عدنا

السلام عليكم احبائى

وحشتونى اوى

انا عارفه انى مقصرة معاكم

وكتير بمر بمواقف وظروف بتدفعنى انى اكتب واتكلم

بس مش عارفه انا بقيت كتومه يمكن او بمعنى اصح مبقتش عايزة اكتب حاجه قد تكون كويسه بالنسبالى بس لكن ممكن تضايق اى حد

بقالى فترة والله نفسى اكتب والى دفعنى اكتب انهاردة هو كذا حاجه

---

طبعا الانسان ف حياته بيمر بظروف كتير اوى منها الحلو ومنهم الوحش

ولما بيمر بالحلو بيبقى فرحان وقد ينسى ان يحمد ويشكر صاحب هذة النعم

لكن اول ما بيمر بالوحش بيفتكر ربنا ويلجأ له ويقوله

يااااااااااااااارب

-----

انا من كام يوم مريت بظرف ما وكنت مخنوقه شويه وحسيت بأحاسيس كتير

اصعبها انك تلاقى ناس كتير حواليك وانت غريب وحاسس انك لوحدك ومش شايف حد من الى حواليك

ساعتها لجأت لربنا وصليت وبكيت بحرقه وقلت له يارب انت عالم بحالى وغنى عنى وعن سؤالى ..خليك جمبى وفك كربى

فجأة وانا بين يدى الله...نسيت الى مضايقنى وحسيت بشعور غريب

وهو انى بقالى فترة كبيرة اوى تقريبا من رمضان الى فات موقفتش الوقفه دى قدام ربنا

بصلى الفرض اة لكن مش بالخشوع الى حسيته وانا محتجاله

وساعتها بقيت ببكى اكتر على انى مقصرة ف حق ربنا ...وبقلوا يسامحنى ... ونسيت كل همى

ووالله والله يا جماعه....انا بعد ما قومت من الصلاة ... كل الهم الى كان على اكتافى راح ...والله راح وحسيت بحاله من الرضا وعدم السخط

ربنا رحيم اوى يا جماعه

احنا الى محتاجين له وهو الغنى عنا

ورغم كدا بيندهلنا وبيقولنا هل من داع هل من مستغفر

----

تعرفوا من شويه قريت بوست حلو اوى اد ايه هزنى ف مدونه رومى حبيبتى واختى الانتيخ

كانت كاتبه عن الرضا بالقضاء والقدر وان الانسان لازم ف كل احواله يرضى وميزعلش من ان كل الى كان مرتب له راح بفعل القدر

ويرضى ويعرف ان دا الخير له وان ربنا شايل له الخير وانه مخلى له الحاجه الافضل له

لو الانسان فكر ف كل امور حياته كدا هيسعد وهيكون دايما راضى

والله والله السعادة ف الرضا

-----

والى ربنا يرزقكم جميعا ويفتحها عليكم من وسع

بمناسبه الرزق ..انا قريت ف مدونه انسانه موضوع بعنوا ن عايز فلوس

.. الى عايز رزقه يزيد

ألم تقرأ قول الله تعالى : ( فقلت استغفروا ربكم إنه كان غفارا * يرسل السماء عليكم مدرارا * ويمددكم بأموال وبنين ويجعل لكم جنات ويجعل لكم أنهارا )

وكمان يا جماعه عليكم بقراءة سورة الواقعه كل ليله

قال رسول الله صلى الله عليه وسلم: من قرأ سورة الواقعة كل ليلة لم يصب بفاقة أبداً

ربنا يبارك فيكم

عندنا الحل والعلاج ودايما بنشتكى ...والحل الاعظم والامثل ف الرضا....والى مبيرداش يا جماعه حياته دايما بتكون تعيسه لانه مهما ربنا اداله مش بيرضى وبيكون دايما ساخط

علشان كدا عمرة ما بيحس بالسعادة ابدا

-------

انا مش هطول عليكم المرة دى

وبشكر رومى الى شجعتنى انى اكتب تانى وانور مدونتى..هههه

اسفه انى اتأخرت عليكم واوعكم انكم هتشوفونى كتير الفترة الجايه

وان شاء الله فى طاعه الله وفي تقدم وحب ورضا وسعادة

بحبكم ف الله

----

وبطلب منكم تدعوا لى ان ربنا يييسر لى حالى ويدبر لى امورى

استودعكم الله الذى لا تضيع عنده الودائع