد عنكم

حبيبى دائما

يا جماعه انا عايزة اوريكم صورة بعتتها ليا صديقه قريبه الى قلبى الكتكوت حبيبتى نشوى توته
اختى وعشرة عمر ايام الجامعه الى بعتبرها من ضمن الايام الحلوة الى عشتها ف حياتى
---
قلوب وورد احمر اي الحلاوة دى
كل الصور الجميله دى ليا أنا؟؟؟؟
ميرسى اوى يا حبى
قعدتى تفكرى فيا وتجمعى لى احلى الصور علشان تعملى لى احلى كرت
--
على فكرة بنها دا اسم الشهرة بتاعى ف ايام الجامعه لأن الجروب بتاعى كان فيه اكتر من هبه فكان لازم نفرق فكان اسمى هبه بنها زى ما فى كتير منكم المعلومه دى مش جديدة عليه
--
والله انتى عسل يا توته ...كل دا علشانى انا...بجد جزاكى الله كل الخير وربنا يبارك لك يا حبى ويكتب لك الخير حيث كان
وربنا يخليكى ليا...وميحرمنيش منك ابدا

بحبك اوى

اضراب يوم 6

تمت اضافات جديدة على هذا البوست حالا

اذيكم اعزائى....وحشتونى كلكم...حتى الى معرفهومش

اتمنى تكونوا بخير

أحب اشكر كل الناس الى قلقوا وسألوا عليا الى بعتوا وكتبوا والى مكتبوش

وعايزة اطمنكم انى بخير الحمد لله ...متقلقوش انا كويسه وبخير الحمد لله

والدنيا تلاهى وبتنسى الانسان اى احزان

بشكركم على اهتمامكم ودعواتكم وخوفكم عليا ربنا يخليكم ليا وميحرمنيش منكم ابدا

معظم الناس الى سألت عليا واهتمت بضيقى هما ناس معرفهومش وهما اصحاب مدونات وغيرهم ناس كتير فعلا الانسان مبيعرفش الانسان فعلا الا وقت الشدة

جزاكم الله كل الخير وربنا يجمعنا ف الاخرة ان شاء الله ويكون ف الجنه يارب

----

عايزة كمان اقولكم خبر هايل ان انهاردة كانت فرحت قلبى الكبيرة

وانهاردة من اسعد الايام الى عشتها ف حياتى

انهاردة كانت خطوبه هبه سمير صديقه عمرى وحبيبتى وروح قلبى

اتخطبت انهاردة للأنسان الى هى بتحبه وهو بيحبها وكانوا احلى عروسين هبه وعلاء

الف الف مبروك يا حبى وبجد مش لاقه كلام اعبر بيه عن فرحتى بيكى واحساسى بأنك سعيدة اد ايه اسعدنى واسعد كل اصحابنا وبجد كان يوم تحفه وأظن كلنا بدعنا ولا انت ايه رأيك

اى خدمه انا صوتى اتنبح من كتر الزغاريط..بس بجد يا حبى انا فداكى مش صوتى بس

انا هروح بكرة الشغل اشاور وبس

والله يا بوبه اتى تستاهلى كل خير انتى وعلاء.. وفعلا ...الحمد لله ..ألحمد لله ...الحمد لله

وبحبك يا بوبه وكنتى قمرايه يا حبى....عقبال كل الناس ربنا يسعد الكل يارب ويملى قلوبكم حب وسعادة يا رب

-----

عايزة اكلمكم ف موضوع مهم وعايزة اعرف رأيكم هل انتم مع ام ضد

الشعب المصرى عامل اضراب يوم الاحد بوم 6 و تقريبا كمان يوم الاتنين يوم 7

ياترى هو دا الحل ولا احنا لما نضرب هيبقى ايه رد الفعل

انا مش عارفه انا متخوفه من اليوم دا صحيح انا مش هروح ميدان التحرير ولا حاجه

وبصراحه حاولت اخد اجازة اليوم دا من شغلى واقعد ف البيت بس معرفتش

بس هل فعلا الموقف دا هيجيب نتيجه ولا هيكون رد الفعل اعلى ما ف خيلكم اركبوة

والمشكله ان مفيش خيل اصلا ولا حتى احنا بنعرف نركب الخيل

مش كنا سمعنا كلام عمر رضى الله عنه لما قال علموا اولادكم

السباحه والرمايه ركوب الخيل اهو كان نفعنا ف الوقت دا

احنا دايما كدا بنعمل الحاجه متأخر ومبنبصش للمستقبل

بس احنا فيها واحنا ف ميدان التحرير يوم الاحد مكن الى عندة خيل يجيبه معاة علشان نتعلم حاجه مفيدة ف الوقت الى هنقضيه ف ميدان التحرير بدل تضييع الوقت

الثانيه الى بتعدى مش بترجع تانى

والى بتيجى بعدها بتبقى اصعب من الى فاتت

لازم نعمل لها ومنضيعش وقتنا هباء

ولا انتوا ايه رأيكم

بصراحه انا كنت مع الموضوع دا ف الاول وحاولت اخد اجازة وفعلا مش هشترى حاجه ف اليوم دا...بس هل فعلا الاضراب دا هيكون مفيد ولا لأ؟

وكمان الخوف من الناس الى هتستغل الموقف وتكسر وتخرب تحت اسم الاضراب والحراميه يشتغلوا وتبوظ اكتر ماهى بايظة

----------------------------

لا الامر أمرى ولا التدبير تدبيرى

ولا الامور التى تجرى بتقديرى

لى خالق رازق ما شاء يفعل بي

أحاط بي علمهُ من قبل تصويرى

السيدة زينب رضى الله عنها