تمت اضافات جديدة على هذا البوست حالا
اذيكم اعزائى....وحشتونى كلكم...حتى الى معرفهومش
اتمنى تكونوا بخير
أحب اشكر كل الناس الى قلقوا وسألوا عليا الى بعتوا وكتبوا والى مكتبوش
وعايزة اطمنكم انى بخير الحمد لله ...متقلقوش انا كويسه وبخير الحمد لله
والدنيا تلاهى وبتنسى الانسان اى احزان
بشكركم على اهتمامكم ودعواتكم وخوفكم عليا ربنا يخليكم ليا وميحرمنيش منكم ابدا
معظم الناس الى سألت عليا واهتمت بضيقى هما ناس معرفهومش وهما اصحاب مدونات وغيرهم ناس كتير فعلا الانسان مبيعرفش الانسان فعلا الا وقت الشدة
جزاكم الله كل الخير وربنا يجمعنا ف الاخرة ان شاء الله ويكون ف الجنه يارب
----
عايزة كمان اقولكم خبر هايل ان انهاردة كانت فرحت قلبى الكبيرة
وانهاردة من اسعد الايام الى عشتها ف حياتى
انهاردة كانت خطوبه هبه سمير صديقه عمرى وحبيبتى وروح قلبى
اتخطبت انهاردة للأنسان الى هى بتحبه وهو بيحبها وكانوا احلى عروسين هبه وعلاء
الف الف مبروك يا حبى وبجد مش لاقه كلام اعبر بيه عن فرحتى بيكى واحساسى بأنك سعيدة اد ايه اسعدنى واسعد كل اصحابنا وبجد كان يوم تحفه وأظن كلنا بدعنا ولا انت ايه رأيك
اى خدمه انا صوتى اتنبح من كتر الزغاريط..بس بجد يا حبى انا فداكى مش صوتى بس
انا هروح بكرة الشغل اشاور وبس
والله يا بوبه اتى تستاهلى كل خير انتى وعلاء.. وفعلا ...الحمد لله ..ألحمد لله ...الحمد لله
وبحبك يا بوبه وكنتى قمرايه يا حبى....عقبال كل الناس ربنا يسعد الكل يارب ويملى قلوبكم حب وسعادة يا رب
-----
عايزة اكلمكم ف موضوع مهم وعايزة اعرف رأيكم هل انتم مع ام ضد
الشعب المصرى عامل اضراب يوم الاحد بوم 6 و تقريبا كمان يوم الاتنين يوم 7
ياترى هو دا الحل ولا احنا لما نضرب هيبقى ايه رد الفعل
انا مش عارفه انا متخوفه من اليوم دا صحيح انا مش هروح ميدان التحرير ولا حاجه
وبصراحه حاولت اخد اجازة اليوم دا من شغلى واقعد ف البيت بس معرفتش
بس هل فعلا الموقف دا هيجيب نتيجه ولا هيكون رد الفعل اعلى ما ف خيلكم اركبوة
والمشكله ان مفيش خيل اصلا ولا حتى احنا بنعرف نركب الخيل
مش كنا سمعنا كلام عمر رضى الله عنه لما قال علموا اولادكم
السباحه والرمايه ركوب الخيل اهو كان نفعنا ف الوقت دا
احنا دايما كدا بنعمل الحاجه متأخر ومبنبصش للمستقبل
بس احنا فيها واحنا ف ميدان التحرير يوم الاحد مكن الى عندة خيل يجيبه معاة علشان نتعلم حاجه مفيدة ف الوقت الى هنقضيه ف ميدان التحرير بدل تضييع الوقت
الثانيه الى بتعدى مش بترجع تانى
والى بتيجى بعدها بتبقى اصعب من الى فاتت
لازم نعمل لها ومنضيعش وقتنا هباء
ولا انتوا ايه رأيكم
بصراحه انا كنت مع الموضوع دا ف الاول وحاولت اخد اجازة وفعلا مش هشترى حاجه ف اليوم دا...بس هل فعلا الاضراب دا هيكون مفيد ولا لأ؟
وكمان الخوف من الناس الى هتستغل الموقف وتكسر وتخرب تحت اسم الاضراب والحراميه يشتغلوا وتبوظ اكتر ماهى بايظة
----------------------------
لا الامر أمرى ولا التدبير تدبيرى
ولا الامور التى تجرى بتقديرىلى خالق رازق ما شاء يفعل بي
أحاط بي علمهُ من قبل تصويرىالسيدة زينب رضى الله عنها
9 comments:
ان شاء الله خير يا هبهوب
:)
حمد الله على سلامتك ويارب تكوني بخير دايما
النهاردة اليوم عدى على خير ومحصلش شعب ولا تكسير ولا حاجة على الأقل عندنا والشوارع كانت فاضية
بجد كان يوم اتصرفنا فيه بشكل حضاري جدا
ألف مبروك لصاحبتك
وتحياتي ليكي
السلام عليكو و رحمة الله و بركاته
انا العروسه يا بنهتي... فرحتك يا حبي مش محتاجه كلام عشان تتوصف انا شفتها في كل حركه و كل اشاره و كل حاجه فيكي ... وجودك انتي و الشله فرق معايا قوي ... أكيد انا و علاء كنا هانبقى مبسوطين في كل الاحوال ... لكن وجودكم ...انتي عارفه تأثيره عليه عامل ازاي ... و انا من خلال مدونتك عايزاكي تقولي لكل الناس
ان الحب ... بكل انواعه اجمل شئ في الوجود ... حب الاصحاب و الاخوات و العيله و الازواج .... كل الحب هو اللي بيفرق الانسان عن كل المخلوقات التانيه ... و لأن الحب غاب من جوانا جرالنا اللي جرالنا... لو كنا بنحب ربنا و رسوله صح ... كان اتصلح حالنا .... لو كان الازواج بيحبوا بعضهم صح كان اتصلح حالنا ... لو كان الاخوات بيحبوا بعضهم صح كان اتصلح حالنا ... و لو كنا بنحب نفسنا صح من غير ما يأدي حبنا لأذى الناس كان بجد حالنا اتغير ...
عارفه يا بنها طول الفتره اللي فاتت كنت باسمع جمله " حب ايه ده اللي بتتكلموا عليه ... في الجواز مافيش حب .... حبوا زي ما انتوا عايزين بس الجواز ليه حسابات تانيه" ... و الله يا بنتي انا مش فاهمه ... لو الحب و الود مش مهمين عشان الجواز امال هما مهمين لأيه؟ ... عايزاكي تدعيلي بان ربنا يتم عليه فضلوا في زواجي انا و علاء و ان ربنا يزدنا من فضله في كل شئ .... عايزاكي انتي و كل اللي يقرأ الكلام ده يدعيلي ... و ارجو من اللي يقرأ الكلام ده يحسن الظن في كلمة "حب" و يارب ما تحرموا نفسكم من الجمله و الاحساس العظيم ده ....
اما بقى عن الاضراب فده من حب مصر و من حب الذات .... احنا عارفين الاوضاع و احنا عارفي اللي المفروض يتعمل ... و اولا و اخيرا مافيش حد بيجبر حد على حاجه و لكن في ناس بتختار تبقى فئران و في ناس لأ .... انا مش باقول اننا نكسر وندمر لأن ده مش الهدف ... و الفرقعه بتاعت يوم و انقضى دي لازم يبقالها حد في نفوسنا ... الهند استقلت بالاضرابات السلميه .... و احنا مش في احتلال ... احنا بس في حالة تعارض مصالح الغلبه فيها للاقوى ... و الشعب هو اللي المفروض اقوى و هو اللي ممكن يبقى ثماني مليون صفر أو ثمانين مليون واحد ... و انا شايفه ان الاضراب الاكثر فاعليه هو الاضراب عن الاستهلاك هو ده اللي هايحرك كل شئ .... و الغريب اننا في شعب مسلميعني الصيام ده حاجه عاديه ( بس احنا اتعودنا على ... ) و المسيحين كمان .... يا رب نحب
السلام عليكم.....ازيك يا بوبا....قبل ما اتكلم في موضوع الاضراب ...احب ابارك لصاحبتك هبة....الف مليون مبروك وربنا يارب يتمم لك علي خير ماتتخيليش هبة بنها فرحانة عشانك اد ايه وبتحبك اد ايه يارب يخليكم لبعض ونفرح ببوبا ان شاء الله...انا عارفة انك ماتعرفينيش بس انا عجبني كلامك جدا وباتمنالك كل التوفيق والسعادة في حياتك ...وانا كمان رأيي من رايك ان ربنا ميزنا عن غيرنا من المخلوقات بنعم الحب ولو الناس اتعلمت ازاي تحب -اقصد كل انواع الحب- الدنيا فعلا حالها هيتصلح.
((بارك الله لكما وبارك عليكما وجمع بينكما في الخير ان شاء الله..........
اما بالنسبة لموضوع الاضراب انا منزلتش في اليوم ده يا بوبا بس صحابي اللي نزلوا قالوا ان مافيش حاجة حصلت والشوارع كانت فاضية والمواصلات كانت رايقة....انا مش عارفة بجد ايه اخرة الموضوع ده يا هبة انا نفسي تيجي عندنا مستشفي الدمرداش وتشوفي حالة الناس عاملة ازاي وتشوفي الناس اللي بتموت عشان مافيش معاهم تمن العلاج لان برده اسعار الادوية غليت مع كل حاجة غليت....تخيلي الدكتورة بتشرح لنا في المحاضرة بتوقل طبعا علاج الحالة دي بيتوفق علي انك غني او فقير طبعا الفقرا مش بيجيبوا العلاج وبيموتوا ....الكلمة دي حرقت قلبي والله وده نوع من الامراض الخطيرة بس بجد مع الاسعار دي هتبقي كمان الامراض العادية اسعار ادويتها غاليو جدا ....انا مش عارفة ايه الحل؟؟؟؟؟؟؟؟؟ او مش عارفة انا ممكن اعمل ايه في الموضوع ده
بس اضعف الايمان بادعي ربنا يفك كرب البلد دي وعندي امل حالنا يتصلح
معلش طولت عليكي........لا اله الا الله
بخخخخخ ...انا تاني!!! معلش يا بوبا البوست فيه اخطاء املائية بس حاولي انتي وقراء البلوج تقروه بس اعمل ايه اللي يخش كلية زي كليتي لما يخرج منها بضعف النظر يعمل فرح ويعزم الناس كلها انه ماخرجش بأتب في ضهره ولا باسنانه واقعة مثلا هههههههههههه انا فاضلي 3 سنين ربنا يستر ونطلع بضعف النظر بس ....ودلوقتي بقي ساعة امتحانات والواحد بيبقي طالع مالمذاكرة دماغه زي الكرة الشراب بالظبط ههههههههههه ....الحمدلله
ازيك يا هبهههوب
اخبارك ايه يا قلبى
معلش مقصرة فى السؤال عنك بس والله ظروف الكلية
الف الف مبروك لصاحبتك وربنا يتمم لها على خير وعقبال كل اتنين بيحبوا بعض ربنا يجمعهم على سنته وسنة ررسوله
اليوم كلن عادى جدا رحنا الكلية ومحسناش بحاجة
ميرسى ليكم كلكم
الف مبروك تانى يا عروسه وبجد الف مبروك وربنا يتمم لك على خير انتى تستاهلى كل خير
انا معاكى ف ان الحب والود مهم جدا ف الجواز وف كل شىء ف حياتنا تقريباولو مش موجود يبقى من الافضل عدم الاقدام على خطوةالجواز دى لحد ما نحس ان فعلا فى ود ومشاعر بين الطرفين علشان محدش يظلم حد غيرة...ودا الى بيخلى نسب الطلاق كتير ف المتزوجين حديثا ودا لأن الكل عايز يتجوز وخلاص ومش مهم بقى هيتجوز مين واذاى وهل فعلا حاسس بالأنسان دا او بألأنسانه دى ولا لأ...وبعد كدا بيكتشفوا حاجات وطباع ف بعض ويلاقوا انهم مش قادرين يتكيفوا مع الطباع دى...انا شايفه ان الجواز دا اهم مشروع ف حياة الانسان ومش من السهل ابدا ان حد يقدم على خطوة ذى دى الا لو كان مخطط لها ودارسها كويس ...دا لو ناوى على استقرار وحياة ....مش جوازة والسلام
---
الشيخ خالد الجندى كان قال مرة ف حلقه من حلقاته ان البيت الوحيد الى بيقوم على 3 اعمدة فقط هو بيت الزوجيه
والاعمدة هى:-الحب
والاحترام
والرحمه
ولو دا حصل ربنا بيرفع العمود الرابع
تخيلوا ربنا يبارك البيت اذاى لو الزوجين الى فيه اتقوا ربنا ف بعض
فعلا
----
يا جماعه موضوع الجواز دا مش سهل ابد التسرع فيه ولا الاقدام عليه بدون استعداد ف كل شىء
الدنيا مزرعه للأخرة ولازم نلتمس ف الدنيا الى يدخلنا الجنه والى يوصلنا ليها
انا معاكى يا بوبه ان الحب دا اعظم شىء ف الحياة وهو الى بيدى طعم للحياة
لما تحسى انك عايشه وفى حد بيخاف عليكى وبيسأل عليكى وعلى احوالك ولو تعبتى يقلق..ولو ف ازمه يفكر معاكى ويعينك على طاعه ربنا وو وو وو....مش قصدى حب الزوجين بس انا اقصد كمان حب الابوين والاخوات والاصدقاء وحب الناس لبعضها
الشعب المصرى دا حنين اوى لو ضحكت ف وش حد تلاقيه بيحبك ويساعدك....لانه شعب رومانسى محب
متخلنيش افتح ف الموضوع دا يا بوبه....علشان انا بنطلق
بس تعرفى انا قلت جمله قبل كدا ف بوستات فاتت ان الحب سعات كتير بيكون وهمى وساعات تانيه بيكون خفى
والشاطر هو الى يعرف يفرق ...وميضيعش الفرصه منه...لانه قليل اوى لما يصادف انك تتعرف على الحب وتلاقيه وخصوصا ف الزمن دا والظروف الى بلدنا بقت فيها كمان
---
عارفه يا بوبه انت احسن حاجه فيكى ايه
انك عارفه انتى عايزة ايه...وواثقه من مشاعرك وبحب فيكى جرأتك المهذبه
الف مبروك يا حبى ويتمم لك بخير
ربنا يسعدك ان وعلاء وكل الناس الى بيحبوا بعض وبيتقوا ربنا ف بعض
سلام مؤقت يا حبى
ادعيلي يا هبة
ازيك يا هبة عاملة ايه؟؟
وحشانى جدااااااااااااااااااااااااااااااااااااا
يسارب تكونى بخير يارب
والف الف الف مبروووووووووووك لهبة سمير
بجد فرحتلها اوى يا هبة .. هبة كانت من اوائل الناس اللى اتعرفت عليهم لما دخلت الكلية
وعقبالك يارب ان شاء الله قريب
انتى حقيقى انسانة جميلة جدا ومخلصة اوووووووووووى
ربنا يديمها عليكى نعمة
Post a Comment